ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) އިން އެމެރިކާ ވަކިވުމުގެ މަސައްކަތްތައް އެގައުމުގެ އިންތިޚާބީ ރައީސް، ޑޮނަލްޑް ޓްރަމްޕްގެ ޓީމުން ފަށައިފިއެވެ.
މިކަމާއި ގުޅޭގޮތުން ޑަބްލިއުއެޗްއޯ ކޮލެބޮރޭޓިން ސެންޓަރ އޮން ނޭޝަނަލް އެންޑް ގްލޯބަލް ހެލްތު ލޯ ގެ ޑައިރެކްޓަރ އަދި އެމެރިކާގެ ވޮޝިންޓަން ޔުނިވާސިޓީގެ ޕްރޮފެސަރެއްކަމަށްވާ ލޯރެންސް ގޮސްޓިން ބުނީ، ޓްރަމްޕް ވެރިކަމާއި ހަވާލުވާތާ އެއް ދުވަހުގެ ތެރޭގައި ނުވަތަ ކުޑަ ދުވަސްކޮޅެއްގެ ތެރޭގައި އެމެރިކާއިން ޑަބްލިއުއެޗްއޯ އާއި ވަކިވާނެކަމަށެވެ.
ޑަބްލިޔުއެޗްއޯގެ މެންބަރު ކަމުން އެމެރިކާ ވަކިކުރަން ޓްރަމްޕް ނިންމިކަން ފުރަތަމަ ރިޕޯޓު ކޮށްފައި ވަނީ އިނގިރޭސިވިލާތުގެ ނޫހެއް ކަމުގައިވާ ފައިނޭންޝަލް ޓައިމްސުންނެވެ. ކޮވިޑް-19ގެ ބަލިމަޑުގެ ދުވަސްވަރު އެމެރިކާގެ ރިޔާސީ ގަނޑުވަރު، ވައިޓް ހައުސްގައި ރެސްޕޮންސް ކޯޑިނޭޓަރުގެ މަޤާމު ފުރުއްވާފައިވާ އަޝިޝް ޖާ ވަނީ މިކަން ކަށަވަރުކޮށްދީފައެވެ.
ޓްރަމްޕް ގެ ޓީމުން މިކަމަށް މިހާތަނަށް ރަސްމީ ކޮށް އެއްވެސް ބަހެއް ބުނެފައި ނުވިނަމަވެސް، މިފަދައިން ޓްރަމްޕް ނިންމާފައިމިވަނީ އެ ޖަމިއްޔާ އަށް ގިނަ ފާޑުކިޔުންތަކެއް ކުރިމަތިކުރުވުމަށްފަހުއެވެ. ޓްރަމްޕް ގެ މި ފިޔަވަޅާއިއެކު ބަލިމަޑުކަމާއި ދެކޮޅަށް ބައިނަލްއަގުވާމީ މައިދާނުގައި ކުރެވޭ މަސައްކަތްތަކުން އެމެރިކާ އެކަހެރިވެގެން ދާނެކަން ފާހަގަކޮށްލެވެއެވެ.
އޭނާގެ ވެރިކަމުގައި އެމެރިކާގެ ސިއްހީ ދާއިރާގެ އިސް މަގާމުތަކަށް ވެސް ގެންނާނެކަމަށް ލަފާކުރެވޭ މީހުންނަކީ ވެސް އެ ޖަމިއްޔާއާއި ދެކޮޅަށް ވާހަކަ ދައްކާފައިވާ ފަރާތްތަކެވެ. އޭގެ ތެރޭގައި ވެކްސިނާ ދެކޮޅަށް ވަކާލާތު ކުރާ ރޮބަރޓް އެފް ކެނެޑީ ޖޫނިޔަރ އެގައުމުގެ ސިއްހީ ވަޒީރު ކަމުގެ މަގާމަށް އައްޔަނުކުރުން ހިމެނެއެވެ.
މިއީ ޑަބްލިއުއެޗްއޯއާއި ދުރުވުމަށް ޓްރަމްޕް މަސައްކަތްކުރާ ފުރަތަމަ ފަހަރަށްނުވާއިރު، މީގެ ކުރިން 2020 ވަނަ އަހަރުވެސް ޓްރަމްޕް ވަނީ ޑަބްލިއުއެޗްއޯއިން އެމެރިކާ ވަކިކުރަން މަސައްކަތްކޮށްފައެވެ. އެހެންނަމަވެސް އެފަހަރު، އެމެރިކާގެ މިހާރުގެ ރައީސް ޖޯ ބައިޑެން ވެރިކަމާއި ހަވާލުވެވަޑައިގެންވަނީ މި ނިންމުން އަނބުރާ ގެންގޮސްފައެވެ.
Advertisement
This content is created and paid for by advertisers and does not involve Voice Journalists
