ސީ އެމްބިއުލާންސްގެ ހިދުމަތް އިތުރަށް ފުޅާކުރުމުގެ މަސައްކަތްކުރައްވާނެކަމަށް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ވިދާޅުވެއްޖެއެވެ.

ރައީސް ޑރ.މުޢިއްޒު މިފަދައިން ވިދާޅުވީ، ގއ.ދެއްވަދޫ ރައްޔިތުންނާއި ބައްދަލުކުރައްވައި ވާހަކަފުޅު ދައްކަވަމުންނެވެ.

މިގޮތުން ރައީސް ޑރ.މުޢިއްޒު ވިދާޅުވީ، ދެއްވަދޫ އަކީ ދުރުގައި ވަކިން އޮންނަ ރަށަކަށް ވާތީ އެރަށަށް ސީ އެމްބިއުލަންސްގެ ހިދުމަތް ފޯރުކޮށްދިނުމަކީ ދަތިކަމެއްކަމަށާއި، ޖުމްލަކޮށް މުޅި ރާއްޖޭގައި ވެސް އެކަހެރިކޮށް ހުންނަ ރަށްތަކަށް ދަތުރުފަތުރު ކުރުމުގައި ހުރި އުދަނގޫތަކާއި ފްލީޓް ބޮޑުނުވުމުގެ ސަބަބުން މި ހިދުމަތް ފޯރުކޮށްދިނުމުގައި ދަތިތަކެއް އެބަހުރިކަމަށެވެ.

Advertisement

ދެއްވަދޫއެކޭ އެއްފަދައިން ރާއްޖޭގެ އެކި ކަންކޮޅުތަކުގައިވެސް ސީ އެމްބިއުލާންސް އިތުރުކުރަން ޖެހޭ ސަރަހައްދުތައް ހުރިކަން ފާހަގަކުރައްވާ ރައީސް ޑރ.މުޢިއްޒު ވިދާޅުވީ، މުޅި ރާއްޖެއަށް މި މައްސަލަ ހައްލުކުރުމުގެ މަސައްކަތްތަކެއް ފައްޓަވާނެކަމަށެވެ.

ރައީސް ޑރ.މުޢިއްޒު ވިދާޅުވީ، މި ހިދުމަތާއި ގުޅިގެން މުޅި ރާއްޖެއަށް އެކަށީގެންވާ ހައްލެއް ގެނައުމުގެ މަސައްކަތްތަކެއް ސަރުކާރުން މިހާރު ފަށާފައިވާކަމަށެވެ.