ސައުދީ އަރަބިއްޔާ އާއި ޔަހޫދީންގެ ޣައިރު ގާނޫނީ ދައުލަތް، އިސްރާއީލުގެ ގުޅުން މިއަހަރު ރަނގަޅުވާނެކަމަށް އެމެރިކާގެ ވެރިކަމާއި އިއްޔެ ހަވާލުވެވަޑައިގެން ޑޮނަލްޑް ޓްރަމްޕް ވިދާޅުވެއްޖެއެވެ.
ޓްރަމްޕް މިފަދައިން ވިދާޅުވީ، ވެރިކަމުގެ ހުވާ ކުރެއްވުމަށްފަހު އެމެރިކާގެ ރައީސުން އިދާރީ މަސައްކަތްތައް ކުރައްވާ އޯވަލް އޮފީހުގައި ނޫސްވެރިންގެ ސުވާލުތަކަށް ޖަވާބު ދެމުންނެވެ.
މިއަދާއި ހަމައަށް ވެސް ސައުދީން އިސްރާއީލާއިއެކު އެއްވެސް ގުޅުމެއް ގާއިމުކޮށްފައި ނުވި ނަމަވެސް ޓްރަމްޕް ވިދާޅުވީ، އިސްރާއީލާއި އަރަބި ގައުމުތަކާއި ދެމެދު ވެވޭ އެއްބަސްވުންތަކާއި ގުޅޭ އަބްރަހަމް އެކޯޑްސް އާއި ސައުދީން ބައިވެރިވާނެކަމަށް ގަބޫލުފުޅު ކުރައްވާކަމަށެވެ.
ނޫސްވެރިއަކު ސުވާލުކުރުމުން ޓްރަމްޕް ބުނީ، ސައުދީން އަބްރަހަމް އެކޯޑްސް އާއި ގުޅުން އޮތީ މާދުރުގައި ނޫންކަމަށާއި، އެކަމަށް އެބޭފުޅާ ބާރުނޭޅިޔަސް ސައުދީން ބައިވެރިވާނެކަމަށެވެ.
ދެވަނަ ދައުރަކަށް ޓްރަމްޕް އިއްޔެ ހުވާކުރެއްވިއިރު، އެބޭފުޅާގެ ވެރިކަމުގެ ފުރަތަމަ ދައުރުގައި ޔޫއޭއީ އާއި ބަހުރެއިނުން ވަނީ އިސްރާއީލާއިއެކު ގުޅުން ގާއިމުކޮށްފައެވެ.
މިއާއިއެކު، 2020 ވަނަ އަހަރު ސައުދީ އަރަބިއާގެ ޚާރިޖީ ވަޒީރު ވަނީ ފަލަސްތީނަކީ މިނިވަން ގައުމެއްގެ ގޮތުގައި ބަލައިގަނެ، އިސްރާއީލުން ފަލަސްތީނާއިއެކު ހަމަޖެހުން ގާއިމުކުރަންދެން އެގައުމާއިއެކު އެއްވެސް ކަހަލަ ޚާރިޖީ ގުޅުމެއް ގާއިމުނުކުރައްވާނެކަމަށް ވިދާޅުވެފައެވެ.
Advertisement
This content is created and paid for by advertisers and does not involve Voice Journalists
