ފުލުހުން ބުނީ، ގަވައިދާ ޚިލާފަށް ރާއްޖޭގެ ސަރަހައްދުގައި ހަރަކާތްތެރިވަނިކޮށް އަތުލައިގަތް ސްރީލަންކާގެ މަސްބޯޓުން މަސްތުވާތަކެތި ފެނުނު މައްސަލައާއި ގުޅިގެން ހައްޔަރު ކުރި ފަސް ބިދޭސީންގެ ބަންދަށް 30 ދުވަސް ޖަހައިފިއެވެ.

ފުލުހުން ބުނީ އެ މައްސަލައިގައި ހައްޔަރުކުރި ފަސް މީހުން ކަސްޓޯޑިއަލް ޖަލެއްގައި 30 ދުވަހަށް ބަންދުކުރަން ކުޅުދުއްފުށީ މެޖިސްޓްރޭޓް ކޯޓުން އިއްޔެ އަމުރުކޮށްފައިވާ ކަމަށެވެ.

މައްސަލާގައި ބަންދުކުރި ފަސް ބިދޭސީންނަކީ ވެސް ސްރީލަންކާއަށް ނިސްބަތްވާ މީހުންނެވެ. އެއީ؛

• ރާޖަޕަކްޝަ ގެމަގޭ ދެނޫޝަ މަޑުމަލް، 21 އަހަރު

• މުއްތިމާ ޕަޓަބިންދިގޭ އަމިޝްކް ސަންޖީވަ ކުމާރަ، 22 އަހަރު

• ޗަމޮދް ދިވިންގާ ދިލަކާވަ، 22 އަަހަރު

• ވިޖޭވީރަ ގުނަރަތުނާ މަހާވިދޯމާ، 37 އަހަރު

• ލޮރެންސު ހޭވާގީ ސަރަތު، 56 އަހަރު

މިމަހު 24 ވަނަ ދުވަހު ބޭއްވި ނޫސްވެރިންގެ ބައްދަލުވުމުގައި، މި މައްސަލައާއި ގުޅިގެން މައުލޫމާތު ދެއްވަމުން، ކޮމިޝަނަރ އޮފް ޕޮލިސް އަލީ ޝުޖާޢު ވިދާޅުވީ، މިއީ މި މަހުގެ 24ވަނަ ދުވަހު ހދ. މަކުނުދޫ ބޭރުން އަތުލައިގަތް "އަށަންޕުތަ" ނަމަކަށް ކިޔާ ބޯޓުން ހައްޔަރުކުރި މީހުން ކަމަށެވެ.

އަދި އެ ބޯޓުން އަތުލައިގަތް ތަކެތީގެ ޕްރެލިމިނަރީ ނަތީޖާތައް ދައްކާ ގޮތުން އޭގެ ތެރޭގައި 344 ކިލޯގެ މެތު އަދި 124.6 ކިލޯގެ ކޮކެއިން ފެނިފައިވާ ކަމަށާ، އޭގެ މަގުމަތީ އަގު އެއް ބިލިއަނަށް އަރާ ކަމަށް ސީޕީ އަލީ ޝުޖާއު ވިދާޅުވިއެވެ.