Advertisement

އިންޑިއާގެ އުފެއްދުންތައް އިމްޕޯޓްކުރުން އިތުރުކުރަން ތައްޔާރު: ޗައިނާ

03 Apr 2025 | 11:59
ޗައިނާއިން އިންޑިއާއަށް މުދާ ހިފައިގެންދާ ކާގޯ ބޯޓެއް... ފޮޓޯ: އޭބީޕީ ނިއުސް

އިންޑިއާގެ އުފެއްދުންތައް ޗައިނާއަށް އެތެރެކުރާ މިންވަރު އިތުރުކުރަން ޗައިނާއިން ތައްޔާރުކަމަށް ޗައިނާއިން އިންޑިއާއަށް ކަނޑައަޅާފައި ހުންނަވާ ސަފީރު ޝޫ ފެއިހޮންގް ވިދާޅުވެއްޖެއެވެ.

އޭނާ މިހެން ވިދާޅުވީ ޗައިނާއާއި އިންޑިއާގެ ސިޔާސީ ގުޅުމަށް 75 އަހަރު ފުރުމާއި ދިމާކޮށް ޗައިނާގެ ގްލޯބަލް ޓައިމްސްއާ ވާހަކަ ދައްކަވަމުންނެވެ. ޝޫ ވިދާޅުވީ އިންޑިއާގެ ވިޔަފާރިވެރިން ހިމާލިޔާ ފަރުބަދަތައް ހުރަސްކޮ، ޗައިނާއަށް އައިސް ޗައިނާގައި އިތުރު ވިޔަފާރިތައް ކުރުމަށް ދައުވަތު ދެއްވާކަމަށެވެ.

2020 ވަނަ އަހަރު ސަރަހައްދީ ރޮނގުގައި ހިނގި ކުރިމަތިލުންތަކަކަށްފަހު ޗައިނާއާއި އިންޑިއާގެ ގުޅުން ވަރަށް ބޮޑަށް ހީނަރުވިއެވެ. އެހެންނަމަވެސް މިދިޔަ އަހަރުގެ އޮކްޓޯބަރު މަހު ދެގައުމުގެ މެދުގައި ކުރެވުނު މަޝްވަރާތަކަށްފަހު އަނެއްކާވެސް ގުޅުން ބަދަހިކުރުމަށް ވާދަވެރި ދެގައުމުން ދަނީ މަސައްކަތްކުރަމުންނެވެ. 2020ގެ ޙާދިސާއަށްފަހު ޗައިނާއިން އިންޑިއާގައި އިންވެސްޓްކުރުމުގެ މަގުތައް ބަންދުކޮށްފައިވާއިރު، އެމަގުތައް އަދިވެސް ހުޅުވައެއް ނުލައެވެ.

Advertisement

އެމެރިކާއިން ފަށާފައިވާ 'ވިޔަފާރީގެ ހަނގުރާމަ'އާއެކު ގޮންޖެހުންތައް ކުރިމަތިވެފައިވާ އިންޑިއާއާއި ޗައިނާއަށްވެސް ދެގައުމުން އެއްގައުމު އަނެއް ގައުމާއެކު ކުރާ ވިޔަފާރި އިތުރުކުރުމަށް މަޖުބޫރީ ޙާލަތުގައިނަމަވެސް މިހާރު އޮތީ ފުރުސަތުތަކެއް ފަހިވެފައެވެ. ޝޫ ވިދާޅުވީ އިންޑިއާއަށް ޗައިނާގައި ވިޔަފާރިކުރަން ދައުވަތުދޭ ފަދައިން، ޗައިނާގެ ކުންފުނިތަކަށް އިންޑިއާގައި ވިޔަފާރިކުރުމަށް އިންސާފުވެރި ފުރުސަތުތަކެއް ލިބިގެންދާނެކަމަށް އުއްމީދުކުރައްވާކަމަށެވެ.

ސިޔާސީ ގުޅުމަށް 75 އަހަރު ފުރުމުގެ މުނާސަބަތުގައި ޗައިނާގެ ރައީސް ޝީ ޖިންގްޕިންގް، އިންޑިއާގެ ރައީސާ ޑްރޮޕަޑީ މުރްމޫއަށް ފޮނުއްވި މެސެޖްގައި ވިދާޅުވީ ދެގައުމު ކައިރިން ގުޅިގެން އިތުރަށް މަސައްކަތްކުރަން ޖެހޭކަމަށެވެ.

Advertisement

ކޮމެންޓް

Advertisement

Advertisement