އެމެރިކާގެ ލޮސްއޭންޖަލަސްގެ ވަށައިގެންވާ ސަރަހައްދުތަކުގައި ރޯވަމުންދާ އަލިފާން ކޮންޓްރޯލްނުވެ ހޮލިވުޑް ހިލްސްއާއި ހަމައަށް ފެތުރިއްޖެއެވެ.

ލޮސް އޭންޖަލަސްގެ 5 ސަރަހައްދެއްގައި އަލިފާން ރޯވެފައިވާއިރު، މިހާދިސާތަކުގައި 5 މީހުން މަރުވެ، 1،000 އަށްވުރެ ގިނަ އިމާރާތްވަނީ އަލިފާން ރޯވެ އަނދާފައެވެ.

ލޮސްއޭންޖަލަސްގައި ރޯވެ ފެތުރެމުންދާ އަލިފާން-- ފޮޓޯ: ރޮއިޓާސް

ލޮސްއޭންޖަލަސް ފަޔަރ ޑިޕާޓްމަންޓްގެ ޗީފް ކްރިސްޓިން ކްރައުލީ ވިދާޅުވި ގޮތުގައި، ބުދަ ދުވަހުގެ ހަވީރު ހޮލިވުޑް ހިލްސްގައި އަލިފާން ރޯވާން ފެށުމާ ގުޅިގެން އެ ސަރަހައްދުން މީހުން ހުސްކުރުމަށް އަމުރުނެރެފައިވާއިރު، މި ހާދިސާއާ ގުޅިގެން ލޮސްއޭންޖަލަސް ކައުންޓީގައި ރޯވަމުންދާ އަލިފާނުގެ އަދަދު ވަނީ ހަޔަކަށް އިތުރުވެފައެވެ.

ކަމާބެހޭ އިދާރާތަކުން މައުލޫމާތު ދޭ ގޮތުގައި ރޯވަމުންދާ 6 އަލިފާނުގެ ތެރެއިން އެއް އަލިފާން ފިޔަވައި އެހެން އެއްވެސް އަލިފާނެއް މިހާތަނަށް ކޮންޓްރޯލް ކުރެވިފައެއް ނުވެއެވެ. މީގެ ތެރޭގައި ސިޓީގެ އިރުމަތީ އަދި ހުޅަނގު ފަރާތުގައި ރޯވަމުންދާ ބޮޑު ދެ ހުޅުގަނޑުވެސް ހިމެނޭއިރު، ގަދަ ހޫނާއި، ވައިގެ ސަބަބުން އަލިފާން ނިއްވުމުގެ މަސައްކަތަށް ދަތިވެ، އަލިފާން އިތުރަށް ފެތުރުމަށް ދަނީ މަގުފަހިވަމުންނެވެ.

ލޮސްއޭންޖަލަސްގައި ރޯވެ ފެތުރެމުންދާ އަލިފާން-- ފޮޓޯ: ރޮއިޓާސް

"ސަންސެޓް ފަޔަރ" ގެ ނަން ދީފައިވާ މި އަލިފާންގަނޑު ހޮލިވުޑް ހިލްސްއާއި ހަމައަށް ފެތުރި، މިނެޓުތަކެއްގެ ތެރޭގައި 20 އޭކަރަށް ފެތުރިގެންދިޔައިރު، މި ހާދިސާއާ ގުޅިގެން ލޮސްއޭންޖަލަސް ފަޔަރ ޑިޕާޓްމަންޓުން ވަނީ ހޮލިވުޑް ބުލްވާޑާއި، މަލްހޮލަންޑް ޑްރައިވް، 101 ފްރީވޭއިން އަދި ލޯރަލް ކެނިޔަން ބުލްވާޑުން ފެށިގެން ހުޅަނގަށް އޮތް ސަރަހައްދުގައި ދިރިއުޅޭ މީހުން ސަރަހައްދު ދޫކޮށް ދިޔުމަށް އަންގާފައެވެ.

އަންގާރަ ދުވަހުން ފެށިގެން ލޮސް އޭންޖަލަސްގެ ސަރަހައްދުތަކުގައި ރޯވަމުންދާ މި އަލިފާނުގެ ސަބަބުން 100،000 އަށްވުރެ ގިނަ މީހުން  އެވަކުއޭޓް ކުރުމަށް އަމުރު ނެރެވިފައިވާއިރު، އަލިފާންގަނޑު ފެތުރެމުންދާތީ، އަލިފާން ނިއްވުމުގައި ހަރަކާތްތެރިވާ ފަރާތްތަކަށް އަލިފާން ކޮންޓްރޯލް ކުރުމަށް އަންނަނީ ބޮޑެތި ގޮންޖެހުންތަކަކާއި ކުރިމަތިލާން ޖެހެމުންނެވެ.