ހައްދުފަހަނަ އަޅާފައިވާ އިސްރާއީލުގެ ނިރުބަވެރިންގެ ޙަމަލާތަކުގައި އިއްޔެ އެކަނިވެސް ޣައްޒާގައި މަދުވެގެން 70 މުސްލިމުން ޝަހީދުކޮށްލާފައިވާ ކަން ހާމަކޮށްފައިވަނިކޮށް، އިސްރާއީލަށް 8 ބިލިއަން ޑޮލަރުގެ ހަތިޔާރު ވިއްކުމަށް އެމެރިކާގެ ރައީސް ޖޯ ބައިޑަން ހުށަހަޅައިފިއެވެ. 

އަލްޖަޒީރާގެ ރިޕޯޓުގައިވާ ގޮތުން، އިސްރާއީލުން އިއްޔެ ޣައްޒާގެ އެކި ސަރަޙައްދުތަކަށް ދިން 30 ވަކިވަކި ޙަމަލާތަކުގައި ޝަހީދުވި މީހުންގެ ތެރޭގައި ގިނަ އަދަދެއްގެ ކުޑަކުދިން ހިމެނެއެވެ.

މިފަދަ ދަނޑިވަޅެއްގައި، އެމެރިކާގެ ރައީސް ބައިޑަން، އޭނާގެ ވެރިކަން ނިމުމަށް ދެ ހަފްތާއަށް ވެފައިވަނިކޮށް، އިސްރާއީލުގެ އަސްކަރިއްޔާ އިތުރަށް ވަރުގަދަ ކުރުމަށް ހަތިޔާރު ވިއްކުމަށް ހުށަހެޅުމާއި ގުޅިގެން ބައިނަލްއަޤްވާމީ މުޖުތަމަޢުން އަންނަނީ އެމެރިކާއަށް ފާޑުކިޔުންތައް އަމާޒު ކުރަމުންނެވެ. ނަމަވެސް އެ ފާޑުކިޔުންތަކަށް އެމެރިކާއިން އަޅާލާފައެއް ނުވެއެވެ.

Advertisement

ރިޕޯޓުތަކުގައި ބުނެފައިވާ ގޮތުގައި، އެމެރިކާއިން ވިއްކަން ހުށަހަޅާފައިވާ ހަތިޔާރުތަކުގެ ތެރޭގައި 500 ޕައުންޑު (226 ކިލޯގްރާމް) ގެ ވޯހެޑްތަކާއި، ސީދާ އަމާޒަށް ދަތުރުކުރާ ހަތިޔާރުތަކާއި، އާޓިލަރީ ޝެލްތަކާއި، ޖެޓް އަދި އެޓޭކް ހެލިކޮޕްޓަރުތަކަށް ބޭނުންކުރާ މިސައިލްތަކާއި، ބޮން ފިއުޒްތައް ހިމެނެއެވެ. މީގެ އިތުރުން، ޕްރޮޖެކްޓައިލްތައް އިންޓަރސެޕްޓްކުރުމަށް ބޭނުންކުރާ އެއަރ-ޓު-އެއަރ މިސައިލްތަކެއްވެސް ހިމެނެއެވެ.

އިސްރާއީލުން ފަލަސްތީނުގައި ހިންގަމުންދާ ލާއިންސާަނީ ޖަރީމާތަކަށް އަހަރަކާއި ހަތަރު މަސްދުވަސް ވާންވެފައިވާއިރު އިސްރާއީލުގެ ދިފާޢީ ވަޒީރު އިސްރާއީލް ކަޓްޒް ވަނީ ޤަޠަރުގައި ޙަމާސްއާއެކު ނުސީދާކޮށް މަޝްވަރާތައް ފެށިފައިވާކަން ކަށަވަރުކޮށްދީފައެވެ. މި މަޝްވަރާތަކުގެ މަޤްޞަދަކީ ޣައްޒާގައި ހިފަހައްޓާފައިވާ އިސްރާއީލީ ގައިދީން ދޫކޮށްލުމެވެ.

މިއާއެކު، ލުބުނާނުގެ ޙިޒްބުاللهގެ އިސްވެރިޔާ ނައީމް ޤާސިމް ވަނީ ފާއިތުވި މަހު އެއްބަސްވި ހަނގުރާމަ ހުއްޓާލުމުގެ އެއްބަސްވުމާ ޚިލާފަށް އިސްރާއީލުން ކުރަމުންދާ ޢަމަލުތަކަށް ޖަވާބުދާރީވުމަށް ތައްޔާރަށް ތިބިކަމަށް ބުނެފައެވެ. ލުބުނާނުގައި ހަރަކާތްތެރިވާ އދ.ގެ ސުލްޙަ ބެލެހެއްޓުމުގެ ބާރު (ޔޫނިފިލް) އިން ބުނެފައިވަނީ އިސްރާއީލުގެ މި ޢަމަލުތަކުން ހަނގުރާމަ ހުއްޓާލުމުގެ އެއްބަސްވުން "ނުރައްކަލުގެ ތެރެއަށް ވައްޓާލާ" ކަމަށް ބުނެފައެވެ.

އިސްރާއީލުން ޣައްޒާއަށް ދެމުންދާ ޙަމަލާތަކުގައި 2023 އޮކްޓޯބަރު 7 އިން ފެށިގެން މިހާތަނަށް މަދުވެގެން 45،658 ފަލަސްތީނުގެ މުސްލިން ޝަހީދުވެ، 108،583 މީހުން ޒަޚަމްވެފައިވެއެވެ.