ސީރިއާ މައްސަލަ އަކީ އެމެރިކާއާ ބެހޭ ކަމެއް ނޫން ކަމަށާ އެ މައްސަލައިން ދުރުހެލިވާން ޖެހޭ ކަމަށް އެމެރިކާގެ އިންތިޚާބީ ރައީސް ޑޮނަލްޑް ޓްރަމްޕް ބުނެފިއެވެ.

ޓްރަމްޕް މިހެން ބުނެފައި ވަނީ ސީރިއާގެ އިދިކޮޅު ފަރާތްތަކުން ސަރުކާރުގެ ބާރު ކަނޑުވާލަމުންދާ މި ދަނޑިވަޅުގައި މީސް މީޑިއާގައި ކުރެއްވި ޕޯސްޓެއްގައެވެ.

އެގޮތުން އޭނާ ބުނީ، ހަނގުރާމަވެރިން މިހާރު ސީރިއާގެ ވެރިކަން ކުރާ ސަރަހައްދު ކަމުގައިވާ ދަމަސްކަސްއާ ވަރަށް ކައިރިވެފައިވާ ކަމަށެވެ.

Advertisement

އަދި ޔުކްރެއިންގެ ހަނގުރާމައިގައި ރަޝިއާއަށްވަނީ 600,000 އަށްވުރެ ގިނަ ސިފައިން ގެއްލިފައި ކަމަށާ މިކަމުގެ ސަބަބުން ސީރިއާގެ މައްސަލައަށް އެހީތެރިވުމަށް ރަޝިއާއަށް ދަތިވެފައިވާ ކަމަށް އޭނާ ބުންޏެވެ.

މިއާއެކު އޭނާ ބުނީ،2ސީރިއާގެ މައްސަލަ އަކީ ބޮޑު މައްސަލައެއް ނަމަވެސް އެ ގައުމަކީ އެމެރިކާގެ ރަހުމަތްތެރިއެއް ނޫން ކަމަށެވެ.

"ސީރިއާ މައްސަލަ އަކީ ބޮޑު ހައިޖާނެއް. އެކަމަކު އެއީ (ސީރިއާއަކީ) އަހަރެމެންގެ ރަޙްމަތްތެރިއެއް ނޫން. އެއީ އެމެރިކާއާ ބެހޭ ކަމެއް ނޫން. އެއީ އަހަރެމެންގެ ހަނގުރާމައެއް ނޫން. މިކަން ހިނގާދާނެ ގޮތަކަށް ހިނގަން ދޫކޮށްލާ. އޭގައި ބައިވެރިނުވޭ!"އިނގިރޭސި ބޮޑު އަކުރުން ޓްރަމްޕްގެ ޕޯސްޓްގައި ލިޔެފައި ވެއެވެ.

ސީރިއާގެ ހަނގުރާމަ ފެށުނީ 2011 ވަނަ އަހަރުއެވެ. އޭރުއްސުރެ އެމެރިކާއިން ވަނީ ކުރްދީންގެ އިސްނެގުމުގެ ދަށުން ހިންގާ ސީރިއަން ޑިމޮކްރެޓިކް ފޯސަސް (އެސްޑީއެފް) އަށް އެހީތެރިކަން ފޯރުކޮށްދެމުންނެވެ. ނަމަވެސް މިއީ ޓްރަމްޕްގެ ވެރިކަމުގައި މި އެހީތެރިކަން ހުއްޓާލައިފާނެ ކަމުގެ އިޝާރާތެއް ކަމަށް ބެލެވެއެވެ.

މިދިޔަ ނޮވެމްބަރު 27 ވަނަ ދުވަހު އިދިކޮޅު ފަރާތްތަކުންވަނީ ސަރުކާރުގެ ބާރު އޮތް ސަރަހައްދުތަކަށް ހަމަލާދީ، އެލެއްޕޯ، ހަމާ އަދި ދަރާ ފަދަ ބޮޑެތި ސިޓީތައް ހިފައިފައެވެ. މިހާރު އެ ފަރާތްތައް ވަނީ ވެރިރަށް ދިމާޝްޤުގެ ކައިރިއަށް އާދެވިފައެވެ.

އެއާއެކު ބަޝާރުގެ ވެރިކަން ނިމުނުކަން މިއަދު އިދިކޮޅު ފަރާތްތަކުން ވަނީ އިއުލާން ކޮށްފައެވެ.