މި ސަރުކާރު މިހާރު މިއޮތީ ބަދަލުކުރަންޖެހޭ ހިސާބުގައި ކަމަށާއި، ސަރުކާރު ބަދަލުކުރާނީ ބަދުރުހަނގުރާމަ މިސާލަކަށް ނަގައިގެން ރޯދަމަހުގެ ތެރޭގައިކަމަށް ރައްޔިތުންގެ މަޖިލީހުގެ ދާންދޫ ދާއިރާގެ ކުރީގެ މެންބަރު ޔައުގޫބު އަބްދުﷲ ވިދާޅުވެއްޖެއެވެ.
އެމްޑީޕީން ސިލްސިލާކޮށް މިހާރު ކުރިއަށްގެންދާ މުޒާހަރާގެ ތެރެއިން ރޭ ބޭއްވި މުޒާހަރާގައި ވާހަކަދައްކަވަމުން ޔައުޤޫބް ވިދާޅުވީ، ސަރުކާރު މިހާރު މިއޮތީ ބަދަލުކުރަންޖެހޭ ހިސާބަށް އައިސްފައިކަމަށާއި، މިހާރު ހާލަތުއޮތްގޮތުން މިކަމަކީ މިހާރު ވާޖިބު ކަމެއް ކަމަށެވެ. މިގޮތުން މިކަންކުރަން އެންމެ ރަނގަޅީ މި ރޯދަމަހުކަމަށާއި، ރޯދަމަހުގެ 17 ވަނަ ދުވަހަކީ ސަރުކާރު ބަދަލުކުރަން އެންމެ ރަނގަޅުދުވަސްކަމަށް ހުކުރު ހުތުބާއިންވެސް ސާފުވެފައިވާކަމަށް ޔައުޤޫބް ވިދާޅުވިއެވެ.
ސަރުކާރު ބަދަލުކުރަންޖެހޭ ވާހަކަ ދައްކަމުން ޔައުޤޫބް ވިދާޅުވީ އެކަމަށް މިހާރު މިނިސްޓަރުންގެ ފަރާތުންވެސް އެއްބާރުލުން ލިބެމުން އަންނަ ކަމަށެވެ. އެގޮތުން މިކަމަށް އިސްލާމިކް މިނިސްޓަރު ޑރ.މުހައްމަދު ޝަހީމްގެ ފަރާތުން ހާއްސަ ގޮތެއްގައި އެއްބާރުލުން ލިބެމުން އަންނަކަމަށް އޭނާ ވިދާޅުވިއެވެ. އަދި އިސްލާމިކް މިނިސްޓްރީން ހުތުބާ ތައްޔާރުކުރުމުގައި އެކަމަށް އެއްބާރުލުންދޭ މޭރުމަކުން ޔައުޤޫބް ވަނީ ވާހަކަދައްކަވާފައެވެ.
ޔައުޤޫބް ވިދާޅުވީ ސަރުކާރު ބަދަލުކުރުމަށް އެކި ފަރާތްތަކުން އެއްބާރުލުން ލިބެމުންދާއިރު ދެން ބޭނުންވަނީ ފުލުހުންގެ ފަރާތުން އެއްބާރުލުން ކަމަށެވެ. މުޒާހަރާއާ ގުޅިގެން އެމްޑީޕީގެ މެމްބަރުން ފުލުހަށް ހާޒިރުކުރިނަމަވެސް ސަރުކާރާ ދެކޮޅަށް ހިންގަމުންދާ ހަރަކާތްތައް ނުހުއްޓާނޭކަމަށް ޔައުޤޫބް ރޭ ވަނީ ވިދާޅުވެފައެވެ.
ސަރުކާރު ވައްޓާލުމުގައި އިސްލާމިކް މިނިސްޓަރުގެ އެއްބާރުލުން ލިބޭކަމަށް ޔައުޤޫބު ވިދާޅުވެފައިވާއިރު، ޔައުޤޫބު ދައްކަވާ ސިޔާސީ ވާހަކަތަކާ ގުޅިގެން މީގެކުރިންވެސް ރައްޔިތުންގެގެ ފަރާތުން ފާޑުކިޔުންތަކެއް އޭނާއަށް ކުރިމަތިވެފައިވާކަން ފާހަގަކޮޮށްލެވެއެވެ. މިގޮތުން އޮޑިޓަރެއްގެ ހައިސިއްޔަތުން ވަގުންހިފާނޭކަމަށް މީގެކުރިން ޔައުޤޫބު ވިދާޅުވެފައިވާ ވިދާޅުވުމަކީ މިހާތަނަށް އެންމެބޮޑު ސަމާލުކަމެއް ލިބިގެންދިޔަ އެއް ވާހަކަކަން ފާހަގަކޮށްލެވެއެވެ. އެގޮތުން އެމްޑީޕީ ސަރުކާރުގެ ފަސް އަހަރު ނިމިގެންދިޔައިރު، އެމްއެމްޕީއާރުސީ ހިޔާނާތުގައި ހިމެނޭ އެއްވެސް ފަރާތެއްގެ މައްސަލަ ޔައުޤޫބު ނިސްބަތްވެ ވަޑައިގަންނަވާ ސަރުކާރަށް ނުބެލުނުކަމީ ގިނަ ބަޔަކު މިއަދުވެސް ދައްކަމުން އަންނަ ވާހަކައެކެވެ.
Advertisement
This content is created and paid for by advertisers and does not involve Voice Journalists
