އައު އަހަރަށް ތައްޔާރުވުމުގެ ގޮތުން ޤައުމީ ދިފާއީ ބާރު، އެމްއެންޑީއެފުން ރޭ ހަވާއަރުވަން ފަރިތަކުރުމުން، އާރުޑީސީގެ ކުރީގެ މެނޭޖިންގ ޑިރެކްޓަރު މޫސާ އަލިމަނިކް (ވަޑި މޫކޭ) އެމްއެންޑީއެފަށް ޖޯކު ޖައްސަވައިފިއެވެ.
އައު އަހަރަށް ހަވާއަރުވަން ތައްޔާރުވުމުގެ ގޮތުން އެމްއެންޑިއެފުން ރޭ ވަނީ ހުޅުމާލޭގައި ހަވާއެރުވުމުގެ ހަރަކާތެއް ކުރިއަށް ގެންގޮސްފައެވެ. މި ހަރަކާތް ކުރިއަށްގެންދިޔައީ ފަރިތަކުރުންތަކެއްގެ ގޮތުންނެވެ.
އެމްޑީޕީން ރޭ ބޭއްވި ޖަލްސާގައި މޫކޭ ވަނީ ހަވާއަރުވާތީވެ، އެމްއެންޑީއެފަށް ޖޯކު ޖަހާ މޭރުމަކުން ވާހަކަދައްކަވާފައެވެ. މިގޮތުން ހަވާއެރުވުމަކީ މި ގައުމުގައި ހަމައެކަނި އެމްއެންޑީއެފުން ކުރާ ކަމެއްކަމަށާއި، އެކަމަށްވެސް ފަރިތަކުރުންތަކެއް ބާއްވަން ޖެހޭތޯ މޫކޭ ވަނީ ސުވާލު އުފައްދަވާ އެމްއެންޑީއެފަށް މަލާމާތް ރައްދުވާގޮތަށް ވާހަކަދައްކަވާފައެވެ.
ހަވާއަރުވަން ފަރިތަކުރަން ސިފައިން ނެރުން. ދެންހަމަ އަޅުގަނޑު ކޮސްވޭ.. ސިފައިން ހަވާއަރުވާތާ މިހާރު ވީ އަހަރެއްވީ އިތުރުބަޔަކަށް މިޤައުމުގައި ކުރެވޭކަމެއްނޫން. ކުރާން ހުއްދަ އޮންނަ ކަމެއްވެސް ނޫން. އެކަމު އާއަހަރު ފާހަގަކުރަން ސިފައިން ކުރައްވަންޖެހޭ ކަމަކީ ހަވާއަރުވަން ފަރިތަކުރުން.
މޫސާ އަލިމަނިކް ވިދާޅުވިއެވެ
މި މޭރުމުން ވާހަކަދައްކަވަމުން މޫކޭ ވަނީ ހަވާއެރުވުމަކީ ސިފައިން ފަދަ ގަދަރާ އިއްޒަތް ލިބިގެންވާ ފަދަ މުއައްސަސާއަކުން ކުރަން އެކަށީގެންނުވާ ކަމެއްގެ ގޮތުގައި ސިފަކުރައްވާފައެވެ.
މޫކޭ މިހެން ވިދާޅުވިއިރު، މޫކޭ ނިސްބަތްވެ ވަޑައިގަންނަވާ އެމްޑީޕީ ސަރުކާރުގެ ވެރިކަމުގައިވެސް އެކި މުނާސަބާ ފާހަގަކުރުމުގެ ގޮތުން ސިފައިން ހަވާއެރުވުމުގެ ހަރަކާތްތައް ކުރިއަށް ގެންގޮސްފައިވާކަން ފާހަގަކޮށްލެވެއެވެ.
ހަވާއެރުވުމުގައި ބަޑިބޭސް ބޭނުންކުރާތީވެ އެމްއެންޑީއެފުން އެކަން ކުރަނީ އާއްމުކޮށް އެކަން އިއުލާނުކުރުމަށްފަހުއެވެ. އެއީ ހުރިހާ އެންމެންގެވެސް ސަލާމަތާ ރައްކާތެރިކަމަށްޓަކައެވެ. އެމްއެންޑިއެފްގެ ހުއްދަނެތި، ރާއްޖެއަށް ބަޑިބޭހާއި ފަޓާސް އެތެރެކުރުން މަނައެވެ. އެބާވަތުގެ ތަކެތި އެތެރެކޮށްފިނަމަ ބޮޑެތި އަދަބުވެސް ކަނޑައެޅީފައި އޮވެއެވެ. ތާރީހަށް ބަލާއިރު، 1988 ގެ ކުރިން ބަޑިބޭހާއި ފަޓާސް އެތެރެކުރުމުގެ ހުއްދަ އާއްމުކޮށް އެވެއެވެ.
ރާއްޖޭގައި ހަވާއެރުވުމުގެ ކަންކަން ކުރަނީ ޤައުމީ ދިފާއީ ބާރުންނެވެ. ތަފާތު އެކިއެކި މުނާސަބާތަކާ ގުޅުވައިގެން ހަވާއެރުވުމަކީ ރާއްޖޭގައި މިހާރު ވަރަށް އާއްމު ކަމެކެވެ. އެމްއެންޑީއެފުން ހަވާ އަރުވަނީ ފީއެއް ނަގާގައިގެންނެވެ. މިކަމާ ގުޅިގެން ސިފްކޯއިން މީގެ ކުރިން ބުނެފައިވަނީ، ދިވެހިންގެ ބޭނުމަކަށްނަމަ ހަވާ އަރުވައިދެނީ މިނެޓަކަށް 600 ޑޮލަރާއި 1000 ޑޮލަރާ ދެމެދުގެ އަގުތަކެއްގައި ކަމަށެވެ.
ހަވާއެރުވުމުގެ ހަރަކާތަކީ ހުރިހާ އުމުރުފުރާ ތަކެއްގެ މީހުންގެ މެދުގައި ވަރަށް މަޤްބޫލުކަމެކެވެ. އަދި މިކަމަކީ ޖޯކުޖެހުމަށްވުރެ ބޮޑަށް އެމްއެންޑީއެފަށް ރަނގަޅު އާމްދަނީއެއްވެސް ވަންނަ މަސައްކަތެއްކަން ފާހަގަކޮށްލެވެއެވެ.
Advertisement
This content is created and paid for by advertisers and does not involve Voice Journalists
