އެމެރިކާގެ ރައީސް ޑޮނަލްޑް ޓްރަމްޕް އިޒްރޭލުގެ ބޮޑުވަޒީރު ބެންޖަމިން ނެތަންޔާހޫއާ ބައްދަލުކުރަމުންދަނިކޮށް، ވައިޓް ހައުސް ކުރިމައްޗަށް އެތައް ސަތޭކަ ބަޔަކު އެއްވެ މުޒާހަރާކޮށްފިއެވެ. މި މުޒާހަރާގައި ބައިވެރިވި ފަރާތްތަކުން ވަނީ "ފަލަސްތީނަކީ ސޭލްގައި ވިއްކާލެވޭނެ އެއްޗެއް ނޫން" ކަމަށް ގޮވާލާފައެވެ.

އަންގާރަ ދުވަހުގެ ރޭ ބޭއްވުނު މި މުޒާހަރާގައި ބައިވެރިވި ފަރާތްތަކުން ވަނީ އިޒްރޭލަށް ހަތިޔާރު ދިނުން ހުއްޓާލުމަށް ޓްރަމްޕަށް ގޮވާލާފައެވެ. އަދި ފަލަސްތީން މިނިވަންކުރުމަށް ގޮވާލަމުން އިޒްރޭލުގެ އަނިޔާވެރި ޢަމަލުތަކާ ދެކޮޅަަކާ ދެކޮޅަށް އަޑުއުފުލާފައިވެއެވެ.

މުޒާހަރާގައި ބައިވެރިވި އެކްޓިވިސްޓެއް ކަމަށްވާ މައިކަލް ޝިރްޓްޒަރ ވަނީ އެމީހުންގެ ޓެކްސް ފައިސާ ބޭނުންކޮށްގެން ފަލަސްތީނުގެ ރައްޔިތުން މެރުމަށް އެމެރިކާގެ ރައްޔިތުން ބޭނުމެއް ނުވާ ކަމަށް ބުނެފައެވެ. އަދި ޓްރަމްޕް ޣައްޒާގެ ސަރަޙައްދުން މީހުން ނެރުމަށް ގޮވާލާފައިވާ ގޮވާލުމަކީ "ބުއްދި ހަމަނުޖެހޭ" ކަމެއް ކަމަށްވެސް ޝިރްޓްޒަރ ވަނީ ބުނެފައެވެ.

Advertisement

"ފަލަސްތީނުގެ ރައްޔިތުން އެތަނުން އެއްވެސް ތަނަކަށް ނުދާނެ. އެއީ އެ ބިމުގެ އަސްލު ވެރިން،" ޝިރްޓްޒަރ އަލް ޖަޒީރާއަށް ބުނެފައިވެއެވެ. "މީހުން ތަނަކުން ނެރެލާނެ ކަމަށް ބުނުމަކީ އެއީ ކޮލޮނައިޒްކުރާ މީހުންގެ ވިސްނުމެއް."

ކުރިން ޓްރަމްޕް ވަނީ ފަލަސްތީނުގެ ރައްޔިތުންނަށް ޣައްޒާއިން ނުކުތުމުގެ ފުރުސަތު ލިބިއްޖެނަމަ އެކަމަށް "އެދޭނެ" ކަމަށް ބުނެފައެވެ. އަދި އެ ސަރަޙައްދުގެ މުޅި އާބާދީ އެތަނުން ނެރެލުމަށް ގޮވާލާފައިވެއެވެ.

މި ހުށަހެޅުމާ ގުޅިގެން ޢަރަބި ޤައުމުތަކާއި އިންސާނީ ޙައްޤުތަކަށް މަސައްކަތްކުރާ ޖަމާޢަތްތަކުން ވަނީ ނުރުހުންފާޅުކޮށް އެކަން ކުށްވެރިކޮށްފައެވެ. އަދި މިއީ ނަސްލު ނައްތާލުން ކަމަށް ފާޑުކިޔާ ފަރާތްތަކުން ބުނެފައިވެއެވެ.

ޕނަމަވެސް އިއްޔެ ނެތަންޔާހޫއާއެކު ބޭއްވި ނޫސްވެރިންގެ ބައްދަލުވުމެއްގައި ޓްރަމްޕް ވަނީ އޭނާގެ ބަހަށް އިތުރަށް ބާރުއަޅާފައެވެ. އަދި ޣައްޒާގެ އާބާދީ ނެރެލުމަށްފަހު އެމެރިކާއިން "ގާޒާ ހިފާނެ" ކަމަށާއި އެތަން "މިލްކުކުރާނެ“ ކަމަށް އޭނާ ބުނެފައުވެއެވެ.