ގައުމުތަކަށް ދޭ އެހީ ހުއްޓާލުމަށް އެމެރިކާއިން ނިންމައިފިއެވެ.

އެމެރިކާގެ ސްޓޭޓް ޑިޕާޓްމަންޓުން ނެރުނު މި އޯޑަރުގައި އެމަޖެންސީ ކާބޯތަކެތީގެ ޕްރޮގްރާމާއި ފުރާނަ ސަލާމަތްކުރުމަށް ބޭނުންވާ ސިއްހީ އެހީތެރިކަން ވަނީ މީގެތެރެއިން އިސްތިސްނާކޮށްފައެވެ.

އެމެރިކާގެ ރައީސްކަމާއި ހަވާލުވެވަޑައިގެންނެވި ޑޮނަލްޑް ޓްރަމްޕްގެ ސަރުކާރުގެ ސެކްރެޓަރީ އޮފް ސްޓޭޓް، މާކޯ ރޫބިއޯ ނެރުނު މި މެމޯގައި ބުނީ، އެމެރިކާއިން އެހީ ފޯރުކޮށްދޭނީ ގާނޫނުގައި އޮތް މިންވަރަށް އެކަނި ކަމަށާއި، އޭގެ އިތުރުން އެއްވެސް ލުއިއެއް ނުދޭނެކަމަށެވެ.

މިއާއިއެކު އިންސާނީ އެހީތަކާއި ބެހޭ ޖަމިއްޔާތަކުން ވަނީ މީގެ ސަބަބުން ފުރާނަ ގެއްލުމާއި ދުނިޔޭގެ ހަމަނުޖެހުންމަށް މަގުފަހިވެދާނެކަމުގެ ބިރު އެބައޮތްކަން ފާހަގަކޮށްފައެވެ.

ތިން މަސް ދުވަހުގެ މުއްދަތަކަށް އަޅާފައިވާ މި ފިޔަވަޅަށް 85 ދުވަސް ވުމުން، މިކަން އިތުރަށް ކުރިއަށް ގެންދިޔުމާއި މެދު ރޫބިއޯ ގޮތެއް ނިންމާނެކަމަަށް ރިޕޯޓްތައް ބުނެއެވެ.

އެހީތައް ހުއްޓާލުމުގެ ތެރެއިން އެއިޑްސް އާއި ދެކޮޅަށް ހަނގުރާމަކުރުމަށް 2003 ވަނަ އަހަރު އެގައުމުގެ ރައީސް، ޖޯޖް ވޯކަރ ބުޝް އުފެއްދެވި ޕެޕްފަރ ޕްރޮގްރާމް ވެސް ޓްރަމްޕްގެ ސަރުކާރުން މިއަހަރުގެ މާޗު މަހަށް ފަހު ހުއްޓާލާނެކަމަށް ބެލެވެއެވެ. މިއީ މިހާތަނަށް 25 މިލިއަން މީހުންގެ ފުރާނަ ސަލާމަތްކޮށްދީފައިވާ އެހީއެކެވެ.

މި ފިޔަވަޅުގެ ތެރޭގައި އެމެރިކާގެ އަސްކަރީ އެހީ އެންމެ ބޮޑަށް ފޯރުކޮށްދޭ އިސްރާއީލާއި މިސްރު ނުހިމެނޭއިރު، އެމެރިކާގެ ހަތިޔާރަށް ބަރޯސާވާ ޔޫކްރެއިންގެ ވާހަކަ މެމޯގައި ބުނެފައެއް ނުވެއެވެ.

އެމެރިކާއިން 2023 ވަނަ އަހަރުވެސް ގައުމުތަކަށް އެހީގެ ގޮތުގައި 60 ބިލިއަން ރުފިޔާ ދޫކޮށްފައިވާއިރު، މިއީ އެގައުމުގެ އިގްތިސާދުގެ އެންމެ އިންސައްތައެކެވެ.