ހދ އަތޮޅު ކައުންސިލް މެމްބަރުން އުސޫލާ ހިލާފަށް ހަރަދުކޮށް، ބެންކޮކަށް ކުރި އަގުބޮޑު ދަތުރުން ކައުންސިލްތަކަށް ކުރި މަންފާއެއްނެތްކަމަށް ދައުލަތުގެ އޮޑިޓަރ ޖެނެރަލް ވިދާޅުވެއްޖެއެވެ.

އޮޑިޓަރ ޖެނެރަލް ހުސައިން ނިޔާޒީ ސޮއިކުރައްވައި ނެރުއްވާފައިވާ ހދ އަތޮޅު ކައުންސިލް އިދާރާގެ މިދިޔަ އަހަރުގެ އޮޑިޓް ރިޕޯޓްގައިވާގޮތުން، 2023 ވަނަ އަހަރު ހދ އަތޮޅު ކައުންސިލް އިދާރާއިން ވަނީ 952،885 ރުފިޔާ ހަރަދުކޮށްގެން ތައިލެންޑްގެ ބެންކޮކް ސިޓީއަށް ދަތުރެކޮށްފައެވެ. ތަޖުރިބާ އާއި ތަމްރީނުހޯދުމަށް ކުރި މި ދަތުރުގައި ހދ އަތޮޅު ކައުންސިލްގެ އިދާރާގެ ހުރިހާ މެމްބަރުންނާއި، ސެކްރެޓަރީ ޖެނެރަލް އަދި ސީނިއާ މެނޭޖްމަންޓްގެ ބައެއް މުއައްޒަފުން ހިމެނޭހެން ޖުމްލަ 20 މުއައްޒަފުން ހިމެނެއެވެ.

ޖުމްލަ 10 ދުވަހުގެ މި ދަތުރަށް ތައިލެންޑް ޓްރެއިނިން އިންސްޓިޓިއުޓްގެ ފީ އަދި ކެއުމަށް ޖުމްލަ 535،213 ރުފިޔާ ހަރަދުވިއެވެ

- 20 ބައިވެރިންގެ ދަތުރުގެ ޚަރަދު (2 ދުވަހަށް):  133،229 ރުފިޔާ

- 20 ބައިވެރިންގެ ޕޮކެޓް މަނީ: 46،260 ރުފިޔާ

- 20 ބައިވެރިންގެ ދަތުރު ހަރަދު (މާލެ): 28،000 ރުފިޔާ

- ޑޮމަސްޓިކް ޓިކެޓް ހަރަދު: 72،020 ރުފިޔާ

- އިންޓަރނޭޝަނަލް ޓިކެޓް: 138،163 ރުފިޔާ

މި ދަތުރުގެ މައިގަނޑު މަގްސަދަކީ ކައުންސިލް މެމްބަރުންނާއި އިދާރީ މުއައްޒަފުންގެ ކެޕޭސިޓީ އިތުރުކުރުމާއި، އަތޮޅުގެ ކުރިއެރުމަށް ކުރެވޭނެ ކަންކަމުގައި ތައިލެންޑްގެ އިންވެސްޓަރުން ހޯދުމަށް މަގުފަހިކުރުމުގެ އިތުރުން ގުޑް ގަވަނަންސް އާއި ޕަބްލިކް ޕޮލިސީ އަދި ރޫރަލް ޑިވެލޮޕްމަންޓްގެ ދާއިރާތަކުން ތަޖުރިބާ އާއި މައުލޫމާތު ހޯދުމެވެ. ހދ އަތޮޅު ކައުންސިލް މެމްބަރުން ބެންކޮކަށް ކުރި މި ދަތުރާ ގުޅޭގޮތުން އޮޑިޓަރ ޖެނެރަލް ނެރުއްވި ރިޕޯޓްގައި ވިދާޅުވެފައިވަނީ، އެ ދަތުރުން ކައުންސިލްތަކަށް މަންފާއެއް ކޮށްފައި ނުވާކަމަށެވެ. މިގޮތުން މި ދަތުރު ނިމުނުތާ އަހަރެއް ނިމިފައިވާއިރު، ހދ އަތޮޅުގެ އެއްވެސް ރަށެއްގައި މި ދަތުރުން ހޯދުނު ތަޖުރިބާ އާއި ފަންނީ ކުރިއެރުމުގެ ބޭނުންކޮށްގެން އެއްވެސް މަޝްރޫޢުއެއް ފަށާފައި ނުވާކަމަށެވެ. އެހެންކަމުން އެ ދަތުރުން އެކަށީގެންވާ މަންފާއެއް ކައުންސިލް އިދާރާތަކަށް ލިބިފައިނުވާކަން އޮޑިޓަރ ވަނީ ފާހަގަކުރައްވާފައެވެ.

އޮޑިޓަރޖެނެރަލް ވިދާޅުވީ 2023 ވަނަ އަހަރު ކައުންސިލް އިދާރާއަށް އާމްދަނީގެ ގޮތުގައި ލިބިފައިވާ ފައިސާއިން އަތޮޅުގެ ތަރައްޤިއަށް ނުވަތަ ރައްޔިތުންނަށް ދިގު މުއްދަތަކަށް އޭގެ ފައިދާ ކުރާނޭ ކަންކަމަށް ހަރަދު ކުރުމުގެ ބަދަލުގައި ލިބިފައިވާ ފައިސާގެ ތެރެއިން ބޮޑު އަދަދެއް ބެންކޮކް ދަތުރަށް ހަރަދުކޮށްފައިވާކަމަށެވެ. ކައުންސިލުން މި ދަތުރުކޮށްފައިވަނީ މާލީ ވުޒާރާގެ ހުއްދަ ހޯދުމެއްވެސް ނެތިކަމަށް އޮޑިޓަރ ޖެނެރަލްގެ ރިޕޯޓްގައި ވަނީ ފާހަގަކޮށްފައެވެ.

އޮޑިޓަރ ޖެނެރަލް ވަނީ މިފަދަ ދަތުރުތައް ކައުންސިލްގެ ބަޖެޓުން ކުރުމުގެ ބަދަލުގައި ބޭރުފަރާތްތަކާ މަޝްވަރާކޮށްގެން ސްޕޮންސަރ އެހީގެ ގޮތުގައި އެފަދަ ކަންކަމަށް އެހީތެރިކަން ހޯދުމަށް އެދިފައެވެ. އަދި ބެންކޮކަށް ކުރި ދަތުރަށް ހޭދަވި ހަރަދުތަކަށް ޒިންމާވާ ފަރާތްތަކާމެދު ފިޔަވަޅު އެޅުމަށްވެސް އޮޑިޓަރޖެނެރަލް ވަނީ އެދިފައެވެ.