މިދިޔަ އަހަރުގެ އޮކްޓޫބަރު މަހުގެ 7 ވަނަ ދުވަހުން ފެށިގެން ޔަހޫދީ ޣައިއު ގާނޫނީ ދައުލަތް، އިސްރާއީލުން ޣައްޒާގައި ހިންގަމުން އަައި ގަތުލުއާއްމު ހުއްޓާލުމަށް އެއްބަސްވުމަށްފަހުވެސް ޔަހޫދީ ފައުޖުން ޣައްޒާއަށް ހަމަލާދީފިއެވެ.

އަލް ޖަޒީރާއިން ރިޕޯޓްކޮށްފައިވާގޮތުގައި، ހަނގުރާމަ ހުއްޓާލުމަށް ހަމާސާއި އިސްރާއީލުން އެއްބަސްވިކަން އިއުލާނުކުރި ފަހުންވެސް ޔަހޫދީ ފައުޖުން ވަނީ ޣައްޒާއަށް ހަމަލާދީ 40 މީހުން ޝަހީދުކޮށްލާފައެވެ.

މިގޮތުން، ރޭގައި ޣައްޒާގެ އުތުރުގައި އޮންނަ ޣައްޒާ ސިޓީގެ އިންޖިނިއަރުންގެ ޔޫނިއަން ޢިމާރާތާއި ކައިރީގައި ހުރި ގެއަކަށް ދިން ހަމަލާއެއްގައި  18 މީހުން ޝަހީދުވެފައިވާކަމަށާއި، ޣައްޒާ ސިޓީގެ ޝައިޚް ރިޟްވާން ސަރަޙައްދުން 12 މީހުންގެ ހަށިގަނޑު ނަގާފައިވާ ކަމަށް އަލް ޖަޒީރާއިން ރިޕޯޓްކޮށްފައިވެއެވެ.

މިއާއިއެކު ޣައްޒާގެ މެދު ތެރޭގައި ހުންނަ ބުރައިޖް ކޭމްޕްގެ ކަރަޖް ސަރަޙައްދުގައި އެއްވެ ތިބި ބަޔަކަށް އިސްރާއީލީ ޑްރޯނަކުން ދިން ހަމަލާއެއްގައި 5 މީހުން ވަނީ ޝަހީދުކޮށްލާފައެވެ. ޔަހޫދީން ޣައްޒާއަށް ހަމަލާދޭން ފަށާފައިވަނީ،  އިސްރާއީލާއި ހަމާސްއާ ދެމެދު ހަނގުރާމަ ހުއްޓާލުމުގެ އެއްބަސްވުމަކަށް އައިސްފައިވާކަމުގެ ޚަބަރު ލިބުމުން އެކަމާއި އުފާފާޅުކުރުމަށްފަހު އާއްމުން އަނބުރާ އެމީހުންގެ ޓެންޓުތަކަށް ދިޔުމުންނެވެ.

އަލް ޖަޒީރާއިން ރިޕޯޓްކުރާ ގޮތުގައި، ގަތުލުއާއްމު ހުއްޓާލުމުގެ އެއްބަސްވުމަށް އަމަލު ކުރުމަށް ހަމަޖެހިފައިވަނީ އަންނަ ހަފްތާގެ އާދިއްތަ ދުވަހު ކަމަށްވާތީ، ޣައްޒާގެ ރައްޔިތުން އަދިވެސް ތިބީ ޔަހޫދީ ފައުޖުގެ ނިރުބަވެރި ހަމަލާއެއް އަތުވެދާނެކަމުގެ ބިރުވެރިކަމުގެ ތެރޭގައެވެ.