ޤައުމީ ކަރަންޓް ކުންފުނި، ސްޓެލްކޯއިން ރަކީދޫގައި ކުރިއަށްގެންދިޔަ އިއާދަކުރަނިވި ހަކަތައިގެ މަޝްރޫޢުއާއެކު، އެރަށުގައި ޖަނަރޭޓަރު ހިންގަންޖެހޭ ވަގުތު އެންމެ ދެ ގަޑިއިރަށް ކަމަށް ސްޓެލްކޯއިން ބުނެފިއެވެ.

މިކަމާ ގުޅޭގޮތުން ސްޓެލްކޯގެ މެނޭޖިން ޑިރެކްޓަރު ހުސެއިން ފަހުމީ ވިދާޅުވީ، އިއާދަކުރަނިވި ހަކަތައާއެކު ރަކީދޫގައި މިހާރު އިންޖީނު ހިންގަންޖެހޭނީ އެންމެ ދެ ގަޑިއިރަށް ކަމަށެވެ. އެކްސްގައި ކުރެއްވި ޕޯސްޓެއްގައި ފަހުމީ ވިދާޅުވީ، ރަކީދޫއަށް މިހާރު ކަރަންޓް ދިނުމުގައި މައިގަނޑުގޮތެއްގައި ބޭނުންކުރަނީ،  ހައިބްރިޑް ޕީވީ-ބީއީއެސްއެސް-ޑީޖީ ސިސްޓަމުން ކަމަށެވެ.

ފަހުމީ ވިދާޅުވީ ރަކީދޫއަށް ކަރަންޓް ދިނުމުގައި މިހާރު ބޮޑަށް ބޭނުންކުރަނީ އިރުގެ އަވިން ލިބޭ ހަކަތަ ކަމަށާއި، އެރަށަކީ މިހާރު އިއާދަކުރަނިވި ހަކަތަ ބޭނުންކުރުމުގައި ނަމޫނާ ރަށެއްކަމަށެވެ. ފަހުމީ ވަނީ އިއާދަކުރަނިވިހަކަތަ ބޭނުންކުރަން ފެށުމުން އައި ހެޔޮބަދަލު ދައްކުވައިދޭ ގްރާފް ޗާޓެއް ހިއްސާކުރައްވާފައެވެ. 

Advertisement

އެއާއެކު ފަހުމީ ވަނީ ރާއްޖޭގައި ބޭނުންކުރެވޭ ހަކަތައިގެ 33 އިންސައްތައަކީ އިއާދަކުރަނިވިހަކަތައަށް ހެދުމަށް ރައީސުލްޖުމްހޫރިއްޔާ ޑރ.މުހައްމަދު ގެންގުޅުއްވާ ސިޔާސަތު ފާހަގަކޮށް، އެކަން އެމަގުން ކުރިއަށްގެންދިއުމަށް ރައީސް ކުރައްވަމުންގެންދަވާ މަސައްކަތްޕުޅު ފާހަގަކޮށް ޝުކުރު އަދާކުރައްވާފައެވެ.

އިއާދަކުރަނިވި ހަކަތަ ބޭނުންކުރާ މިންވަރު އިތުރުކުރުމަކީ ސްޓެލްކޯއިން ވަރަށްބޮޑު އަހަމިއްޔަތުކަމެއްދޭ ކަމެކެވެ. ސްޓެލްކޯއިން އަންނަނީ މިހާރުވެސް އިއާދަކުރަނިވި ހަކަތައިގެ މަޝްރޫޢުތައް ބައެއް ރަށްރަށުގައި ހިންގަމުންނެވެ. ވ.އަތޮޅު ރަކީދޫއަކީ މިފަދަ އެއް ރަށްކަން ފާހަގަކޮށްލެވެއެވެ.