ދަރިންނަށް ދޭންޖެހޭ ހަރަދު ކަނޑައަޅަންވާނީ ބައްޕައިންގެ ހާލަތަށް ބަލާފައި ކަމަށް ފެމިލީ ކޯޓުން ބުނެފިއެވެ. 

ރައްޔިތުންގެ މަޖިލީހުގެ ގަވައިދު ކޮމިޓީގައި ވާހަކަދައްކަމުން ފެމިލީ ކޯޓުގެ މަންދޫބަކު ވިދާޅުވީ ޗައިލްޑް ސަޕޯޓްގެ އަދަދު ގަވާއިދަކުން ކަނޑައަޅާ އަދަދެއް އޮތުމަށްވުރެ ބައްޕަގެ އާމްދަނީއާއި ހާލަތަށް ބަލައިގެން ފަނޑިޔާރުން ނިންމަން ދޫކޮށްލުމަށް ކޯޓުން ތާއީދުކުރާ ކަމަށެވެ.

ފެމިލީ ކޯޓުން މިހެން ބުނީ ކޯޓުން ދޭ ޗައިލްޑް ސަޕޯޓާ ބެހޭ ގޮތުން މަޖިލީހުން މަޝްވަރާ ކުރުމަށް އެދި  ގަލޮޅު އުތުރު ދާއިރާގެ މެންބަރު މުހައްމަދު އިބްރާހިމް  ހުށަހެޅުއްވި ސިޓީއާ ގުޅިގެންނެވެ.

އިބްރާހިމް ވިދާޅުވި ގޮތުގައި ދަރިންގެ ހަރަދުގެ ގޮތުގައި ސަރުކާރުގެ ގަވާއިދުން ކަނޑައަޅާފައިވާ އަދަދަކީ މާ ކުޑަ އަދަދެކެވެ.

މިހާރު ފެމިލީ ކޯޓުން އެންމެ ކުއްޖެއްގެ ހަރަދުގެ ގޮތުގައި ދައްކަން އަންގަނީ އެންމެ މަދުވެގެން މަހަކު 2،000 ރުފިޔާ އެވެ. 

އިބްރާހިމްގެ ސިޓީގައި އަލިއަޅުއްވާފައިވަނީ ތަކެތީގެ އަގުތައް އުފުލިފައިވާ މިންވަރަށް ބަލާއިރު ކުއްޖަކަށް 2،000 ރުފިޔާ މާ މަދު ކަމަށެވެ.

ގަވާއިދު ކޮމިޓީގެ ގިނަ މެންބަރުން ތާއީދު ކުރެއްވީ ޗައިލްޑް ސަޕޯޓްގެ އަދަދުތައް އިތުރުކުރުމަށެވެ. އަދި އެކަމާ ގުޅޭ ގޮތުން ކަމާބެހޭ އިދާރާތަކާއި އޮފީސްތަކާވެސް މެންބަރުން ވަނީ ބައްދަލުކޮށްފަ އެވެ.

ކޮމިޓީ ބައްދަލުވުމުގައި ފެމިލީ ކޯޓުގެ ލީގަލް އޮފިސަރު އަޙްމަދު މައުސޫމް ފާހަގަކުރެއްވި ގޮތުގައި ޗައިލްޑް ސަޕޯޓްގެ އަދަދުގެ އިތުރުން ބައްޕައިންގެ އަތުން އެހެން ފައިސާ ވެސް ހޯދަ އެވެ. އޭނާ ތަފްސީލުކޮށް ވިދާޅުވީ އޭގެ ތެރޭގައި ބެލެނިވެރިޔާގެ މައްޗަށް ދައުވާކޮށްގެން ވަކިވަކިން ދައުވާ ކުރެވޭ ބޭސްފަރުވާގެ ހަރަދާއި ކާނާއާއި ހެދުމުގެ ހަރަދުތައް ހިމެނޭ ކަމަށެވެ.

އޭނާގެ ވާހަކަ ކުރިއަށް ގެންދަވަމުން ވިދާޅުވީ މިހާރު ވެސް ބައްޕައިންގެ އަތުން ބޮޑެތި އަދަދުތަކުން ދައުވާ ކުރާ ކަމަށާއި ޗައިލްޑް ސަޕޯޓަށް އެއް ބައްޕައެއްގެ އަތުން މަހަކު ޖުމްލަ 16،000 ރުފިޔާ ދައްކަން ކޯޓުން އަމުރު ކުރި ކަމަށެވެ. މައުސޫމް ވިދާޅުވި ގޮތުގައި މި އިތުރު ފައިސާ ހޯދުމަށް ދައުވާ ކުރާއިރު ޝަކުވާ އުފެދެނީ ކޯޓު މެދުވެރިކޮށް ވަކިން ދައުވާ ކުރަން ޖެހުމުންނެވެ.

މައުސޫމް ވިދާޅުވި ގޮތުގައި މިހާރު އޮތް ގަވާއިދުގައި ޗައިލްޑް ސަޕޯޓްގެ ގޮތުގައި ކަނޑައަޅާފައިވާ އަދަދަކީ އެކަށީގެންވާ އަދަދެއް ނޫނެވެ. ފެމިލީ ކޯޓުން ބުނީ މިހާރު ހުށަހަޅާފައިވާ ޗައިލްޑް ސަޕޯޓްގެ އަދަދު ކަމުގައިވާ 4،000 ރުފިޔާއަކީ އެންމެ އިންސާފުވެރި ނިންމުމަކަށް ނުވެދާނެ ކަމަށެވެ.

 ޗައިލްޑް ސަޕޯޓް ދެއްކުމަށްފަހު ބައްޕައިންނަށް މާލީ ގޮތުން ދަތިތަކެއް ކުރިމަތިވި މައްސަލަތަކާއި ކުރީގެ ކައިވެންޏަކުން ޗައިލްޑް ސަޕޯޓް ހަރަދު ބޮޑުކަމުން ދެވަނަ ކައިވެންޏަން ލިބޭ ދަރިފުޅަށް ޚަރަދު ނުކުރެވޭތީ ބައެއް ބައްޕައިންގެ ދެވަނަ ކައިވެނި ނިމުމަކަށް އަންނަ މައްސަލަތަކަށް މައުސޫމް އަލިއަޅުވާލެއްވިއެވެ.  

މި ކަންތައްތަކަށް ބިނާކޮށް މައުސޫމް ވިދާޅުވީ ބައްޕައިންގެ އާމްދަނީއާއި ގާބިލްކަމަށް ބަލައިގެން ޗައިލްޑް ސަޕޯޓްގެ އަދަދުތައް ފަނޑިޔާރުން ނިންމުމަކީ އެންމެ ރަނގަޅު ގޮތް ކަމަށެވެ. މިކަމުގެ ސަބަބުން ފަނޑިޔާރުންނަށް ޗައިލްޑް ސަޕޯޓްގެ އަދަދުތައް އިންސާފުވެރިކަމާއެކު ކަނޑައެޅޭނީ ކުއްޖާގެ ހާލަތަށް ބަލައިގެން، އެކުދިންގެ ދިރިއުޅުމުގެ ވައްޓަފާޅިއަށްވެސް ބަލައިގެން ކަމަށް އޭނާ ވިދާޅުވި އެވެ.