މިދިޔަ ޑިސެމްބަރު މަހު ވަޒީރުންގެ މަޖިލީހަށް ގެނައި ބަދަލާއެކު ރައްޔިތުން މަޖިލީހުގެ ކަމާބެހޭ ކޮމިޓީއަށް ރުހުން ހޯދަން ފޮނުވި  ހަތަރު ވަޒީރުންނަށް ރުހުންދޭން ކޮމިޓީން ފާސްކޮށްފިއެވެ.

މަޖިލީހުގެ ސަރުކާރު މަސްއޫލިއްޔަތު އަދާކުރާ މިންވަރު ބަލާ ކޮމިޓީއަށް ރުހުން ހޯދުމަށް ފޮނުވާފައިވަނީ, މިދިޔަ ބްރާސްފަތިދުވަހު  ބޭއްވި ޖަލްސާއިންނެވެ. މިއަދު ބޭއްވި ކޮމިޓީ ބައްދަލުވުމުގައި ހުރިހާ މެމްބަރުންގެ އިއްތިފާގުން ވަނީ 4 ވަޒީރުންނަށް ރުހުން ދިނުަމަށް ފާސްކޮށްފައެވެ.

1. މިނިސްޓަރ އޮފް ފިނޭންސް އެންޑް ޕްލޭނިންގ ކަމަށް، ތ. ބުރުނި، ނިވައިދޮށުގެ މޫސާ ޒަމީރު

2. މިނިސްޓަރ އޮފް ހަޔަރ އެޑިޔުކޭޝަން، ލޭބަރ އެންޑް ސްކިލްސް ޑިވެލޮޕްމަންޓް ކަމަށް، މއ. ވެނީލާގެ ޑޮކްޓަރ ޢަލީ ޙައިދަރު އަޙްމަދު

3. މިނިސްޓަރ އޮފް އެގްރިކަލްޗަރ އެންޑް އެނިމަލް ވެލްފެއަރ ކަމަށް، މއ. މާރާދަގެ ޑޮކްޓަރ މަރްޔަމް މާރިޔާ

4. މިނިސްޓަރ އޮފް ކޮންސްޓްރަކްޝަން، ހައުސިންގ އެންޑް އިންފްރާސްޓްރަކްޗަރ ކަމަށް، ގދ. ފިޔޯރީ، ގުލްބަކާގެ، ޑޮކްޓަރ ޢަބްދުالله މުއްޠަލިބް

ރައީސުލްޖުމްހޫރިއްޔާ ޑރ.މުހައްމަދު މުއިއްޒު އެންމެފަހުން ކެބިނެޓަށް ބަދަލު ގެންނަވައި ވަޒީރުން އައްޔަނުކުރެއްވީ މިދިޔަ ޑިސެމްބަރުމަހުގެ ތެރޭގައެވެ. ރައްޔިތުން މަޖިލީހުގެ ތަޅުމުން ވަޒީރުންނަށް ރުހުންދޭނީ ކޮމިޓީގެ ރިޕޯޓް ތަޅުމަށް ހުށަހަޅައި މެމްބަރުންގެ މެދުގައި ބަހުސްކުރުމަށްފަހުއެވެ. މަޖިލީހުގެ ރުހުން ހޯދުމަށް ފޮނުވާ އެ ވަޒީރުންނަކީ މީގެކުރިންވެސް މަޖިލީހުން ރުހުން ދީގެން މިހާރުވެސް ވަޒީރުންގެ ގޮތުގައި މަސްއޫލިއްޔަތު އަދާކުރައްވަމުން އަންނަ ބޭފުޅުންކަން ފާހަގަކޮށްލެވެއެވެ.