އެމެރިކާއިން ޑީޕޯޓްކުރާ މީހުންނަށް މެކްސިކޯއިން ވަގުތީ ބޯހިޔާވަހިކަން ފޯރުކޮށްދިނުމުގެ މަސައްކަތް އެގައުމުން ފަށައިފިއެވެ.

އެމެރިކާއަށް ހިޖުރަކޮށްފައިވާ ގިނަ ބަޔަކު އެގައުމުން ޑީޕޯޓްކުރާނެކަމަށް އެގައުމުގެ ރައީސް ޑޮނަލްޑް ޓްރަމްޕް ވިދާޅުވިއިރު، މިކަމާއި ގުޅިގެން މެކްސިކޯއިން ވަނީ ބޮޑު ސަރަހައްދެއްގައި ޓެންޓް ޖަހަން ފަށާފައެވެ.

މެކްސިކޯގެ ސިއުޑަޑް ޖުއާރޭޒް ގައި ހަދަމުންދާ މި ޓެންޓްތަކުން އެތައް ހާސްބަޔަކަށް ވަގުތީ ބޯހިޔާވަހިކަން ފޯރުކޮށްދޭއިރު، އެގައުމުގެ 9 ސަރަހައްދެއްގައި ބޯހިޔާވަހިކަމާއި ރިސެޕްޝަން ސެންޓަރުތައް ގާއިމުކުރުމަށްޓަކައި އެގައުމުގެ ސަރުކާރުން ވަނީ ނިންމާފައެވެ.

Advertisement

އެމެރިކާއިން ޑީޕޯޓްކޮށްލާ މެކްސިކޯ މީހުން އެނބުރި ގައުމަށް އައުމުން އެގައުމުގެ ކަމާ ބެހޭ ފަރާތްތަކުން މި ވަގުތީ ބޯހިޔާވަހިކަން ފޯރުކޮށްދޭ ތަންތަނުގައި ކާބޯތަކެއްޗާއި ބޭސްފަރުވާއާއި ބޭނުންވާ ލިޔެކިޔުންތައް ފޯރުކޮށްދިނުމުގެ މަސައްކަތުގައި އެހީތެރިވާނެއެވެ.

އެމެރިކާގެ ތާރީހުގައި ވެސް އެންމެ ބޮޑު ޑީޕޯޓޭޝަން އެއް ކުރިއަށް ގެންދާނެކަމަށް ޓްރަމްޕް އިއުލާނުކޮށްފައިވާއިރު، އެމެރިކާގައި ސައްހަ ހުއްދައަކާއި ނުލައި ގާތްގަނޑަކަށް 5 މިލިއަން މެކްސިކޯ ރައްޔިތުން ދިރިއުޅެމުން އަންނަކަމަށް ދިރާސާތަކުން ދައްކައެވެ.