އެމެރިކާގެ އުފެއްދުންތަކަށް ޗައިނާއިން ނަގާ ޓެރިފް %84 ބޮޑުކޮށްފިއެވެ.

އެމެރިކާގެ ރައީސް ޑޮނާލްޑް ޓްރަމްޕް ވަނީ، އެޤައުމުގެ ޓެރިފް ރޭޓް ބޮޑުކޮށްފައެވެ. އެގޮތުން ޗައިނާގެ އުފެއްދުންތަކުން ނަގަމުން އަންނަ ޓެރިފް ރޭޓް ވަނީ މިފަހުން 34 އިންސައްތައަށް ބޮޑުކޮށްފައެވެ. އެހެންކަމުން އަލަށް ގެނައި ޓެރިފް ރޭޓާއެކު މިހާރު ޗައިނާއިން އެމެރިކާއަށް މުދަލެއް އެތެރެކުރާނަމަ، 54 އިންސައްތައިގެ ޓެރިފެއް ދައްކަންޖެހޭނެއެވެ.

މިކަމާ ގުޅިގެން ޗައިނާއިން ވަނީ ޓެރިފްރޭޓް މުރާޖައާކުރުމަށް ގޮވާލާފައެވެ. ނަމަވެސް އެމެރިކާއިން ބުނީ ޓެރިފް ރޭޓަށް ބަދަލެއް ގެނެވެން ނެތްކަމަށެވެ. އެންމެފަހުން ޗައިނާއިން މިއަދު ވަނީ އެމެރިކާގެ އުފެއްދުންތަކުން އެޤައުމަށް ނަގާ ޓެރިފް ރޭޓް ބޮޑުކޮށް، އަންނަ އޭޕްރިލްމަހުގެ 10 ވަނަ ދުވަހުން ފެށިގެން ބޮޑުކުރި ޓެރިފް ރޭޓަށް އަމަލުކުރަން ފަށާނޭކަމަށް ބުނެފައެވެ.

މިކަމާ ގުޅޭގޮތުން ޗައިނާގެ މާލީ ވުޒާރާއިން ބުނެފައިވަނީ، އެމެރިކާއިން ޓެރިފް ރޭޓް ބޮޑުކުރުމަކީ އެޤައުމުން އެޅި ޅަ އެއްޗެއްކަން ބުނެފައެވެ. އަދި އެކަމުގެ ތަކުލީފް އާހިރުގައި އުފުލަން ޖެހޭނޭކަން ޗައިނައިން ވަނީ ފާހަގަކޮށްފައެވެ. ބައެއް މީޑިއާތަކުން ބުނާގޮތުގައި ޗައިނާގެ ސެންޓްރަލް ބޭންކުން ވަނީ އެކި ބޭނުންތަކަށް ޑޮލަރު ގަތުން މަދުކުރުމަށް އިދާރާތަކަށް އަންގާފައެވެ.

އިގްތިސާދީ މާހިރުން ވިދާޅުވާގޮތުގައި ޓްރަމްޕްގެ ޓެރިފް ސިޔާސަތާއެކު އެޤައުމުގެ ވިޔަފާރިތަކަށް ކުރިއަށްއޮތްތަނުގައި ބޮޑެތި ލޮޅުންތައް އަންނާނެއެވެ.

ދުނިޔޭގެ އިގްތިސާދަށް ބަލާއިރު، އެމެރިކާއަކީ އެންމެބޮޑު އިގްތިސާދެއް އޮންނަ ޤައުމެވެ. ޗައިނާއިން އަހަރެއްގެ މައްޗަށް އެމެރިކާއަށް 500 ބިލިއަން ޑޮލަރުގެ މުދާ އެތެރެކުރެއެވެ.