މޯލްޑިވްސް ބްރޮޑްކާސްޓިންގ ކޮމިޝަނުގެ މެމްބަރުކަމަށް އިހަވަންދޫ ދާއިރާގެ ކުރީގެ މެމްބަރު މުހައްމަދު އަބްދުالله (މުހައްމާ) އަދި ބްރޮޑްކޮމްގެ ކުރީގެ މެމްބަރު އާމިނަތު ސަރާހަތު އިއްޒަތު އައްޔަނު ކުރުމަށް ރައްޔިތުންގެ މަޖިލީހުން ފާސްކޮށްފިއެވެ.

ދައުރުން ބޭރުން މިއަދު ބޭއްވި ޖަލްސާގައި ވަނީ، ބްރޯޑްކޮމްއަށް މެންބަރުން އައްޔަނު ކުރުމާ ގުޅޭގޮތުން މިނިވަން މުއައްސަސާތަކާއި ބެހޭ ކޮމިޓީން އެކުލަވާލި ރިޕޯޓުގައިވާ ނަންތަކަށް ވޯޓަށް އަހާފައެވެ.

އެގޮތުން ނެގި ވޯޓުގައި ސަރާހަތު އެ މަޤާމަށް އައްޔަނު ކުރުމަށް ފެންނަކަމަށް 68 މެމްބަރަކު ދެއްވާފައިވާއިރު މުހަންމާ އެ މަޤާމަށް އައްޔަނު ކުރުމަށް ފެންނަކަމަށް 58 މެމްބަރަކު ވޯޓު ދެއްވިއެވެ. 

ބްރޯޑްކޮމްގެ ދެ މެންބަރެއްގެ ދައުރު މިދިޔަ މަހު ހަމަވެފައިވާއިރު, އެ މަގާމަށް ކުރިަމތިލުމަށް ހުޅުވާލުމުން 12 ބޭފުޅަކު ކުރިމަތިލެއްވިއެވެ. ކޮމިޝަނަށް މެންބަރުން އައްޔަން ކުރުމަށް ރައީސް ޑރ. މުހައްމަދު މުއިއްޒު މަޖިލީހަށް ނަން ފޮނުއްވި އިރު, ލިސްޓު އޮތީ އެމަނިކުފާނު އިސްކަން ދެއްވާ ތަރުތީބުންނެވެ.

އެގޮތުން އެ ލިސްޓުގައި އެންމެ ކުރީގައި އޮތީ މުހައްމާ އަދި އިބްރާހިމް މުއާޒު އަލީ (މުއާ)ގެ ނަމެވެ.

އެހެންނަމަވެސް ފަހުން މިނިވަން މުއައްސަސާތަކާއި ބެހޭ ކޮމިޓީން އެ ބޭފުޅުންނާ އިންޓަވިއު ކުރުމަށްފަހު އާންމު ކުރި ރިޕޯޓުގައި 89 ޕަސެންޓާ އެކު އެ ލިސްޓުގެ ކުރީގައި އޮތީ ކޮމިޝަންގެ މެމްބަރުކަން ކުރިން ވެސް ކުރެއްވި އާމިނަތު ސަރާހަތު އިއްޒަތެވެ. އަދި ލިސްޓުގެ ދެވަނައިގައި އޮތީ ތަޖުރިބާކާރު  ނޫސްވެރިޔާ ޝިފްޒާ މުސްތަފާއެވެ.

އިންޓަވިއުއަށް ފަހު މުހައްމާ ލިސްޓުގެ ތިންވަނަ ވެއްޓިފައިވާއިރު, މުއާޒުގެ ނަން ވަނީ ކޮމިޓީގެ ލިސްޓުން ކަޓާފައެވެ. ބްރޯޑްކޮމް އަށް އައްޔަންކުރަން ގާބިލް ކަމަށް ކޮމިޓީން ބަލާފައި ވަނީ 75 ޕަސެންޓަށްވުރެ މަތިން މާކްސް ލިބިވަޑައިގަތް ބޭފުޅުންނެވެ. މުއާޒުއަށް 68 މާކްސް ލިބިފައިވާތީ ތަޅުމަށް ފޮނުވާ ނަންތަކުގެ ލިސްޓުން އޭނާގެ ނަން ވަނީ ކަޓައިފައެވެ.