އެމެރިކާއިން ޔަމަނަށް ދިން ހަމަލާތަކުގައި މަރުވިމީހުންގެ އަދަދު 53 ކަށް އަރައިފިކަމަށް ޔަމަނުގައި ވެރިކަންކުރާ ހޫޘީން ބުނެފިއެވެ.

އަލްޖަޒީރާއާ ވާހަކަދައްކަވަމުން ހޫޘީންގެ ހެލްތް މިނިސްޓްރީގެ އޮފިޝަލަކު ވިދާޅުވީ، އެމެރިކާއިން އެޤައުމަށް ދިން ހަމަލާތަކުގައި 53 މީހަކު މަރުވެފައިވާއިރު އޭގެ ތެރޭގައި 4 ކުޑަކުދިން ހިމެނޭކަމަށެވެ. ކުރިއަށްއޮތްތަނުގައި މިއަދަދު އިތުރުވުން އެކަށީގެންވާކަމަށް އޮފިޝަލް ވިދާޅުވިއެވެ.

ހޫޘީންގެ ވެރިކަން އޮންނަ ޔަމަނަށް އެމެރިކާއިން ހަމަލާދީފައިމިވަނީ ރަތްކަނޑުގައި ދަތުރުކުރަމުންދާ ބޯޓުތަކަށް ހޫޘީން ހަމަލާތައްދޭތީވެ، އެކަން ހުއްޓުވުމަށްކަމަށް ބުނެއެވެ. އެމެރިކާއިން ޔަމަނަށް ހަމަލާދިންފަހުން ހޫޘީން އެމެރިކާގެ އަސްކަރީ އުޅަނދަކަށް ހަމަލާދީ ވައްޓާލާފައެވެ. މީގެ އިތުރުން ރަތްކަނޑުން ދަތުރުކުރަމުންދިޔަ އިސްރާއީލާ ގުޅުން އޮތް ބޯޓަކަށްވެސް ހަމަލާދީފައިވާކަމަށް މެދުއިރުމަތީގެ ބައެއް މީޑިއާތަކުން ވަނީ ރިޕޯޓްކޮށްފައެވެ.

ހޫޘީންގެ މައްސަލާގައި އެންމެފަހުން އެމެރިކާއިން ވަނީ އީރާނަށްވެސް އިންޒާރެއްދީފައެވެ. އީރާނުން ހޫޘީންނަށް މަދަދުވެރިވަމުންދާތީވެ، އެކަން ހުއްޓާލުމަށް އެމެރިކާއިން ވަނީ ނުސީދާގޮތުން އެ ޤައުމަށް އިންޒާރެއްދީފައެވެ. މިކަމާ ގުޅިގެން އީރާނުގެ ހާރިޖީ ވަޒީރު އައްބާސް އަރަގްޗީ ވިދާޅުވެފައިވަނީ، އީރާނުގެ ހާރިޖީ ސިޔާސަތު ބަދަލުކުރުމަކީ އެމެރިކާއަށް ލިބިގެންވާ ހައްޤެއް ނޫންކަމަށް ވިދާޅުވެފައެވެ. ހަމަ އެހެންމެ ޔަމަނުގެ ރައްޔިތުން މެރުމުގެ އެއްވެސް ހައްޤެއް އެމެރިކާއަށް ލިބިގެން ނުވާކަމަށްވެސް އޭނާ ވަނީ ވިދާޅުވެފައެވެ.

އެމެރިކާ އާއި ހޫޘީންނާ ދެމެދު ހަމަލާތައް ބަދަލުކުރުން ފެށިފައިވާއިރު، ހޫޘީން ބުނެފައިވަނީ، އިސްރާއީލުން ފަލަސްތީނުގެ ޣައްޒާގެ މުސްލިމުންނާ ދެކޮޅަށް ހިންގަމުންގެންދާ އަނިޔާވެރިކަން ނުހުއްޓާހާ ދުވަހަކު ހޫތީންވެސް މައިތިރިނުވާނޭ ކަމަށެވެ. މިފަހުން ހޫޘީން ރުޅިގަދަވެފައިވަނީ، ބައިނަލްއަޤްވާމީ އެކި ފަރާތްތަކުން ޢައްޒާއަށް ފޯރުކޮށްދެމުންދާ އެހީތެރިކަމަށް ހުރަސްއަޅާތީއެވެ. ހޫޘީން ވަނީ ޢައްޒާއަށް އެހީގެ ތަކެތި ވެއްދުމަށް ކުރާ މަސައްކަތްތަކަށް ހުރަސް ނޭޅުމަށް އިސްރާއީލްގެ ކިބައިން އެދިފައެވެ.