ޢައްޒާސިޓީން ފަލަސްތީނުގެ ރައްޔިތުން ބޭރުކޮށް، ޔަހޫދީ އާބާދީތައް އިތުރު ކުރަމަށް ކުރަމުންގެންދާ މަސައްކަތްތައް ރާއްޖެއިން އަނެއްކާވެސް ކުށްވެރިކޮށްފިއެވެ.

އިސްރާއީލުން ވަނީ ޢައްޒާއިން ފަލަސްތީނުގެ ރައްޔިތުން ބޭރުކޮށް، އިސްރާއީލުގެ އާބާދީތައް އިތުރުކުރުމުގެ ހަރަކާތްތަކެއް ފަށާފައެވެ. މިކަމާ ގުޅިގެން ދިވެހި ހާރިޖިއްޔާއިން ނެރެފައިވާ ބަޔާނެއްގައި ބުނެފައިވަނީ، ލަސްޠީނުގެ ރައްޔިތުން މަޖުބޫރުން ޣައްޒާއިން ބޭރުކުމުގެ މަޤްޞަދުގައި އޭޖެންސީއެއް ޤާއިމުކުރުމަށް އިސްރާއީލު ސަރުކާރުން ކޮށްފައިވާ އިޢުލާނާއި ހުޅަނގު އައްސޭރީގައިވާ 13 ޣައިރުޤާނޫނީ އާބާދީ ހިމެނޭ ސަރަޙައްދު ވަކިކޮށް، އެ އާބާދީތަކަށް ޤާނޫނީ ހައިސިއްޔަތު ދިނުމަށް ތައްޔާރުވުމުގެގޮތުން ރާވާފައިވާ ރޭވުންތައް ދިވެހި ސަރުކާރުން އެންމެ ހަރުކަށި ޢިބާރާތުން ކުށްވެރިކުރާ ކަމަށެވެ.

ދިވެހި ހާރިޖިއްޔާއިން ބުނީ ފަލަސްޠީނުގެ ރައްޔިތުން އެބައިމީހުންގެ ބިމުން ނެރުމަށް ހިންގާ މިފަދަ ޢަމަލުތަކަކީ ބައިނަލްއަޤްވާމީ ޤާނޫނާއި އދ.ގެ ޤަރާރުތަށް، ޚާއްޞަކޮށް އދ.ގެ ސަލާމަތީ މަޖިލީހުގެ ޤަރާރު 2334 އާ މުޅިން ޚިލާފު އަމަލުތަކެއްކަމުގައި ދިވެހި ސަރުކާރުން އަބަދުވެސް ޤަބޫލުކުރާ ކަމަށެވެ. އަދި މިފަދަ އަމަލުތަކަކީ ޞުލްޙައަށް ކުރެވޭ މަސައްކަތްތަކަށް ހުރަސްއެޅޭ އަދި ފަލަސްޠީނުގެ ރައްޔިތުންގެ ޙައްޤުތަކާއި ކަރާމާތަށް ނުރައްކާވާފަދަ ކަންތައްތައްކަމަށް ހާރިޖިއްޔާގެ ބަޔާނުގައި ފާހަގަކުރިއެވެ.

އެގޮތުން ހަމަނުޖެހުމަށް ދެމެހެއްޓެނިވި، ޞުލްޙަވެރި ޙައްލެއް ހޯދޭނީ 1967 ވަނަ އަހަރުގެ ކުރިން ކަނޑައެޅިފައިއޮތް އިންތަކުގެ މައްޗަށް ބިނާކޮށް، އިރުމަތީ ޤުދުސްއަކީ ފަލަސްޠީނުގެ ވެރިކަންކުރާ ރަށްކަމުގައި ކަނޑައަޅައި، ފަލަސްޠީނަކީ މިނިވަން، މުސްތަޤިއްލު އަދި އަމިއްލަ ސިޔާދަތީ ބާރުހިނގާ ދައުލަތެއްގެގޮތުގައި ޤާއިމުކުރެވުމުންކަމުގައި ދިވެހި ސަރުކާރުން ދެކޭކަމަށްވެސް ބަޔާނުގައި ވަނީ ބުނެފައެވެ. 

އިސްރާއީލުން ފަލަސްތީނު ރައްޔިތުންނާ ދެކޮޅަށް 2023 ވަނަ އަހަރުގެ އޮކްޓޯބަރުމަހުން ފެށިގެން ހިންގަންފެށި އުދުއާންތަކުގައި ފަލަސްތީނުގެ 50،000 ހާހަށްވުރެ ގިނަ ރައްޔިތުންގެ ފުރާނަ ގެއްލުވާލާފައިވާކަމަށް ބައިނަލްއަޤްވާމީ ރިޕޯޓްތައް ބުނެއެވެ. އިސްރާއީލްގެ މަޤްސަދަކީ ފަލަސްތީނު ރައްޔިތުންނަށް ބިރުދައްކައިގެން އެމީހުންގެ ބިންތައް ފޭރިގަތުންކަމުގައި ވީނަމަވެސް އިސްރާއީލްގެ އެ މަޤްސަދު ފުރިހަމަވިޔަ ނުދޭނޭކަމަށް ފަލަސްތީނު ރައްޔިތުން އަންނަނީ ބުނަމުންނެވެ.