ސުޕްރީމް ކޯޓުގެ ދެ ފަނޑިޔާރަކު ވަކިކުރުމަށް ރައްޔިތުންގެ މަޖިލީހަށް ހުށަހަޅާފައިވާ ބިލަށް ޖުޑީޝިއަރީ ކޮމިޓީގައި ތާއިދުނުކުރެއްވި ނަމަވެސް، މިއަދު ތަޅުމުގައި ބިލަށް ވޯޓު ދެއްވި ސަބަބު ހާމަކުރައްވާ ހުރާ ދާއިރާގެ ޕީއެންސީ މެންބަރު އަނާރާ ނައީމް ދެއްކެވި ވާހަކަތަކަށް ކުރީގެ ބަންޑާރަ ނާއިބު ފާތިމަތު ދިޔާނާ ސައީދު ފާޑުވިދާޅުވެއްޖެ އެވެ.

ވެރިކަން ކުރާ ޕީއެންސީގެ ހޮޅުދޫ ދާއިރާގެ މެންބަރު އަބްދުއްސައްތާރު މުހައްމަދުގެ ފަރާތުން ކޯޓުތަކުގެ ގާނޫނު އިސްލާހު ކުރުމަށް ހުށަހަޅައިފައިވާ ބިލުގައި ސުޕްރީމް ކޯޓުގެ ފަނޑިޔާރުންގެ އަދަދު ހަތަކުން ފަހަކަށް މަދުކުރުމަށް ހުށަހަޅައިފައިވާއިރު، އިއްޔެ ބޭއްވި ޖުޑީޝިއަރީ ކޮމިޓީގައި، އެ ބިލް ފާސްކުރަން އަނާރާ ވޯޓެއް ނުދެއްވައެވެ. އޭގެ ސަބަބެއް ކަމުގައި އޭނާ އޭނާ ވިދާޅުވީ، ބިލުގައި މައްސަލަތަކެއް ހުރުމެވެ. ހާއްސަކޮށް ފަނޑިޔާރުން ވަކިކުރުމަށް އޮތް މުއްދަތު ކުރުވުމެވެ. 

އެގޮތުން، ފަނޑިޔާރުން މަގާމުން ވަކިކުރުމަށް ޖޭއެސްސީން ރައްޔިތުންގެ މަޖިލީހަށް ހުށަހަޅާ ފަނޑިޔާރުންގެ ނަންތައް އެ ބިލު ގާނޫނަކަށްވެ އަމަލުކުރަން ފަށާތާ ފަސް ދުވަހުގެ ތެރޭގައި މަޖިލީހަށް ހުށަހަޅަން ވާނެ ކަމަށް ބިލުގައިވާއިރު، ފަސް ދުވަހުގެ މުއްދަތަކީ ވަރަށް ކުރު މުއްދަތެއް ކަމަށާއި އެކަމާ މެދު ކަންބޮޑުވާ ކަމަށް އަނާރާ ވިދާޅުވެފައިވެއެވެ. އެހެންކަމުން، ކޮމިޓީގައި އަނާރާ އެ ބިލަށް ވޯޓެއް ނުދެއްވައެވެ. 

Advertisement

ނަމަވެސް ބިލު ފާސްކުރަން މަޖިލީހުގެ ތަޅުމުގައި ވޯޓު ދެއްވި ބޭފުޅުންގެ ތެރޭގައި އަނާރާ ހިމެނިވަޑައިގަންނަވާއިރު، އޭގެ ސަބަބު ހާމަކުރައްވައި އެކްސްގައި ކުރެއްވި ޕޯސްޓެއްގައި އަނާރާ ވިދާޅުވީ ކޮމިޓީގައި ބިލްތަކަށް ޚިޔާލު ފާޅުކުރައްވާނެ ކަމަށެވެ.

"ނަމަވެސް މެޖޯރިޓީން ކަމެއް ނިންމާއިރު ދާންޖެހެނީ ޓީމާއެކު ކަމަށް ގަބޫލުކުރަން،" އަނާރާ ވިދާޅުވިއެވެ.

އަނާރާގެ އެ ވާހަކަތަކަށް ރައްދު ދެއްވާ ދިޔާނާ ވަނީ އެފަދަ ވާހަކަތައް ކޮންމެވެސް އެހެން ބަޔަކާ ދެއްކެވުމަށް އެދިވަޑައިގެންފަ އެވެ. އަދި ރައްޔިތުންނަށް އިންސާފު ހޯދަންދާން އޮތް ނިޒާމަށް އަތްބާނާ ކަރަށް ފިތާލުމުން ވެސް ވަޑައިގަންވަން ޖެހިވަޑައިގަތީ ހަމަ އެ ޓީމާ އެކުތޯ ސުވާލު ކުރެއްވި އެވެ.

"އެހެން ކަމަށްވާނަމަ އެފަދަ މީހުންނަކީ އެބަޔަކު ހާސިލުކުރި އިލްމަށް ވެސް ހުތުރު ދޭ ބައެއް," ރާއްޖޭގެ އެންމެ މަޝްހޫރު އަންހެން ދީނީ އިލްމުވެރީންގެ ތެރޭގައި ހިމެނިވަޑައިގަންނަވާ އަނާރާއަށް ރައްދު ދެއްވާ ރާއްޖޭގެ އެންމެ ފުންނާބު އުސް ގާނޫނީ ބޭފުޅުންގެ ތެރޭގައި ހިމެނިވަޑައިގަންނަވާ ދިޔާނާ ވިދާޅުވި އެވެ.