ރާއްޖެއިން ޗައިނާއާއެކު ސޮއިކޮށްފައިވާ މިނިވަން ވިޔަފާރީގެ އެއްބަސްވުމުގެ ދަށުން ދުންފަތުގެ ބާވަތްތަކާއި ސިނގިރޭޓުން ޑިޔުޓީ މާފު ނުވާ ކަމަށް އިކޮނޮމިކް މިނިސްޓަރު މުހައްމަދު ސައީދު ވިދާޅުވެއްޖެއެވެ.

ސައީދު އެފަދައިން ވިދާޅުވީ ރައްޔިތުންގެ މަޖިލީހުގެ ގަލޮޅު އުތުރު ދާއިރާގެ މެންބަރު މުހައްމަދު އިބްރާހީމް (ކުޑޫ) ކުރެއްވި ސުވާލުތަކަށް ލިޔުމުން ޖަވާބުދެއްވައެވެ.

އެ ސުވާލު ތަކުގެ ޖަވާބު މިއަދުގެ މަޖިލީހުގެ ޖަލްސާގައި ވަނީ އިއްވާފައެވެ. 

Advertisement

އެގޮތުން މެންބަރު ކުޑޫ ވަނީ ޗައިނާ-ރާއްޖެ މިނިވަން ވިޔަފާރީގެ އެއްބަސްވުމުގެ ދަށުން ޗައިނާއިން ރާއްޖެއަށް އިމްޕޯޓްކުރެވޭ ދުންފަތުގެ ބާވަތްތަކުން އަދި ސިނގިރޭޓުން ޑިޔުޓީ ނަގާނެތޯ ސުވާލު ކުރައްވާފައެވެ. އަދި، ސިނގިރޭޓް އިމްޕޯޓް ކޮށްގެން ދައުލަތުގެ ބަޖެޓަށް ވަންނާނެ ކަމަށް ލަފާކުރާ އާމްދަނީގެ އަދަދަކަށް އެކަމުގެ ސަބަބުން އަންނާނީ ކޮން ހީނަރުކަމެއްތޯ އާއި އެކަން ފޫބައްދަން ކުރާނީ ކޮން ކަމެއްތޯ ސުވާލު ކުރައްވާފައެވެ. 

އެ ސުވާލަށް ވަޒީރު ލިޔުމުން ދެއްވި ޖަވާބުގައި ވިދާޅުވީ، ޗައިނާއާއެކު ސޮއިކޮށްފައިވާ މިނިވަން ވިޔަފާރީގެ އެއްބަސްވުމުގެ ދަށުން ދުންފަތުގެ ބާވަތްތަކާއި، އަދި ސިނގިރޭޓުން ޑިޔުޓީ ނަގާކަމަށެވެ. 

މީގެ އިތުރުން މެންބަރު ކުޑޫ ވަނީ އެފްޓީއޭގެ ދަށުން ކަނޑާލެވޭ އިމްޕޯޓް ޑިޔުޓީ ގެ ސަބަބުން ތަކެތީގެ އަގު ބޮޑުތަނުން ހެޔޮވާނެކަން ފާހަގަކުރައްވައި، އެކަމުގެ ސަބަބުން އިމްޕޯޓް ޑިޔުޓީން ގެއްލޭނެ މިންވަރާ ބެހޭގޮތުން ސުވާލުކުރައްވާފައެވެ. އަދި އެފްޓީއޭ އެގްރީމަންޓް މިހާތަނަށް ހާމަނުކުރާ ވަނީ ކީއްވެތޯ ވެސް ސުވާލު ކުރެއްވިއެވެ. 

"ޗައިނާއިން ރާއްޖެއަށް އިމްޕޯޓުކުރާ ތަކެއްޗަށް ނަގާ ޑިއުޓީ ބިނާވާނީ އެ ގައުމުން ދިވެހިރާއްޖެއަށް އެތެރެކުރެވޭ މުދަލުގެ އަގަށެވެ. މެންބަރު ސުވާލުކުރައްވާފައި ވަނީ މުސްތަގުބަލުގައި ހިނގާނެ މުއާމަލާތަކަށްވާތީ، އެކަމުގެ ސީދާ އަދަދުތަކެއް އެނގޭނީ އެ މުއާމަލާތްތައް ހިނގައި ނިމުނީމަ. ދޭދޭ ގައުމުތަކުގެ މެދުގައި ކުރެވޭ އެއްބަސްވުންތަކާއި ޓްރީޓީތައް އާންމުކުރެވޭނީ އެއްބަސްވުމުގައި ކަނޑައަޅާ ދެ ގައުމުން އެއްބަސްވާ ގޮތުގެ މަތިން،" ވަޒީރު ސައީދުގެ ޖަވާބުގައި ވިދާޅުވިއެވެ.

ރާއްޖެއިން ޗައިނާއާ އެކު މިނިވަން ވިޔަފާރީގެ އެއްބަސްވުމެއްގަައި ސޮއިކުރީ ކުރީގެ ރައީސް އަބްދުالله ޔާމީން އަބްދުލްގައްޔޫމްގެ ވެރިކަމުގައި 2014ވަނަ އަހަރުގެ ޑިސެމްބަރު މަހުގެ ތެރޭގައެވެ.

ނަމަވެސް، ރައީސް އިބްރާހިމް މުހައްމަދު ޞާލިޙްގެ ސަރުކާރުން މިނިވަން ވިޔަފާރީގެ އެއްބަސްވުމަށް އަމަލުކުރަން ފަށައިފައެއް ނުވެއެވެ. އެއަށް އަމަލުކުރަން ފެށީ މި ސަރުކާރުން މި އަހަރުގެ ޖެނުއަރީ އެއްވަނަ ދުވަހުން ފެށިގެންނެވެ.