ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) އިން އެމެރިކާ ރަސްމީކޮށް ވަކިވާނީ 2026 ވަނަ އަހަރުގެ ޖެނުއަރީ މަހުގެ 22 ގައި ކަމަށް އެ ޖަމިއްޔާއިން ބުނެފިއެވެ.
ޑަބްލިއުއެޗްއޯއިން ވަކިވާނެކަން އެމެރިކާގެ ރައީސް، ޑޮނަލްޑް ޓްރަމްޕް ރަސްމީކޮށް އިއުލާނުކޮށްފައިވާއިރު، އެގައުމުގެ ކޮންގްރެސްގެ 1948 ވަނަ އަހަރުގެ ރެޒޮލިއުޝަންގައިވާ ގޮތުން، އދ ގެ އެއްވެސް ޖަމިއްޔާއަކުން ވަކިވާނަމަ އެއް އަހަރުގެ ނޯޓިސްއެއް ދީ، ދައްކަންޖެހޭ ފައިސާ ދޭން ޖެހޭނެއެވެ.
އެމެރިކާއަކީ ޑަބްލިއުއެޗްއޯއަށް މާލީ ގޮތުން އެންމެބޮޑަށް އެހީވާ ގައުމަށްވާއިރު، އެޖަމިއްޔާއަށް ލިބޭ ފައިސާގެ 18 އިންސައްތަ އަކީ އެމެރިކާއިން ފޯރުކޮށްދޭ ފައިސާއެވެ. އެގޮތުން ފާއިތުވި ދެ އަހަރުގެ ތެރޭގައި ވެސް އެމެރިކާއިން ވަނީ 6.8 ބިލިއަން ޑޮލަރުގެ މާލީ އެހީ ޑަބްލިއުއެޗްއޯއަށް ދީފައެވެ.
މިކަމާއި ގުޅިގެން އދ ގެ ތަރުޖަމާނު، ފަރުހާން ހަގް ވިދާޅުވީ، ޑަބްލިއުއެޗްއޯއިން އެމެރިކާ ވަކިވުމުގެ ނޯޓިސް ލިބިފައިވާކަމަށާއި، އެގައުމުގެ ރަސްމީކޮށް ވަކިވާނީ އަންނަ އަހަރުގެ ޖެނުއަރީ މަހުގެ 22 ވަނަ ދުވަހު ކަމަށެވެ.
ބެލެވޭގޮތުގައި، އެމެރިކާ އެ ޖަމިއްޔާއިން ވަކިވުމާއިއެކު އެޗްއައިވީ/އެއިޑްގެ އިތުރުން ތަފާތު ބަލިތަކުން އަރައިގަތުމަށް ކުރަމުން އަންނަ މަސައްކަތްތަކަށް ހުރަސްތަކެއް ކުރިމަތިވާނެއެވެ.
Advertisement
This content is created and paid for by advertisers and does not involve Voice Journalists
