ޗީޒް ކޭކަކީ އަހަރެމެންގެ ތެރެއިން ގިނަ މީހުންނަށް ވަރަށް ކަމުދާ ފޮނި ބާވަތެކެވެ. އެހެންކަމުން މިއަދު މި ގެނެސްދެނީ ފިހަން ނުޖެހޭ ޗީޒް ކޭކުގެ ރެސިޕީއެވެ. 

200ގ އޯރިއޯ ބިސްކޯދު (ކްރީމް ގަނޑު ނަގާފައި)

1/4 ޖޯޑު މެލްޓެޑް ބަޓަރ

2 ޖޯޑު ކްރީމް ޗީޒް 

2/3 ޖޯޑު ހިމުންކޮށްފައި ހުރި ހަކުރު

1 ސައި ސަމުސާ ވެނީލާ އެސެންސް

250ގ ޑާކް ޗޮކޮލެޓް (ޗޮޕް ކޮށްފައި) 

1 ޖޯޑު ހެވީކްރީމް

150ގ މިލްކް ޗޮކޮލެޓް (ޗޮޕް ކޮށްފައި) (މަތީ ލެޔަރ ހެދުމަށް)

1/2 ޖޯޑު ހެވީ ކްރީމް (މަތީ ލެޔަރ ހެދުމަށް) 

1) އޯރިއޯ ބިސްކޯދުތައް މިކްސްސަރަށް އަޅައި ހިމުން ކޮށްލާށެވެ. ހިމުން ވުމުން މެލްޓެޑް ބަޓަރ އަޅައިގެންވެސް މިކްސް ކޮށްލާށެވެ. ދެން ޗީޒް ކޭކު އަޅާ ޓްރޭއަށް އެޅުމަށްފަހު ރަނގަޅަށް އޮއްބައި ބިސްކޯދުތައް އެއްވަރު ކޮށްލާށެވެ. އަދި 30 މިނެޓް ވަންދެން ފްރިޖަށް ލައި ފިނި ކޮށްލާށެވެ.

2) ޗީޒް ކޭކު ހަދަން، ހެންޑް މިކްސަރަކުން ކްރީމް ޗީޒް، ހަކުރު އަދި ވެނީލާ އެސެންސް ރަނގަޅަށް، ފްލަފީ ވަންދެން އެކުލަވައިލާށެވެ. ދެން ޑާކް ޗޮކޮލެޓް މެލްޓްކުރުމަށްފަހު އެ މިކްސްޗަރ ތެރެއަށް އަޅައި އެކުލަވާލާށެވެ. 

3) އެއަށްފަހު އިތުރު ތަށްޓެއްގައި ހެންޑް މިކްސަރ ބޭނުންކޮށްގެން ހެވީ ކްރީމް ކޮޅު މެދުމިނަށް ވިޕް ކޮށްލާށެވެ. ދެން ސަމުސަލަކުން ކްރީމް ޗީޒް މިކްސްޗަރ އާއި ވިޕިން ކްރީމް ރަނގަޅަށް އެކުލަވާލާށެވެ.

4) ކްރީމްޗީޒް މިކްސްޗަރ، ކުރިން ތައްޔާރު ކުރި އޯރިއޯ ކްރަސްޓަށް އަޅައި އެއްވަރުކޮށްލާށެވެ. އެއަށްފަހު ގަޑިއިރެއް ވަންދެން އެ ފިނިކުރަން އައިސް އަލަމާރިއަށް ލާށެވެ. 

5) ދެން އެންމެ މަތީ ލެޔަރ ހެދުމަށް މިލްކް ޗޮކޮލެޓްގެ ތެރެއަށް ހޫނު ކޮށްފައި ހުރި ހެވީކްރީމް އަޅައި ޗޮކޮލެޓް މެލްޓް ކޮށްލާށެވެ. އެއްކޮށް މެލްޓު ވުމުން، ޗީޒްކޭކު މިކްސްޗަރ މައްޗަށް އަޅައި އެއްވަރު ކޮށްލުމަށްފަހު 4 ވަރަކަށް ގަޑިއިރު ފިނިކުރަން ފްރިޖަށް ލާށެވެ. ޗީޒްކޭކު އެހުރީ ތައްޔާރު ވެފައެވެ.