ސުޕްރީމް ކޯޓުގެ ދެ ފަނޑިޔާރަކު ވަކިކުރުމަށް ރައްޔިތުންގެ މަޖިލީހަށް ހުށަހަޅާފައިވާ ބިލަށް ޖުޑީޝިއަރީ ކޮމިޓީގައި ތާއިދުނުކުރެއްވި ނަމަވެސް، މިއަދު ތަޅުމުގައި ބިލަށް ވޯޓު ދެއްވި ސަބަބު ހުރާ ދާއިރާގެ ޕީއެންސީ މެންބަރު އަނާރާ ނައީމް މިއަދު ހާމަކުރައްވައިފިއެވެ.
ވެރިކަން ކުރާ ޕީއެންސީގެ ހޮޅުދޫ ދާއިރާގެ މެންބަރު އަބްދުއްސައްތާރު މުހައްމަދުގެ ފަރާތުން ކޯޓުތަކުގެ ގާނޫނު އިސްލާހު ކުރުމަށް ހުށަހަޅައިފައިވާ ބިލުގައި ސުޕްރީމް ކޯޓުގެ ފަނޑިޔާރުންގެ އަދަދު ހަތަކުން ފަހަކަށް މަދުކުރުމަށް ހުށަހަޅައިފައިވާއިރު، އިއްޔެ ބޭއްވި ޖުޑީޝިއަރީ ކޮމިޓީގައި، އެ ބިލް ފާސްކުރަން އަނާރާ ވޯޓެއް ނުދެއްވައެވެ. އޭގެ ސަބަބެއް ކަމުގައި އޭނާ އޭނާ ވިދާޅުވީ، ބިލުގައި ފާހަގަކޮށްފައިވާ މުއްދަތުތައް ކުރުވުމެވެ.
އެގޮތުން، ފަނޑިޔާރުން މަގާމުން ވަކިކުރުމަށް ޖޭއެސްސީން ރައްޔިތުންގެ މަޖިލީހަށް ހުށަހަޅާ ފަނޑިޔާރުންގެ ނަންތައް އެ ބިލު ގާނޫނަކަށްވެ އަމަލުކުރަން ފަށާތާ ފަސް ދުވަހުގެ ތެރޭގައި މަޖިލީހަށް ހުށަހަޅަން ވާނެ ކަމަށް ބިލުގައިވާއިރު، ފަސް ދުވަހުގެ މުއްދަތަކީ ވަރަށް ކުރު މުއްދަތެއް ކަމަށާއި އެކަމާ މެދު ކަންބޮޑުވާ ކަމަށް އަނާރާ ވިދާޅުވެފައިވެއެވެ. އެހެންކަމުން، ކޮމިޓީގައި އަނާރާ އެ ބިލަށް ވޯޓެއް ނުދެއްވައެވެ.
ނަމަވެސް ބިލު ފާސްކުރަން މަޖިލީހުގެ ތަޅުމުގައި ވޯޓު ދެއްވި ބޭފުޅުންގެ ތެރޭގައި އަނާރާ ހިމެނިވަޑައިގަންނަވާއިރު، އޭގެ ސަބަބު ހާމަކުރައްވައި އަނާރާ އެކްސްގައި ކުރެއްވި ޕޯސްޓެއްގައި ވިދާޅުވީ ކޮމިޓީގައި ބިލްތަކަށް ޚިޔާލު ފާޅުކުރައްވާނެ ކަމަށެވެ.
"ނަމަވެސް މެޖޯރިޓީން ކަމެއް ނިންމާއިރު ދާންޖެހެނީ ޓީމާއެކު ކަމަށް ގަބޫލުކުރަން،" އަނާރާ ވިދާޅުވިއެވެ.
ފަނޑިޔާރުންގެ އަދަދު މަދުކުރާ ބިލު ތަޅުމަށް އިއްޔެ ބަލައިގަނެ، އިއްޔެ ކޮމިޓީން ފާސްކުރުމަށް ފަހު މިއަދު ތަޅުމުން އެ ބިލު ވަނީ ފާސްކޮށްފައެވެ. ޕީއެންސީގެ 75 މެންބަރުން ތިއްބަވާއިރު މިއަދު ބިލު ފާސްކުރީ 64 މެންބަރުންގެ ވޯޓުންނެވެ.
Advertisement
This content is created and paid for by advertisers and does not involve Voice Journalists
