އެމެރިކާ އާއި އީރާނާ ދެމެދު އަންނަ ހޮނިހިރު ބޭއްވުމަށް ހަމަޖެހިފައިވަނީ ކޮންކަހަލަ ވާހަކަތަކެއްތޯ ކަނޑައެޅުމުގައި އެންމެފަހުން ދެޤައުމުގެ އިސްވެރިންގެ މެދުގައި ބޮޑު އަރާރުމަކަށް ހިނގައްޖެއެވެ.

އީރާނުގެ ނިއުކްލިއާ ޕްރޮގްރާމް ހުއްޓުމަކަށް ގެނައުމަށް އެމެރިކާއިން ރާވަމުންދާ ރޭވުމުގެ ދަށުން، އިއްޔެ ވައިޓްހައުސްގައި ވާހަކަދައްކަވަމުން ރައީސް ޑޮނާލްޑް ޓްރަމްޕް ވަނީ އީރާނާއެކު ސީދާ ވާހަކަތައް ބޭއްވުމަށް ނިންމާފައިވާކަން ހާމަކޮށްފައެވެ. ޓްރަމްޕް ވިދާޅުވީ މިކަން ވެގެންދާނީ ކުރެވޭ ވަރަށް މޮޅުކަމެއް ކަމަށެވެ. ބައްދަލުވުން ބާއްވާނީ އަންނަ ހޮނިހިރުދުވަހު ކަމަށްވެސް ޓްރަމްޕް ވަނީ ވިދާޅުވެފައެވެ.

ޓްރަމްޕްގެ މި ވާހަކަތައް އީރާނުގެ ހާރިޖީ ވަޒީރު، އައްބާސް އަރްގްޗީ ވަނީ ދޮގުކުރައްވާފައެވެ. އަރްގްޗީ އެކްސްގައި ކުރެއްވި ޕޯސްޓެއްގައި ވިދާޅުވީ، އީރާނާ އެމެރިކާ އާ ދެމެދު ވާހަކަތައް ބޭއްވިނަމަވެސް އެކަން ކުރިއަށްދާނީ ނުސީދާ ވާހަކަތަކެއްގެ ގޮތުގައި ކަމަށެވެ. މިގޮތުން އޮމާންގައި ކުރިއަށްދާ ވާހަކަތަކުގައި މެދުވެރިއެއްގެ ބައި އޮމާނުން އަދާކުރާނޭކަމަށް އޭނާ ވިދާޅުވިއެވެ.

އީރާނުގެ ފޮރިން މިނިސްޓަރު މި ބީދައިން ވާހަކަދައްކަވާފައިވަނިކޮށް، ވައިޓްހައުސްގެ ޕްރެސް ސެކެޓްރީ ކެރޮލައިން ލީވިޓް ވިދާޅުވީ އީރާނާއެކު ކުރިއަށްދާނީ ސީދާ ވާހަކަތަކެއްކަމަށް ވިދާޅުވެފައެވެ.

"އީރާނާ އެމެރިކާ އާ ދެޤައުމުގެ ދެމެދުގައި ކުރިއަށްދާނީ ސީދާ ވާހަކަތަކެއް" ކެރޮލައިން ވިދާޅުވިއެވެ. މިކަމާ ގުޅޭގޮތުން އިތުރު އެއްވެސް ވާހަކައެއް އޭނާ ނުދައްކަވައެވެ. އީރާނާ ދެމެދު ސީދާ ވާހަކަތައް ފެށުމަށް އެމެރިކާއިން ކުރަމުންގެންދާ މަސައްކަތްތަކަށް އީރާނބުން މިހާތަނަށް އާނބަސް ބުނެފައެއް ނުވެއެވެ. މިކަމާ ގުޅިގެން ރައީސް ޓްރަމްޕް ވަނީ އީރާނުން ވާހަކަތަކާ ދުރަށްދާނަމަ ތެހެރާނަށް ބޮން އަޅަންޖެހިދާނެކަމަށް ބުނެ ބިރުދައްކާފައެވެ. އީރާނަށް ބިރުދައްކަމުންދާ މައްސަލާގައި އެޤައުމުންވެސް ވަނީ އެމެރިކާގެ ބަހަށް ދީލާނުލާނޭކަމަށާއި، ހަމަލާ ދީފިނަމަ ރައްދުގައި ހަމަލާދޭނޭކަމަށް އިންޒާރުދީފައެވެ.