ޗައިނާގެ ނުފޫޒާ ކުރިމަތިލުމަށް ނުރަސްމީކޮށް ހަރަކާތްތެރިވާ ސްކޮޑް ގްރޫޕްގައި އިންޑިއާ އަދި ދެކުނު ކޮރެއާ ހިމެނުމަށް މަސައްކަތްކުރަމުންދާކަމަށް ފިލިޕީންސްއިން ހާމަކޮށްފިއެވެ.
ސްކޮޑްގައި ހިމެނޭ ގައުމުތަކަކީ އޮސްޓްރޭލިއާ، ޖަޕާން، ފިލިޕީންސް އަދި އެމެރިކާއެވެ. މި ގައުމުތަކުން ދަނީ ޗައިނާގެ ނުފޫޒު ދެކުނު ޗައިނާ ކަނޑުގައި ފުޅާވިޔަ ނުދިނުމަށް ގުޅިގެން އަސްކަރީ ތަމްރީނުތައް ހިންގަމުންނެވެ. ސްކޮޑަކީ އޮސްޓްރޭލިއާ، އިންޑިއާ، ޖަޕާން އަދި އެމެރިކާ ގުޅިގެން ދިފާޢީ، ސަލާމަތީ އަދި ޚާރިޖީ ކަންކަމާ ބެހޭ ގޮތުން މަޝްވަރާކުރުމަށް އުފައްދާފައިވާ ކުއަޑް އާއި މުޅިން ތަފާތު އެއްޗެކެވެ. ކުއަޑްގައި ފިލިޕީންސްއެއް ނުހިމެނެއެވެ. ސްކޮޑްގައި ހިމެނޭ ގައުމުތަކުން ދެކުނު ޗައިނާ ކަނޑުގައި ގުޅިގެން އަސްކަރީ ތަމްރީނުތައް ހިންގުމުގެ އިތުރުން އިންޓެލިޖެންސް މައުލޫމާތު ހިއްސާކޮށް، ބައެއް އޮޕަރޭޝަންތައް ގުޅިގެން ހިންގައެވެ.
ފިލިޕީންސްގެ އަސްކަރިއްޔާގެ ވެރިޔާ ޖެނެރަލް ރޯމިއޯ ބްރޯނާރ ވިދާޅުވީ އިންޑޯޕެސިފިކްގައި ޗައިނާގެ ނުފޫޒު ފެތުރުން ހުއްޓުވުމަށް، ސްކޮޑްގައި ދެކުނު ކޮރެއާ އަދި އިންޑިއާ ހިމެނުން މުހިއްމުކަމަށާއި، އެކަމަށް މަސައްކަތްކުރަމުންދާ ކަމަށެވެ. ބްރޯނާ މިކަން ހާމަކުރެއްވީ އިންޑިއާގެ އޮބަޒާވަރ ރިސަރޗް ފައުންޑޭޝަނުން ކޮންމެ އަހަރަކު ދިއްލީގައި ބާއްވާ މަޝްހޫރު ރައިޒީނާ ޑައިލޮގްގައި ވާހަކަ ދައްކަވަމުންނެވެ. ބްރޯނާ ވިދާޅުވީ އިންޑިއާއާއި ޗައިނާގެ ދުޝްމަނަކީ އެއް ގައުމެއްކަމަށެވެ. ޗައިނާއަކީ ދުޝްމަނެއްކަމަށް ވިދާޅުވާން ފަސްނުޖެހޭ ކަމަށްވެސް ޖެނެރަލް ބްރޯނާ ވިދާޅިވިއެވެ.
ބްރޯނަރ ވިދާޅުވީ ޗައިނާއާއި ދެކޮޅަށް ހަރަކާތްތެރިވުމުގެ ގާބިލްކަން ފިލިޕީންސްއިން އިތުރުކުރަމުން އަންނަކަމަށެވެ. ފިލިޕީންސް ވެފައިވަނީ ކޮންމެ ހަފްތާއަކުކަހަލަ ގޮތަކަށް ދެކުނު ޗައިނާ ކަނޑުގައި ޗައިނާއާއި ކޮންމެވެސް ގޮތަކުން ކުރިމަތިލާ ގައުމަކަށެވެ. ދެކުނު ޗައިނާ ކަނޑަކީ އެގައުމުގެ ސަރަހައްދެއްކަމަށާއި، ދެކުނު ޗައިނާ ކަނޑުގައިވާ ޖަޒީރާތަކަކީވެސް އެގައުމުގެ ބައެއްކަމަށް ޗައިނާއިން ދައުވާކުރެއެވެ. އެހެންނަމަވެސް 2016 ވަނަ އަހަރު ބައިނަލްއަޤްވާމީ ޓްރައިބިއުނަލަކުން ނިންމީ ޗައިނާއިން ދައްކަނީ އަސްލެއް ނެތް ވާހަކަތަކެއްކަމަށެވެ.
Advertisement
This content is created and paid for by advertisers and does not involve Voice Journalists
