ހައްދުފަހަނައަޅާފައިވާ ޔަހޫދީންގެ ޣައިރު ގާނޫނީ ދައުލަތް، އިސްރާއީލުގެ ސަލާމަތީ ކަންކަމާއި ބެހޭ ކެބިނެޓުން، ޣައްޒާގައި ހިންގަމުންދާ ގަތުލުއާއްމު ހުއްޓޫލުމުގެ އެއްބަސްވުން ފާސްކޮށްފިއެވެ.

މިދިޔަ އަހަރުއްސުރެ 460 އަށް ވުރެ ގިނަ ދުވަސްވަންދެން ޣައްޒާގައި ޔަހޫދީން ހިންގަމުން އަންނަ ލާއިންސާނީ އުދުވާނުގެ ސަބަބުން 46,788 ޝަހީދުވެފައިވާއިރު، ހަމާސް އިންވެސް އެއްބަސްވެފައިވާ ހަނގުރާމަ ހުއްޓާލުމުގެ އެއްބަސްވުން ފާސްކުރިކަންހާމަކޮށް، އިސްރާއީލުގެ ބޮޑުވަޒީރު، ބެންޖަމިން ނަތަންޔާހޫގެ އޮފީހުން ނެރުނު ބަޔާނެއްގައި ބުނީ، 6 ގަޑިއިރަށް ވުރެ ގިނަ ވަގުތަށް ދިގުދެމިގެންދިޔަ ބައްދަލުވުމަކަށްފަހު އިސްރާއީލުގެ ސަރުކާރުން މި އެއްބަސްވުން ތަސްދީގުކުރުމަށް ނިންމާފައިވާކަމަށެވެ.

މިއެއްބަސްވުމަށް އަމަލީ ސިފަ އާދިއްތަ ދުވަހު އަންނާނެކަމަށް އެ ބަޔާނުގައި ބުނެފައިވާއިރު، މީޑިއާ ރިޕޯޓްތައް ބުނާ ގޮތުގައި، މި އެއްބަސްވުން ތަސްދީގު ކުރުމަށް ނިންމީ ޔަހޫދީ ސަރުކާރުގެ 24 ވަޒީރުން ވޯޓާއިއެކުއެވެ. މި އެއްބަސްވުމާއި ދެކޮޅަށް 8 ވަޒީރަކު ވަނީ ވޯޓު ދީފައެވެ.

މި އެއްބަްވުމުގެ ދަށުން ޔަހޫދީން ރަހީނުކޮށްފައިވާ 737 ފަލަސްތީނު ރައްޔިތުންރގެ ލިސްޓެއް ނެރެފައިވާއިރު، މީގެ ތެރޭގައި  ހަމާސް، ފަލަސްތީނު އިސްލާމިކް ޖިހާދު، އަދި ފަލަސްތީނު އޮތޯރިޓީގެ ވެރިކަން ކުރާ ފަތަހް ހަރަކާތުގެ މެމްބަރުންވެސް ހިމެނެއެވެ.

މިކަމާއި ގުޅޭގޮތުން އަލް ޖަޒީރާއިން ރިޕޯޓްކުރާ ގޮތުގައި، 42 ދުވަހުގެ ތެރޭގައި ހަމާސްއިން ހައްޔަރުކުރި 33 ޔަހޫދީން ދޫކޮށްލާއިރު، ޔަހޫދީ ފައުޖުން ރަހީނު ކުރި 1,700 ފަލަސްތީނު ރައްޔިތުން ދޫކޮށްލެވޭނެއެވެ.

މިކަމާއި ގުޅޭގޮތުން، ހަނގުރާމަ ހުއްޓާލުމުގެ މަޝްވަރާތަކުގައި އެމެރިކާގެ ފަރާތުން އިސްކޮށް އުޅުނު މެދުވެރިއެއް ކަމަށްވާ ބްރެޓް މެކްގަރކް ބުނީ، އާދިއްތަ ދުވަހުގެ ހެނދުނު މި އެއްބަސްވުމަށް އަމަލު ކުރަން ފެށޭނެކަމަށާއި، އެދުވަހުގެ މެންދުރުފަހުގެ ވަގުތެއްގައި  ރެޑް ކްރޮސް މެދުވެރިކޮށް 3 މީހަކު އިސްރާއީލަށް ފޮނުވާލެވޭނެކަމަށެވެ. 

މިދިޔަ ހަފްތާގެ ބުދަ ދުވަހު، ހަނގުރާމަ ހުއްޓާލުމަށް އެއްބަސްވުމަކަށް އައިސްފައިވާކަން އިއުލާނު ކުރި ނަމަވެސް، ނިރުބަވެރި ޔަހޫދީން ޣައްޒާއަށް މެދުކެނޑުމެއްނެތި ހަމަލާ ދެމުން އަންނައިރު، މި ހަމަލާތަކުގައި 120 މީހުން ވަނީ މިހާތަނަށް ޝަހީދުވެފައެވެ.