އެމެރިކާގެ ލޮސް އޭންޖަލަސްގައި ކޮންޓްރޯލްނުވެ ފެތުރެމުންދާ އަލިފާނާއި ގުޅިގެން އެ ސަރަހައްދުގައި ސިއްހީ ނުރައްކާތެރި ހާލަތު އިއުލާނުކޮށްފިއެވެ.

ޔުނައިޓެޑް ސްޓޭޓްސްގެ ޑިޕާޓްމަންޓް އޮފް ހެލްތް އެންޑް ހިއުމަން ސަރވިސަސް (އެޗްއެޗްއެސް) ޢާންމު ސިއްހަތުގެ ކުއްލި ނުރައްކަލުގެ ހާލަތު އިޢުލާނުކޮށްފަައިވާއިރު، މި އަލިފާނުގެ ހާދިސާތަކުގެ ސަބަބުން ލޮސް އެންޖެލެސްގެ އިރުމަތީ އަދި ހުޅަނގު ފަރާތުގެ ގިނަ ސަރަހައްދުތަކަކަށް ވަނީ ވަރަށް ބޮޑެތި ގެއްލުންތަކެއް ލިބިފައެވެ.

އަލިފާނުގެ ހާދިސާތަކުގައި މިހާތަނަށް 11 މީހުން މަރުވެފައިވާއިރު، ގާތްގަނޑަކަށް 10،000 އިމާރާތް ވަނީ ހަލާކުވެފައެވެ. އަދިވެސް އަލިފާންގަނޑު ކޮންޓްރޯލްނުވެ ފެތުރެމުންދާތީ މިއަދަދުތައް މައްޗަށް ދާނެކަމަށް ވަނީ ލަފާކޮށްފައެވެ.

އެޗްއެޗްއެސް އިން ބުނީ، މި އިޢުލާނުގެ ސަބަބުން ސެންޓަރސް ފޯ މެޑިކެއަރ އެންޑް މެޑިކެއިޑް ސަރވިސަސް (ސީއެމްއެސް) ގެ ސިއްހީ ޚިދުމަތްދޭ ފަރާތްތަކާއި ސަޕްލަޔަރުންނަށް މެޑިކެއަރ އަދި މެޑިކެއިޑް އިންޝުއަރެންސް ޕްލޭންތަކުގެ ދަށުން ރަޖިސްޓްރީވެފައިވާ މީހުންގެ ކުއްލި ސިއްހީ ބޭނުންތައް ފުއްދުމުގައި އިތުރު ލުއިފަސޭހަކަން ލިބިގެންދާނެކަމަށެވެ.

އެޗްއެޗްއެސް އިން ބުނެފައިވާ ގޮތުގައި އެޑްމިނިސްޓްރޭޝަން ފޯ ސްޓްރެޓެޖިކް ޕްރިޕެއަރޑްނެސް އެންޑް ރެސްޕޮންސް (އޭއެސްޕީއާރު) އިން ވަނީ އެގައުމުން އެދިއްޖެ ހާލަތެއްގައި އެހީތެރިވާނެ މީހުންނާއި މެޑިކަލް އާލާތްތަކާއި ސާމާނު ފޮނުވުމަށް ތައްޔާރުވެފައެވެ.

މި ކާރިސާއާއި ގުޅިގެން އެމެރިކާގެ ރައީސް ޖޯ ބައިޑެން ވަނީ ކުރިއަށް އޮތް 6 މަސް ދުވަހުގެ ތެރޭގައި އެސަރަހައްދު އަލުން އާރާސްތުކުރުމުގެ މަސައްކަތްތަކަށް ހިނގާ ޚަރަދު އެމެރިކާގެ ސަރުކާރުން ދޭނެ ކަމަށް ވިދާޅުވެފައެވެ. އަދި އަލިފާން ނިއްވުމަށާއި އަލުން އާރާސްތުކުރުމަށް ބޭނުންވާ ވަސީލަތްތައް ކެލިފޯނިއާއަށް ފޯރުކޮށްދޭނެ ކަމުގެ ޔަގީންކަންވެސް ބައިޑެން ވަނީ ދެއްވާފައެވެ.