އިންޑިއާގެ ގާނޫނު ހަދާ މަޖިލީހުގެ ފިނި މޫސުމުގެ ސެޝަންއަށް މަރޗެންޓް ޝިޕިންގ ބިލަކާއި ކޯސްޓަލް ޝިޕިންގ ބިލެއް ހުށަހެޅުމަށް އިންޑިއާގެ މައި ސަރުކާރުން ތައްޔާރުވެއްޖެއެވެ.

މިއީ ކޯސްޓަލް ޝިޕިންގ ދާއިރާ ހަރުދަނާކޮށް ކުރިއަރުވައި، އިންޑިއާ ދިދައިގެ ދަށުން ދަތުރުކުރާ އުޅަނދުފަހަރަށް ފަސޭހަކޮށްދިނުމަށް ހެދޭ ގާނޫނުތަކެކެވެ. އިންޑިއާ ސަރުކާރުގެ އޮފިޝަލަކާ ހަވާލާދީ އިކޮނޮމިކް ޓައިމްސްއިން ބުނާ ގޮތުގައި މަރޗެންޓް ޝިޕިންގ ގާނޫނަކީ ބައިނަލްއަގްވާމީ މުއާހަދާތަކާއި އެއްބަސްވުންތަކުގެ ދަށުން އިންޑިއާއިން ދަމަހައްޓަން ޖެހޭ އުސޫލުތަކާއި އަދާކުރަން ޖެހޭ ޒިންމާތައް އަދާކުރުމަށް އެކަށައެޅޭ ގާނޫނެކެވެ. އަދި ކޯސްޓަލް ޝިޕިންގ ގާނޫނަކީ އިންޑިއާގެ އަމިއްލަ ޝިޕިންގ ދާއިރާގެ ވިޔަފާރިއަށް ޚާއްސަކޮށްގެން ހަދާ ގާނޫނެކެވެ.

އާ ގާނޫނުތަކެއް ހެދިޔަސް، އައްސޭރިފަށް އެތައް ހާސް ކިލޯމީޓަރަކަށް ދެމިގެންދާ އިންޑިއާގައި، އެތެރޭގެ އެއް ބަނދަރުން އަނެއް ބަނދަރަށް ކުރެވޭ ވިޔަފާރިތައް ނިސްބަތުން މަދެވެ. އެހެންނަމަވެސް ޖަޕާނާއި ވިލާތުގެ ގައުމުތަކުން، އެއް ބަނދަރުން އަނެއް ބަނދަރަށް އެތެރޭގެ ވިޔަފާރުކުރާ މިންވަރު ވަރަށް ބޮޑުތަނުން އިތުރެވެ.

ކޯސްޓަލް ޝިޕިންގ ބިލުގެ ދަށުން ކޯސްޓަލް ޝިޕިންގ އާއި އިންޑިއާގެ އެތެރޭގެ ކޯރުތަކުގައި މުދާއުފުލަށް ހިންގޭ ވިޔަފާރތައް އެއްކޮށްލެވޭނެ މަގުތައް ފަހިވެގެންދާނެއެވެ. އަދި އެކަމަށް ބޭނުންވާ ސްޓްރެޓެޖިކް ޕްލޭން އެކުލަވާލުމަށާއި، ކޯސްޓަލް ޝިޕިންގެ ޑޭޓާބޭސް އެއް އެކުލަވާލުމަށް ކަމާބެހޭ ފަރާތްތަކަށް މަޖުބޫރު ވާނެއެވެ