ޒިންމާތައް ބަދަލުކޮށް އަލުން އައްޔަންކުރި ހަތަރު ވަޒީރުންނަށް މަޖިލީހުން މިއަދު ރުހުންދީފި އެވެ.

މިދިޔަ ޑިސެމްބަރު މަހުގައި ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު، ވަނީ ވަޒީރުންގެ މަޖިލީހަށް ބަދަލުތަކެއް ގެންނަވައި، ބައެއް މިނިސްޓްރީތަކުގެ ނަން ބަދަލުކުރައްވައިފައެވެ.

އެގޮތުން ވަޒީރުންގެ މަޖިލީހަށް ޢައްޔަނުކުރެއްވީ؛

Advertisement

1. މިނިސްޓަރ އޮފް ފިނޭންސް އެންޑް ޕްލޭނިންގ ކަމަށް، ތ. ބުރުނި، ނިވައިދޮށުގެ މޫސާ ޒަމީރު

2. މިނިސްޓަރ އޮފް ހަޔަރ އެޑިޔުކޭޝަން، ލޭބަރ އެންޑް ސްކިލްސް ޑިވެލޮޕްމަންޓް ކަމަށް، މއ. ވެނީލާގެ ޑޮކްޓަރ ޢަލީ ޙައިދަރު އަޙްމަދު

3. މިނިސްޓަރ އޮފް އެގްރިކަލްޗަރ އެންޑް އެނިމަލް ވެލްފެއަރ ކަމަށް، މއ. މާރާދަގެ ޑޮކްޓަރ މަރްޔަމް މާރިޔާ

4. މިނިސްޓަރ އޮފް ކޮންސްޓްރަކްޝަން، ހައުސިންގ އެންޑް އިންފްރާސްޓްރަކްޗަރ ކަމަށް، ގދ. ފިޔޯރީ، ގުލްބަކާގެ، ޑޮކްޓަރ ޢަބްދުالله މުއްޠަލިބް

އެ ހަތަރު ވަޒީރުން އަލުން ކެބިނެޓަށް އައްޔަންކުރައްވާފައިވާތީ ރައީސް ވަނީ އެ ބޭފުޅުންނަށް ރުހުން ހޯދުމަށް މަޖިލީހަށް ފޮނުއްވާފައެވެ. 

ދައުރުން ބޭރުން މިއަދު ބޭއްވުނު ޖަލްސާގައި ވަޒީރުންނަށް ރުހުން ދިނުމާމެދު ނެގި ވޯޓުގައި ވަޒީރު ހައިދަރަށް ރުހުން ދޭން ފެންނަ ކަމަށް 63 މެންބަރުން ވޯޓު ދެއްވިއިރު، ރުހުން ދޭން ނުފެންނަ ކަމަށް ހަ މެންބަރުން ވޯޓު ދެއްވިއެވެ. އެއީ އެމްޑީޕީ 6 މެންބަރުންނެވެ. 

ވަޒީރު މާރިޔާ  ރުހުން ދޭން ފެންނަ ކަމަށް 70 މެންބަރުން ވޯޓު ދެއްވިއިރު ރުހުން ދޭން ނުފެންނަ ކަމަށް އެއްވެސް މެންބަރަކު ވޯޓެއް ނުދެއްވައެވެ.

އަދި ވަޒީރު މުއްތޮލިބަށް ރުހުން ދޭން ފެންނަ ކަމަށް 70 މެންބަރުން ވޯޓު ދެއްވިއިރު ރުހުން ދޭން ނުފެންނަ ކަމަށް އެެއްވެސް މެންބަރަކު ވޯޓެއް ނުދެއްވައެވެ.

ވަޒީރު ޒަމީރަށް ރުހުން ދޭން ފެންނަ ކަމަށް 69 މެންބަރުން ވޯޓު ދެއްވިއެވެ. ނުފެންނަ ކަމަށް އެއްވެސް މެންބަރަކު ވޯޓެއް ނުދެއްވައެވެ.