އިސްރާއީލުން ފަލަސްތީނުގެ ޣައްޒާއަށް ދެމުންގެންދާ ހަމަލާތައް ހުއްޓާލުމަށް ހަމާސް ޖަމާއަތާއި އިސްރާއީލް ސަރުކާރާ ދެމެދު އެއްބަސްވުމަކަށް އާދެވުނުކަމަށް މީޑިއާތަކުން ވަނީ ރޭގެ ވަގުތެއްގައި ރިޕޯޓްކޮށްފައެވެ. ދެފަރާތުން ހަމަލާތައް ބަދަލުކުރުން ހުއްޓާލުމުން ޔަހޫދީންނަށް މާލީ ގޮތުންނާއި ހަތިޔާރުގެ ގޮތުން ވާގިވެރިވަމުން އަންނަ އެމެރިކާއިން ވަނީ އެކަމަށް މަރުހަބާކިޔާފައެވެ. އެއާއެކު ފަލަސްތީނަށް ތާއީދުކުރާ ފަރާތްތަކުންވެސް ވަނީ އެކަމަށް މަރުހަބާކިޔާފައެވެ.

ފަލަސްތީނުގެ މިނިވަންކަމަށް މަސައްކަތްކުރަމުންދާ ހަމާސް ޖަމާއަތާއި އިސްރާއީލް ސަރުކާރާ ދެމެދު ހަނގުރާމަ ހުއްޓާލުމަށް  އެއްބަސްވުމަކާ ހަމަޔަށް ދިޔައީ ގަތަރުން މެދުވެރިއެއްގެ ރޯލުއަދާކޮށްގެން ކުރި މުއާމަލާތްތަކަށްފަހުއެވެ. ހަމާސް އަދި އިސްރާއީލްގެ އޮފިޝަލުންގެ މެދުގައި ވެވުނު އެއްބަސްވުމުގައި ދެފަރާތުގެ ބެލުމުގެ ދަށުގައި ތިބި އަސީރުން ދޫކޮށްލުމަށް އެއްބަސްވެފައިވާކަމަށް އޭއެފްޕީން ވަނީ ރިޕޯޓްކޮށްފައެވެ. އަދި އިސްރާއީލްގެ ބޮޑެތި މީޑިއާތަކުންވެސް ވަނީ އެގޮތަށް ހަބަރުތައް ރިޕޯޓްކޮށްފައެވެ.

ދެފަރާތުގެ ދެމެދުގައި ހަމަލާތައް ބަދަލުކުރުން ހުއްޓާލުމަށް އެއްބަސްވާން ނިންމާފައިވަނިކޮށް މިއަދު އިސްލާއީލްގެ ބޮޑުވަޒީރު ބެންޖަމިން ނަތަންޔާހޫގެ އޮފީހުންވަނީ އެއްބަސްވުމަށް އަމަލުކުރުމާ ގުޅޭގޮތުން ކެބިނެޓްގައި މިއަދު ނަގަން ހަމަޖެހިފައި އޮތް ވޯޓް ހުއްޓުވާފައެވެ. ނަމަވެސް ވޯޓު ހުއްޓާލި ސަބަބެއް އަދި ސާފެއް ނުވެއެވެ. 

ހަމަލާތައް ބަދަލުކުރުން ހުއްޓާލުމަށް އެއްބަސްވިކަން އިއުލާނުކުރުމަށްފަހުވެސް ނިރުބަވެރި ސިފައިން ވަނީ، ޣައްޒާއަށް ހަމަލާތަކެއް ފޮނުވާލާފައެވެ. އިސްރާއީލުން މިފަހަރު ފަލަސްތީނުގެ އާއްމުރައްޔިތުންނާ ދެކޮޅަށް ދޭންފެށި ހަމަލާތަކަށް 15 މަސް ވެފައިވާއިރު، ހަމަލާތަކުގައި މިހާތަނަށް 46،000 ހާހަށްވުރެ ގިނަ މީހުން ޝަހީދު ކޮށްލާފައިވާއިރު، އެތައްހާސްބަޔަކު ވަނީ ގެދޮރުން ނެރެލާފައެވެ.

ދެފަރާތުގެ ދެމެދުގައި ބަދަލުކުރަމުންދާ ހަމަލާތައް ގޯސްވާ ކޮންމެ ފަހަރަކުވެސް އިސްރާއީލުން ހަމަލާތައް ހުއްޓާލުމުގެ ވާހަކަތަކަށް އެއްބަސްވެއެވެ. ނަމަވެސް ކޮންމެ ފަހަރަކުވެސް ކޮންމެސް ހުއްޖަތެއް ދެއްކުމަށްފަހު އިސްރާއީލުން ފަލަސްތީނަށް އަނެއްކާވެސް ހަމަލާތައްދޭން ފަށައެވެ. އިސްރާއީލުން ބައިނަލްއަޤްވާމީ މުއާހަދާތަކާ ހިލާފަށް ހިފާފައިވާ ފަލަސްތީނުގެ ބިންތަކުން ފޭބުމަށް ބައިނަލްއަޤްވާމީ އެކިއެކި ފޯރަމްތަކުގައި ގޮވާލަމުންދިޔަ ނަމަވެސް އިސްރާއީލުން އެއްވެސް އަޑެއް އަހާފައެއް ނުވެއެވެ.