ދިވެހި ބަހުގެ އެކަޑަމީން މިދިޔަ އަހަރު އަލަށް އުފެއްދި ބަސްތައް މި ހަފްތާގައި ވަނީ އާންމުކޮށްފަ އެވެ. އެ ބަސްތަކާއި ގުޅިގެން ވަރަށް ބޮޑު ބަހުސެއް ދަނީ ހިނގަމުންނެވެ.

ހާއްސަކޮށް ދިވެހި ލަފުޒު ހުރި ބައެއް ކަންކަމަށް އާ ބަސްތަކެއް އުފެއްދުމުން އެކަމުގެ ފަހަތުގައި ފޮރުވިފައިވަނީ ކޮން ކަމެއްތޯ ވަނީ ސުވާލު އުފެދިފަ އެވެ.

އެފަދަ އެއް ލަފުޒަކީ ރޯދައަށް ހުރުމަށްޓަކައި ފަތިސް ވުމުގެ ކުރިން ކައިއުޅޭ ކެއުމަށް އުފައްދާފައިވާ ދިވެހި ބަހެވެ. އެއީ ދިވެހި ބަހުގައި ހާރު ކެއުމެވެ. ނަމަވެސް މިހާރު އަލަށް އުފައްދާފައިވާ ބަހަކީ ސުހޫރު އެވެ.

އެހެން ކަމުން ހާރު ކެއުމަށް މީގެ ފަހުން ބޭނުން ކުރާނެ ރަސްމީ ނަމަކީ ސުހޫރު އެވެ.

ރޯދައަށް ހުރުމަށްޓަކައި ފަތިސް ވުމުގެ ކުރީން ކައިއުޅޭ ކެއުމަށް "ހާރުކެއުން" ކިޔާތީ ވެސް އެކަމަށް ބަހުސް ހިނގަ އެވެ. ބައެއް މީހުންގެ ނަޒަރުގައި އެެއީ މުނާސަބު ނަމެއް ނޫނެވެ. ނަމަވެސް މި ބަސް މިގޮތަށް އުފެެދުނު ވަކި ސަބަބެއް ފެންނާކަށް ނެތެވެ.

ހާރުކައި އުޅޭ ވަގުތަށް ކިޔާ އުޅެނީ ހާރުދަމެވެ. އެހެން ކަމުން ހާރުކެއުން އެ ނަން ނެގުނީ ހާރުދަމު ކާތީ ކަމަށް ވުން އެކަށީގެންވެ އެވެ. އެހެން ވެއްޖެނަމަ ފަތިހުގެ ކުރީގެ ވަގުތަށް ހާރުދަން ކިޔުނު ސަބަބެއް އޮންނާނެ އެވެ. ބޮޑަށް ބުރަވެވެނީ ހާރުކައި އުޅޭ ގަޑިއަކީ މެންދަމުގެ އެންމެ ފަހު ވަގުތަށް ވުމުން އެވަގުތަށް ހާރުދަން ކިޔުނީ ކަމަށެވެ.

ހާރުކެއުމަށް ސުހޫރުގެ ނަމުން ނަންދީ އާ ބަހެއް އުފެއްދިއިރު އަރަބި ބަހުގައި ރޯދައަށް ހުރުމަށްޓަކާ ފަތިސް ވުމުގެ ކުރީން ކާ ކެއުމަށް ކިޔަނީ "ސުހޫވްރު" އެވެ. 

އެހެން ކަމުން ދިވެހި އައު ލަފްޒު ނުވަތަ ބަސް އުފެއްދީ އަރަބި ލަފުޒު ބަލައިގެން ކަމަށް ބެލެވެ އެވެ.