ޣައްޒާގައި މިހާރު ޚިދުމަތްދޭ މައި ހޮސްޕިޓަލް، ކަމަލް އަދުވާނަށް އަމާޒުކޮށް ދިން ހަމަލާތަކާއި ގުޅިގެން، އެ ހޮސްޕިޓަލުގެ ހިދުމަތް ހުއްޓިފައިވާކަމަށް ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) އިން ބުނެފިއެވެ.

ޑަބްލިއުއެޗްއޯއިން ބުނީ، އިއްޔެގެ ހަމަލާތަކުގެ އިތުރުން ފާއިތުވި 80 އަށް ވުރެ ގިނަ ދުވަސްތަކުގައި ޔަހޫދީ ފައުޖުން ކެނޑިނޭޅި ދެމުންގެންދާ ހަމަލާތަކުގެ ސަބަބުން ޣައްޒާގެ ސިއްހީ ނިޒާމް ފުޑު ފުޑުވެ، 75,000 މީހުންގެ ފުރާނަ ނުރައްކަލަށް ހުށަހެޅިފައިވާކަމަށެވެ.

މިއާއިއެކު، އެ ޖަމިއްޔާއިން ބުނީ، ހޮސްޕިޓަލުގެ ލެބޯޓަރީ އާއީ ސާޖިކަލް ޔުނިޓްގެ އިތުރުން އޮޕަރޭޝަން ތިއޭޓަރ ހިމެނޭހެން އެތައް ތަނެއް ހަލާކުކޮށް އަންދާފައިވާކަމަށެވެ. އަދި އެތަނުން ފަރުވާ ހޯދަމުންދިޔަ 12 ބަލިމީހަކާއި 1 މުއައްޒަފަކު ހޮސްޕިޓަލް ދޫކޮށް ހިދުމަތް ހުއްޓިފައިވާ ހޮސްޕިޓަލަށް ގެންގޮސް، ސިއްހީ ފަރުވާއިން ވަނީ މަހުރޫމް ކޮށްފައެވެ.

މީގެ އިތުރުންވެސް ޑަބްލިއުއެޗްއޯ އިން ބުނީ، ބައެއް މީހުންގެ އަންނައުނު ބާލުވަން މަޖުބޫރުކޮށް، ދެކުނު ޣައްޒާއަށް ހިނގާފައިދާން ޔަހޫދީން މަޖުބޫރުކޮށްފައިވާކަމަށާއި، މި ހަފްތާގައި ޔަހޫދީ ފައުޖުން ދިން ހަމަލާތަކުގައި ކަމަލް އަދުވާން ހޮސްޕިޓަލުގެ 5 މުއައްޒަފަކު ހިމެނޭހެން 50 މީހުން ޝަހީދުކޮށްލާފައިވާކަމަށެވެ.

އެ ޖަމިއްޔާއިން ބުނީ، ކަމަލް އަދުވާން ހޮސްޕިޓަލް މިހާރު ހުސްކޮށްފައިވާކަމަށާއި، އެ ތަނުން ފަރުވާ ހޯދަމުންދިޔަ ހާލުދެރަ 15 ބަލިމީހުންނާއި، 50 އެހީތެރިން އަދި 20 މުއައްޒަފުން އެހެން ހޮސްޕިޓަލަކަށް ބަދަލުކޮށްފައިވާކަމަށެވެ. މި ހޮސްޕިޓަލަކީ ބަލި މީހުންނަށް ފަރުވާދޭނެ އެކަށީގެންވާ ވަސީލަތްތައް ނެތް ތަނެއްކަން ފާހަގަކޮށް ދުނިޔޭގެ ސިއްހަތު ޖަމިއްޔާއިން ވަނީ އެކަމުގެ ކަންބޮޑުވުން ފާޅުކޮށްފައެވެ.

މިއާއިއެކު، ދުނިޔޭގެ ސިއްހަތު ޖަމިއްޔާއިން އަންނަނީ މިހާރު ބަލިމީހުން ތިބި އިންޑޮނޭޝިއަން ހޮސްޕިޓަލަށް ބޭނުންވާ ވަސީލަތްތައް ފޯރުކޮށްދިނުމުގެ މަސައްކަތް ކުރަމުންކަމަށް އެ ޖަމިއްޔާއިން ހާމަކުރެއެވެ.