ކެނެޑާގައި އަންނަ މަހު ފަހުކޮޅު ބާއްވާ އާއްމު އިންތިޚާބަށް ނުފޫޒު ފޯރުވުމަށް އިންޑިއާއާއި ޗައިނާއިން މަސައްކަތްކުރާނެކަމަށް ބެލެވޭކަމަށް ކެނެޑާއިން ބުނެފިއެވެ.
ކެނެޑާގެ ޖާސޫސީ އިދާރާ، ކެނޭޑިއަން ސެކިއުރިޓީ އިންޓެލިޖެންސް ސަރވިސްއިން ބުނީ އެ ދެގައުމުގެ އިތުރުން ރަޝިޔާއާއި ޕާކިސްތާނުންވެސް އިންތިޚާބުގެ ތެރެއަށް ނުފޫޒު ވެއްދުމަށް މަސައްކަތްކޮށްފާނެކަމަށެވެ. ކެނެޑާއިން އިންޑިއާއާއި ޗައިނާއާށް މިތުހުމަތުކޮށްފައިވަނީ އެ ދެ ގައުމާ ކެނެޑާއާއެކު އޮންނަ ގުޅުން ހީނަރުވެފައިވާ ދަނޑިވަޅެއްގައެވެ. އިންޑިއާއާއި ޗައިނާއިން މީގެ ކުރިން އިންތިޚާބުތަކަށްވެސް ނުފޫޒު ފޯރުވިކަމުގެ ތުހުމަތު ކެނެޑާއިން ކުރާއިރު، އެ ދެގައުމުންވެސް އެ ތުހުމަތުތައް ދޮގުކުރެއެވެ.
2019 ވަނަ އަހަރާއި 2021 ވަނަ އަހަރުގެ އިންތިޚާބުތަކަށްވެސް ޗައިނާއާއި އިންޑިއާއިން ނުފޫޒު ފޯރުވަން މަސައްކަތްކުރިއިރު، އެކަމާ ދެކޮޅަށް ކެނެޑާއިން އެކަށީގެންވާ ރައްދެއް ދީފައިނުވާއިރު، އެދެގައުމުން ކުރި މަސައްކަތުން އިންތިޚާބުގެ ނަތީޖާއަށް ބަދަލެއް ގެނެވިފައިނުވާކަމަށް ދާދިފަހުން ކެނެޑާ ސަރުކާރުން ނެރުނު ރިޕޯޓެއްގައި ބުނެފައިވއެވެ.
ކެނެޑާގެ ޖާސޫސީ އިދާރާއިން ބުނީ ހަތުރުވެރި ގައުމުތަކުން، ޚާއްސަކޮށް ޗައިނާއިން، އާޓިފިޝަލް އިންޓެލިޖެންސް އާލާތްތަކާއި އުކުޅުތައް ބޭނުންކޮށްގެން އެޕްރީލް 28 ވަނަ ދުވަހު ބާއްވާ އާއްމު އިންތިޚާބުގެ ނަތީޖާއަށް ނުފޫޒު ފޯރުވުމަށް މަސައްކަތްކުރާނެކަމަށް ބެލެވޭ ކަމަށެވެ.
Advertisement
This content is created and paid for by advertisers and does not involve Voice Journalists
