ކީރިތި ޤުރުއާން ހިތުދަސްކުރުމުގެ މަޝްރޫއު އަހަރަކު 100 ހާފިޒުން އުފެއްދޭ މިންވަރަށް ފުޅާކުރެއްވުމަކީ އަމާޒެއް ކަމަށް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު މިރޭ ވިދާޅުވެއްޖެ އެވެ.
އެމަނިކުފާނު މިހެން ވިދާޅުވީ ހާފިޒުކަމުގެ ތާޖު އެރުވޭ ހަފްލާ އަކީ ވަކީން ބޭއްވޭ ގައުމީ ފެންވަރުގެ ބޮޑު ހަފްލާއަކަށް ހައްދަވަން ނިންމަވާ މިރޭ ބޭއްވި ފުރަތަމަ ހަފްލާގައި ވާހަކަފުޅު ދައްކަވަމުންނެވެ.
މިނިސްޓަރު ޝަހީމް ވިދާޅުވީ ކީރިތި ޤުރުއާން ހިތުދަސްކުރުމުގެ މަޝްރޫއު ވަރަށް ބޮޑަށް ފުޅާ ކުރައްވާނެ ކަމަށެވެ. އެ ގޮތުން އިސްލާމީ މަރުކަޒުތައް ގާއިމުކޮށްފައިވާ ކޮންމެ ރަށެއްގައި އެ މަޝްރޫއު ފުޅާކޮށް ކުރިއަށް ގެންދަވާނެ ކަމަށާ އިސްލާމީ މަރުކަޒުތައް ނެތް ރަށްރަށުގައި މިސްކިތްތަކުގައި އެ މަޝްރޫއު ކުރިއަށް ގެންދަވާނެ ކަމަށެވެ.
ހާފިޒު ކަމުގެ ސަނަދު ހަވާލުކުރުން -- ފޮޓޯ: ރައީސް އޮފީސް
އަދި ވިދާޅުވީ ކީރިތި ޤުރުއާން ހިތުދަސްކުރުމަށް ހާއްސަކޮށް ހިންގާ ޤުރުއާން ކިލާސްތަކަށް ވެސް ސަރުކާރުން އެހީތެރިވެ ދެއްވާނެ ކަމަށެވެ. އެ މަސައްކަތްތަކާއެކު ހާފިޒުން އުފެއްދޭ މިންވަރު ވަރަށް ބޮޑަށް އިތުރުވެގެންދާނެ ކަމަށް މިނިސްޓަރު ވިދާޅުވި އެވެ.
އަދި ވިދާޅުވީ ސަރުކާރުގެ އަމާޒަކީ އަހަރަކު 100 ހާފިޒުން އުފެއްދޭ މިންވަރަށް އެ މަޝްރޫއު ފުޅާ ކުރެއްވުން ކަމަށެވެ.
ޒުވާން ޚަތީބުން އުފެއްދުން: ދައުރުތެރޭ 1000 ޚަތީބުން
މިނިސްޓަރު މިރޭ ވިދާޅުވި ގޮތުގައި ޒުވާން ޚަތީބުން އުފެއްދުމަށް ސަރުކާރުން ފަށާފައިވާ މަޝްރޫއު ވެސް ފުޅާ ކުރައްވާނެ އެވެ. އެ މަސައްކަތަށް ވަރަށް ބޮޑު އިސްކަމެއް ދެއްވާނެ ކަމަށް ވެސް ވިދާޅުވި އެވެ.
ޒުވާން ޚަތީބުން އުފެއްދުމަށް ފަށާފައިވާ މަސައްކަތުގެ ދަށުން މިހާތަނަށް 250 ވުރެ ގިނަ ޒުވާނުން ތަމްރީނު ކޮށް ނިމިފައިވާ ކަމަށް މިނިސްޓަރު ވިދާޅުވި އެވެ.
އަޅުގަނޑުމެންގެ އަމާޒަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ މި ދައުރުތެރޭ 1000 ޒުވާން ޚަތީބުން ތަމްރީނު ކުރުން
ޑރ. މުޙައްމަދު ޝަހީމް އަލީ ސައީދު | އިސްލާމިކް މިނިސްޓަރު
ޒުވާން ހަތީބުން ތަމްރީނު ކުރުމުގެ މަސައްކަތަށާއި ހާފިޒުން އުފެއްދުމަށް ސަރުކާރުން ކުރަމުންދާ މަސައްކަތަށް ހުރިހާ ފަރާތްތަކުން އެހީތެރިކަން ދެއްވުމަށް ވެސް މިނިސްޓަރު އިލްތިމާސް ކުރެއްވި އެވެ. ހާއްސަކޮށް ތަނަވަސް ކަމުގެ އަހުލުވެރީން އެކަމުގައި އިސް ނެންގެވުމަށް އެދިވަޑައިގަތެވެ.
މިރޭގެ ރަސްމިއްޔާތު ގައި ހާފިޒު ކަމުގެ ސަނަދު ހާސިލުކުރި 24 ދަރިވަރަކާއި މީހަކަށް ވަނީ ސަނަދު ހަވާލުކޮށްފަ އެވެ. ސަނަދު ހަވާލުކޮށް ދެއްވީ ރައީސުލްޖުމްހޫރިއްޔާ ޑރ. މުހައްމަދު މުއިއްޒެވެ.
Advertisement
This content is created and paid for by advertisers and does not involve Voice Journalists
