އެމެރިކާއިން ޔަމަނަށް ވަރުގަދަ ހަމަލާތަކެއް ދީފައިވަނިކޮށް ޔަމަނުގައިވެރިކަންކުރާ ހޫޘީން އަނެއްކާވެސް އިސްރާއީލާ ގުޅުންހުރި ބޯޓަކަށް ހަމަލާތަކެއްދީފިއެވެ.
އިސްރާއީލަށް ނިސްބަތްވާ ބޯޓަކަށް ހޫޘީން ހަމަލާދީފައިވާކަން އަލް ޖަޒީރާއިން ރިޕޯޓްކޮށްފައިވާއިރު، ހޫޘީންވެސް ވަނީ ރަތްކަނޑުން ދަތުރުކުރަމުންދިޔަ އިސްރާއީލަށް ނިސްބަތްވާ ބޯޓަކަށް ހަމަލާދިންކަމަށް ބުނެފައެވެ. މިކަމާ ގުޅޭގޮތުން ހޫޘީން ބުނެފައިވަނީ އިސްރާއީލުން ޣައްޒާގެ މުސްލިމުންނާ ދެކޮޅަށް ދޭ ހަމަލާތައް ނުހުއްޓައި އަދި އެހީދޭ ޖަމާއަތްތަކުގެ މަސައްކަތްތަކަށް ދަތިކުރާހާ ހިނދަކު، އެ ޖަމާއަތުގެ ކަނޑުމަތީގެ އޮޕަރޭޝަންތައް ކުރިއަށްގެންދާނޭކަމަށެވެ.
ހޫޘީން ވަނީ މީގެ ކުރިން އެތައް ފަހަރަކު، އިސްރާއީލުން ޣައްޒާގެ މުސްލިމުންނާ ދެކޮޅަށް ދޭ ހަމަލާތައް ނުހުއްޓާހާ ހިނދަކު އެޖަމާއަތުންދޭ ހަމަލާތައް ހުއްޓާނުލާނޭކަމަށް ބުނެފައެވެ. އިސްރާއީލަށް ނިސްބަތްވާ އެ ބޯޓަށް ހޫޘީން ދިން އެ ހަމަލާތަކާ ގުޅޭގޮތުން އެމެރިކާ އާއުި އިސްރާއީލުން އަދި މިހާތަނަށް އެއްވެސް އެއްޗެކޭ ބުނެފައެއް ނުވެއެވެ.
އެމެރިކާއިން އެންމެފަހުން ޔަމަނަށް ދިން ހަމަލާތަކުގައި 30 ހަށްވުރެ ގިނަ މީހުން ޝަހީދުކޮށްލިއިރު، މި ހަމަލާތަކާ ގުޅޭގޮތުން ހޫޘީން ބުނެފައިވަނީ، އެމެރިކާއިން ދިން ހަމަލާތަކުގައި ގިނައިން މަރުވެފައިވަނީ އަންހެނުންނާއި ކުޑަކުދިން ކަމަށެވެ. އެމެރިކާއިން ހޫޘީންނަށް އަމާޒުކޮށް ހަމަލާތަކެއް ދީފައިމިވަނީ، އެ ޖަމާއަތުގެ ވަސް ފިލުވާލާނޭކަމަށް އެމެރިކާގެ ރައީސް ޓްރަމްޕް ބުނެފައިވަނިކޮށެވެ.
ރަތްކަނޑުން ދަތުރުކުރާ އިސްރާއީލަށް ނިސްބަތްވާ ބޯޓުތަކަށް ހޫޘީން ދޭ ހަމަލާތައް އިތުރުވެފައިވާއިރު، އެމެރިކާއިން ވަނީ އެ ޖަމާއަތާ ދެކޮޅަށް ވަރުގަދަ އަސްކަރީ އޮޕަރޭޝަނެއް ފަށާފައެވެ. އެމެރިކާއިން އެންމެފަހުން ޔަމަނަށްދިން ހަމަލާތަކަކީ މި އޮޕަރޭޝަނުގެ ބައެކެވެ.
Advertisement
This content is created and paid for by advertisers and does not involve Voice Journalists
