ކަވާބަކީ ވަރަށް ގިނަ ގޭގޭގެ ރޯދަ ވީއްލާ ސުފުރާމަތިން ފެންނަ މީރު ހެދިކާއެކެވެ. ބައެއް މީހުން ފުށުން ކަވާބު ހަދާއިރު އަނެއް ބަޔަކު އެ ހަދައި އުޅެނީ ހަނޑުލުންނެވެ. އެގޮތުން ހަދާ ކަވާބު މުރަނަ ނުވާ މައްސަލަ ބައެއް ފަހަރު ކުރިމަތިވާއިރު، މިއަދު ވޮއިސްގެ ބަދިގެއިން މި ގެނެސްދެނީ މުރަނަކޮށް މީރުކޮށް ކަވާބު ހަދާނެ ގޮތެވެ. މިގޮތަށް ހެދޭނީ ވަރަށް ކެތްތެރި މީހުންނަށެވެ. 

1 ޖޯޑު ހަނޑޫ (ފެނުއަޅައި މަޑުކޮށް، ހިމުންކޮށް މުގުރާފަ)

1 ބޮޑު ފިޔާ (ތުނިކޮށް ކޮށާފައި) 

1/2 ޖޯޑު ހުނި

1/2 ޖޯޑު ވަޅޯމަސް (ހިމުން ކޮށްފައި) 

1/2 ސައިސަމުސާ ގާނާފައިހުރި އިނގުރު

1/2 ސައިސަމުސާ ގާނާފައި ހުރި ލޮނުމެދު

1/4 ސައި ސަމުސާ އަސޭމިރުސް

1 1/4 ސައި ސަމުސާ ލޮނު (ނޫނީ ރަހަލާ ވަރަށް)

2 ލުނބޯ 

1/4 ސައިސަމުސާ ރީނދޫ

ގިތެޔޮ މިރުސް (ތުނިކޮށް ކޮށާފައި)

ހިކަނދިފަތް (ކުދިކޮށް ކޮށާފައި)

ތެޔޮ

1) ބޯތަށްޓަކަށް ފިޔާއާއި، އިނގުރާއި، ލޮނުމެދާއި، ލޮނާއި، އަޅާފައި ލުނބޯ ހުތް ޖަހައިގެން ރަނގަޅަށް މޮޑޭށެވެ.

2) ދެން ހިކަނދިފަތާއި، ގިތެޔޮމިރުހާއި، އަސޭމިރުހާއި، ރީނދޫކޮޅުވެސް އެއަށް އަޅާފައި އަނެއްކާވެސް ހުރިހާ އެއްޗެއް ރަނގަޅަށް އެއްވަންދެން މޮޑެލާނީއެވެ. އެއަށްފަހު ހުނި ކޮޅު އަޅާލައިގެންވެސް ރަނގަޅަށް މޮޑެލާފައި މަސް އަޅައިގެންވެސް މޮޑެލާށެވެ.

3) ދެން މޮޑުނު މަސްގަނޑުގެ ތެރެއަށް ހިމުންކޮށް ފުނޑާފައިހުރި ހަނޑޫ އަޅާފައި މޮޑެލާށެވެ. މާ ހިކި ނަމަ ކުޑަފެންފޮދެއް އަޅާލާށެވެ. 

4) އެއަށްފަހު އެއިން ކުދި ކަވާބު ހަދާށެވެ. ކަވާބުގެ ބޮޑުމިން ހުންނަންވާނީ ގާތްގަނޑަކަށް އިންޗިއަކަށްވުރެ ކުޑަތަންކޮޅެއް ބޮޑު ކޮށެވެ. މިކަމަށް ފުދޭ ވަރަކަށް ވަގުތު ދާނެއެވެ. 

5) ދެން ތާހަށް ތެޔޮ އެޅުމަށްފަހު، ތެޔޮ ރަނގަޅަށް ހޫނު ވުމުން ކަވާބު ތެލުލަން އަޅާލާށެވެ. ތެލުލަން އަޅާލާ ވަގުތު ގިނި ބަހައްޓަންވާނީ އާދައިގެ ވަރަކަށް ގަދަކޮށެވެ. ގާތް ގަނޑަކަށް 30 ސުކުންތު ވަންދެން ގަދަ ގިނީގައި އުނދުން ބެހެއްޓުމަށްފަހު، ކަވާބު ކޮޅު ހަލުވާލާށެވެ. ދެން ގިނި މަޑު ކޮށްލާށެވެ. މަޑު ގިނީގައި ހަލުވަމުން ކަވާބު ތެލު ލާށެވެ. ކަވާބު ރަންމުށި ކުލަ އެރުމުން، ގިނި ގަދަކޮށްލުމަށްފަހު އަވަހަށް ކަވާބުކޮޅު ތެޔޮފޮދުން ނަގާށެވެ. މި ގޮތަށް ބާކީ ކަވާބުވެސް ތެލުލާށެވެ. އެއްފަހަރާ މާ ގިނަ ކަވާބު ނާޅަން ސަމާލުވާންވާނެއެވެ.