ބޭރު ފައިސާއާ ބެހޭ އައު ބިލުގެ ސަބަބުން އާންމު ރައްޔިތުންނަށާއި ވިޔަފާރިވެރިންނަށް ޑޮލަރުގެ ތިޔާގިކަން ލިބިގެންދާނެ ކަމަށް ރައީސް މުޙައްމަދު މުޢިއްޒު ވިދާޅުވެއްޖެއެވެ.

ރައީސް މުޢިއްޒު މިހެން ވިދާޅުވެފައިވަނީ އެކްސްގައި ކުރެއްވި ޕޯސްޓެއްގައިއެވެ.

ރައީސް މުޢިއްޒު ވިދާޅުވި ގޮތުގައި، މި އައު ބިލުގައި 500 ޑޮލަރު މާރުކުރަންޖެހޭ ގޮތަށް އޮތުމަކީ ވަރަށް ރަނގަޅު ކަމެކެވެ. އަދި މިކަމަށްޓަކައި މޯލްޑިވްސް މިވްސް މަނިޓަރީ އޮތޯރިޓީ (އެމްއެމްއޭ) އަށް އެމަނިކުފާނު ޝުކުރު ދެންނެވިއެވެ.

މީގެ އިތުރުން، 2024 ނޮވެމްބަރު 17 ގައި އެމަނިކުފާނު ވިދާޅުވި ފަދައިން، ގަވާއިދު ތަންފީޒުކުރުން ވަރުގަދަ ކުރުމަށްޓަކައި އެމްއެމްއޭ އިން އިސްނަގައިގެން ބޭރު ފައިސާއާ ބެހޭ ޤާނޫނެއް ހެދިގެން ދިއުމަކީ މުހިންމު ކަމެއް ކަމަށް ފާހަގަކުރެއްވިއެވެ.

ރައީސް މުޢިއްޒު ވިދާޅުވި ގޮތުގައި، މި ޤާނޫނުގެ ސަބަބުން ރިސޯޓުތަކަށް އަންނަ ކޮންމެ ޓޫރިސްޓަކަށް 500 ޑޮލަރު މާރުކުރެވިގެންދާނެއެވެ. އަދި ޓޫރިޒަމް ނޫން ދާއިރާތަކުންވެސް ވަކި ވަރަކަށްވުރެ ގިނައިން ޑޮލަރު އާމްދަނީ ލިބޭނަމަ، ޑޮލަރު މާރުކުރަންޖެހޭ ގޮތަށް ހިމަނާފައިވުމުން ބޭންކިންގ ނިޒާމުގައި ދައުރުވާ ޑޮލަރު ކުރިން އަންދާޒާކުރި ވަރަށްވުރެ އިތުރުވެގެންދާނެ ކަމަށް ވިދާޅުވިއެވެ.

މީގެ އިތުރުން، މި ބަދަލުތަކުގެ ނަތީޖާއެއްގެ ގޮތުން، ރައީސް މުޢިއްޒު ހާމަކުރެއްވި ގޮތުގައި އާންމު ރައްޔިތުންނަށާއި ކުދި އަދި މެދު ފަންތީގެ ވިޔަފާރިވެރިންނަށް ޑޮލަރުގެ ތިޔާގިކަން ލިބިގެންދާނެކަމަށްވެސް ވިދާޅުވިއެވެ. މިގޮތުން ރައީސް މުޢިއްޒު ފާހަގަކުރެއްވި ކަންކަމަކީ؛ 

1. 2025 ޖުލައި މަހުން ފެށިގެން، ސަރުކާރުން ހިއްސާވާ ކުންފުނިތަކުން ޕެރަލަލް މާކެޓަށް ނުގޮސް ރަސްމީ ރޭޓުގައި ޑޮލަރު ލިބޭނެ އިންތިޒާމެއް ގާއިމުކުރެވުން

2. 2026 ގެ ފުރަތަމަ ކުއާޓަރގައި، ވެލާނާ އިންޓަނޭޝަނަލް އެއަރޕޯޓުން ފުރާ ކޮންމެ ދިވެއްސަކަށް ލިބޭ 500 ޑޮލަރު ދެގުނަކޮށް 1000 ޑޮލަރަށް އޑޮލަރަށް އިތުރުކުރެވުން.

3. 2026 ގެ ފުރަތަމަ ކުއާޓަރގައި، ކްރެޑިޓް ކާޑު ލިމިޓްތައް ބޮޑުކޮށްދިނުން.

4. 2025 ޖުލައި މަހުން ފެށިގެން، ދިވެހި ވިޔަފާރިވެރިންނަށް ތަކެތި އިމްޕޯޓްކުރުމުގެ ގޮތުން ބޭންކުތަކަށް ޓީޓީ ހެދުމަށް ދޫކުރާ ޑޮލަރުގެ ނިސްބަތް އިތުރުކުރެވުން.

މި ފަދަ އާންމު ރައްޔިތުންނަށް ފައިދާހުރި ކަންކަން ކުރުމަށް ސަރުކާރުން ކުރާ މަސައްކަތަށް ދިވެހި ރައްޔިތުން ދެއްވާ ފުރިހަމަ އެއްބާރުލެއްވުމަށް އެމަނިކުފާނު ޝުކުރު ދެންނެވިއެވެ.