އެމެރިކައިން ބޭނުންވަނީ ހަނގުރާމައެއް ނަމަ އެކަމަށް ޗައިނާ ތައްޔާރުކަމަށާއި، އެއީ ވިޔަފާރީގެ ހަނގުރާމަޔަކަސް، ޓެރިފް ހަނގުރާމަޔަކަސް އަދި އެހެން ބާވަތެއްގެ ހަނގުރާމަޔަކަށް ވިޔަސް ހެޔޮކަމަށް ޗައިނާއިން ބުނެފިއެވެ.

ޗައިނާގެ ޚާރިޖިއްޔާގެ ތަރުޖަމާނު މިހެން ބުނެފައިވަނީ އެމެރިކާގެ ރައީސް ޑޮނަލްޑް ޓްރަމްޕް އިއުލާންކުރެއްވި ޓެރިފް ޕްލޭން ޗައިނާ، ކެނެޑާ އަދި މެކްސިކޯއިން އެމެރިކާއަށް އެތެރެކުރާ މުދަލުން ނަގަން ފެށުމުން، އެމައްސަލައިގައެވެ. އެމެރިކާއިން ތުހުމަތުކުރާ ގޮތުގައި އެގައުމަށް އެތެރެވާ މަސްތުވާތަކެތީގެ ބާވަތެއްކަމަށްވާ ފެންޓަނީލް އެތެރެކުރަނީ މައިގަނޑު ގޮތެއްގައި ޗައިނާއިންނެވެ. އަދި އެގައުމުން އެތެރެކުރާ މުދަލުން ނަގާ ޓެރިފް ބޮޑުކުރަން ނިންމީ އެސަބަބާ ހެދިކަމަށް ކުރިން ބުނެފައިވެއެވެ.

ޗައިނާއިން ބުނީ އެމެރިކާއަށް ދިމާވެގެން އުޅޭ ފެންޓަނިލް ކްރައިސިސް އަކީ އެގައުމުން އަމިއްލައަށް އުފަން ކުރިވި މައްސަލައެއްކަމަށާއި، ހެޔޮ ނިޔަތުގައި އިންސާނިއްޔަތަށްޓަކައި އެކަމުގައި އެމެރިކާއަށް އެހީވާން ޗައިނާއިން އުޅުމުންވެސް އެމެރިކާއިން މަސައްކަތްކުރީ ޗައިނާގެ އަގު ވައްޓާލަންކަމަށެވެ. އަދި އެމެރިކާގެ އަމަލުތަކުގެ ސަބަބުން ދެގައުމުގެ މެދުގައި މަސްތުވާތަކެތީގެ މައްސަލަތަކާ ގުޅިގެން ކުރިއަށްދާ މަޝްވަރާތަކުގެ ބޭނުން ކެނޑޭކަމަށްވެސް ޗައިނާއިން ބުންޏެވެ.

ނުރުހުމުގެ ރާގުގައި ޗައިނާއިން ބުނީ އެގައުމަށް ބިރު ދައްކައިގެން ކަންކަން ކުރެވޭނެކަމަށް އެމެރިކާއަށް ހީވާނަމަ އެއީ ކުށް ހީއެއްކަމަށާއި، ބިރާއި ނުފޫޒުން ޗައިނާ ލައްވާ ކަންކަން ނުކުރެވޭނެ ކަމަށެވެ. އަދި ފެންޓަނިލްގެ މައްސަލައިގައި ޗައިނާއާ މަޝްވަރާކުރަން ބޭނުވާނަމަ އެކަން ކުރަން ޖެހެނީ ދެގައުމަކީވެސް ހަމަހަމަ ދެގައުމު ކަމުގައި އެމެރިކާއިން ދެކި، މޭޒު ދޮށަށް އައިސް މަޝްވަރާކޮށްގެން ކަމަށެވެ.

އަދި އެމެރިކާއިން ބޭނުންވާ ކޮންމެ ކަހަލަ ހަނގުރާމައަކަށްވެސް ޗައިނާ އޮތީ ތައްޔާރަށްކަމަށް ޗައިނާގެ ޚާރިޖިއްޔާއިން ވަނީ ބުނެފައެވެ.