ރާއްޖެއިން ތައިލެންޑަށް ކަނޑައަޅާފައި ހުންނަ ސަފީރުކަމުގެ މަގާމަށް އިލެކްޝަން ކޮމިޝަނުގެ ކުރީގެ ރައީސް ފުއާދު ތައުފީގް އައްޔަނުކުރުމަށް މަޖިލީހުގެ ހާރިޖީ ގުޅުންތަކުގެ ކޮމިޓީން މިއަދު ފާސްކޮށްފިއެވެ.

ހާރިޖީ ކޮމިޓީން މިގޮތަށް ފާސްކުރީ މިއަދު ބޭއްވި އެ ކޮމިޓީގެ ބައްދަލުވުމުގައި ކޮމިޓީގެ އިއްތިފާގުންނެވެ. މި ބައްދަލުވުމުގައި ފުއާދު އެ މަގާމަށް އައްޔަނުކުރުމަށް 9 މެމްބަރުން ވަނީ އޭނާގެ ޝަރުތު ހަމަވާކަމަށް ނިންމައި ވޯޓުދެއްވާފައެވެ. ތައިލެންޑުގައި ހުންނަވާ ސަފީރަކަށް ފުއާދު އައްޔަނުކުރުމަށް ނަން ހުށަހަޅާފައިވަނީ މިދިޔަ ނޮވެމްބަރުމަހުގެ 25 ވަނަ ދުވަހުއެވެ.

ފުއާދު ތައުފީގު އެންމެފަހުން ހުންނެވީ އިެކްޝަން ކޮމިޝަނުގެ ރައީސްކަމުގެ މަގާމުގައެވެ. ފުއާދު ވަނީ އެ މަގާމު ދެ ދައުރު ފުރިހަމަ ކުރައްވާފައެވެ. 

ފުއާދު ތައުފީގް

ފުއާދު ތައުފީގް އެންމެ ފުރަތަމަ އިލެކްޝަންސް ކޮމިޝަނުގެ މެމްބަރެއްގެ ގޮތުގައި ހުންނެވީ، 2008 ވަނަ އަހަރެވެ. އޭރުއެއީ ރާއްޖެއަށް ސިޔާސީޕާޓީތައް ތައާރަފްވެ، އެންމެފުރަތަމަ ގިނަ ޕާޓީތަކެއް ބައިވެރިވެގެން އިންތިހާބު ބޭއްވި އަހަރެވެ. އެއަށްފަހު ދެން އިެލކްޝަނުގެ މެމްބަރުކަމަށް ފުއާދު ވަޑައިގެންނެވީ 2019 ވަނަ އަހަރެވެ. ފުއާދު ކޮމިޝަނުގެ ރައީސްކަމުގެ މަގާމަށް އައްޔަނުކުރެވުނީ، 2021 ވަނަ އަހަރު އޭރު ކޮމިޝަނުގެ ރައީސަކަށް ހުންނެވި އަހުމަދުޔ ޝަރީފް މަގާމުން އިސްތިއުފާދިނުމުންނެވެ.

ފުއާދު ތައުފީގަކީ އިލެކްޝަންސް ކޮމިޝަނުގައި އެންމެ ގިނަދުވަސްވަންދެން މަސައްކަތްކުރައްވައި އެ ދާއިރާގައި ހުރި ރާއްޖޭގެ އެންމެ ތަޖުރިބާކާރު ބޭފުޅާއެވެ. ގިނަބައެއްގެ މަގުބޫލުކަން ލިބިވަޑައިެގންފައިވާ ފުއާދު ތައުފީގަކީ ތަފާސްހިސާބުގެ އިލްމުން ރާއްޖޭގައި އެންމެ ފުންނާބުއުސް އެއް އިލްމުވެރިޔާއެވެ.