އެމެރިކާގެ ކެލިފޯނިއާގެ އުތުރު ސަރަޙައްދުގައި 7.0 މެގްނިޓިއުޑްގެ ބާރުގަދަ ބިންހެލުމެއް އައިސްފައިވާކަމަށް އެމެރިކާގެ ޖިއޮލޮޖިކަލް ސަރވޭއިން ބުނެފިއެވެ.

މި ބިންހެލުން އައީ ރާއްޖެ ގަޑިން ރޭ ދަންވަރު 12 ޖަހާލާ ކަންހާއިރުއެވެ. ބިންހެލުން އައި ފުރަތަމަ ވަގުތުތަކުގައި ކެލިފޯނިއާގެ އުތުރު ސަރަޙައްދާއި އޮރެގަންގެ ދެކުނު ސަރަޙައްދަށް ސުނާމީގެ އިންޒާރު ދެވުނު ނަމަވެސް، ފަހުން އެ އިންޒާރު ބާޠިލުކުރެވުނެވެ.

ހަމްބޯލްޓް ކައުންޓީގެ ޝެރިފް އޮފީހުން ސީބީއެސް ނިއުސްއަށް މަޢުލޫމާތު ދެމުން ބުނީ، ބިންހެލުމުގެ ސަބަބުން އެއްވެސް މީހަކު މަރުވެފައި ނުވާ ކަމަށާއި، އިމާރާތްތަކަށާއި އިންފްރާސްޓްރަކްޗަރއަށް ބޮޑު ގެއްލުމެއް ލިބިފައި ނުވާ ކަމަށެވެ. ނަމަވެސް ބައެއް ގެތަކަށް ކުދިކުދި ގެއްލުންތައް ވެފައިވާ ކަމަށް އެ އޮފީހުން ބުންޏެވެ.

އަދި ސަރަޙައްދުގެ ގިނަ ފިހާރަތަކުގައި ހުރި ތަކެތި ހަރުތަކުން ވެއްޓި، ކުޑަ ވަގުތުކޮޅަކަށް ކަރަންޓު ކެނޑުނު ކަމަށް ޝެރިފް އޮފީހުން ބުންޏެވެ. ޕަވަރ އައުޓޭޖް ޔޫއެސްގެ މަޢުލޫމާތުން ދައްކާ ގޮތުގައި ބިންހެލުމާ ގުޅިގެން 10،000 އަށްވުރެ ގިނަ މީހުންނަށް ކަރަންޓު ކެނޑިފައިވެއެވެ.

އެމެރިކާގެ ހުޅަނގު ސަރަޙައްދަކީ ބިމުގެ ގިނަ ޓެކްޓޮނިކް ޕްލޭޓްތަކެއް އެއްވާ ސަރަޙައްދަކަށް ވުމުން، އެ ސަރަޙައްދުގައި ބިންހެލުން އައުމަކީ އާންމު ކަމެކެވެ. ނަމަވެސް 7 މެގްނިޓިއުޑްގެ ބާރުގަދަ ބިންހެލުމެއް އައުމަކީ އާންމު ކަމެއް ނޫނެވެ. މިއީ މިއަހަރު ދުނިޔޭގައި އައި 7 މެގްނިޓިއުޑްގެ 9 ބިންހެލުމުގެ ތެރެއިން އެކެވެ.

މި ސަރަޙައްދުގައި ކުރިން ވެސް ބާރުގަދަ ބިންހެލުންތައް އައިސްފައިވެއެވެ. އޭގެ ތެރޭގައި 1994 ވަނަ އަހަރު ލޮސް އެންޖެލެސް ސަރަޙައްދުގެ ނޯތްރިޖްގައި އައި ބިންހެލުން ހިމެނެއެވެ. އެ ބިންހެލުމުގައި ގިނަ އަދަދެއްގެ މީހުން މަރުވެ، ހާހުން މީހުންނަށް އަނިޔާވެ، އިމާރާތްތަކަށާއި އިންފްރާސްޓްރަކްޗަރއަށް ބިލިއަން ޑޮލަރުގެ ގެއްލުން ލިބުނެވެ.