ރިޝްވަތު ދިނުމާއި އެކަން ސިއްރު ކުރުމުގެ ކުށް ސާބިތުވި ނަމަވެސް އެމެރިކާގެ އިންތިހާބީ ރައީސް، ޑޮނަލްޑް ޓްރަމްޕަށް އަދަބު ނުދިނުމަށް ނިންމައި، އެގައުމުގެ ފަނޑިޔާރަކު ހުކުމް އިއްވައިފިއެވެ.

ޓްރަމްޕް އެއްވެސް ޝަރުތެއް ނެތި މިނިވަންކުރުމުގެ ޙުކުމް އިއްވާފައިވާއިރު، މިއީ އެމެރިކާގެ ކުރީގެ ރައީސަކަށް ކުރެވުނު ފުރަތަމަ ޖިނާއީ މައްސަލައިގެ ނިމުމެވެ.

ޓްރަމްޕަށް އެއްވެސް އަދަބެއް، އެއީ ޖަލު ޙުކުމެއް ނުވަތަ ޖޫރިމަނާއެއް ވިޔަސް ނުދިނުމަށް ހުކުމްކުރި ނަމަވެސް އޭނާ މަޤާމާ ޙަވާލުވާނީ ޖިނާއީ ކުށެއްގެ ޙުކުމެއް އޮވެގެން މަޤާމާ ޙަވާލުވާ ފުރަތަމަ އެމެރިކާގެ ރައީސްގެ ގޮތުގައެވެ.

Advertisement

ވީޑިއޯ ކޯލް މެދުވެރިކޮށް މައްސަލައިގެ ޝަރީއަތުގައި ބައިވެރިވި ޓްރަމްޕް ވަނީ އޭނާގެ މައްޗަށް އުފުލާފައިވާ ދައުވާއާއި ދެކޮޅު ހައްދަވައި، އޭނާ މުޅިން މައުސޫމް ކަމަށް ބުނެފައެވެ. ޓްރަމްޕް ބުނިގޮތުގައި، ޢަދުލު އިންޞާފުގެ ނިޒާމު 'ހަތިޔާރަކަށް' ބަދަލުކުރެވިފައިވާ ކަމަށާއި މެންހެޓަންގެ ޑިސްޓްރިކްޓް އެޓަރނީ އަލްވިން ބްރެގް މި މައްސަލަ ހުށަހަޅާފައިވަނީ ސިޔާސީ ބޭނުމަށް ކަމަށެވެ.

މިއީ 2016 ވަނަ އަހަރު، އިންތިހާބުގެ ދުވަސްވަރު، އޮރިޔާން ކާޑު އުފައްދާ މީހެއް ކަމަށްވާ ސްޓޯމީ ޑެނިއަލްސް ހަނު ހުރުމަށް ޝަރުތުކޮށް 130،000 ޑޮލަރު ދިނުމާއި ގުޅިގެން ޓްރަމްޕް ގެ މައްޗަށް ކޮށްފައިވާ ދައުވާއެކެވެ.

އެއަށްފަހު އެއަހަރު އެމެރިކާގެ ރައީސްކަމަށް ހޮވުމުން އޭނާ ވަނީ މިއީ ލީގަލް އެކްސްޕެންސް ކަމަށް ރިކޯޑްކޮށް އެކަން ފޮރުވާފައެވެ.

މި މައްސަލައާއި ގުޅިގެން ކޮށްފައިވާ ދައުވާ ޓްރަމްޕްގެ މައްޗަށް މިދިޔަ އަހަރުގެ މެއި މަހު ސާބިތުވެފައިވިނަމަވެސް، އެކި އެކި ސަބަބުތަކާއި ހުރެ ހުކުމް އިއްވުން ވަނީ ލަސްކުރެވިފައެވެ. 

މި ދައުވާ ހިމެނޭހެން އިތުރު 4 ދައުވާއެއް ޓްރަމްޕްގެ މައްޗަށް ކުރި ނަމަވެސް، ކޯޓު މަރުހަލާއަށް ގޮސްފައިވަނީ މި ދައުވާ އާއި ގުޅޭ މައްސަލަ އެކަންޏެވެ.