ހަނގުރާމައެއް ފެށުމުގެ ހާލަތުގައި އޮތް އީރާނާއި އެމެރިކާ ދެޤައުމުން ބޭއްވި ވާހަކަތަކުގެ ފުރަތަމަ ބުރު މިއަދު އަމާންކަމާއެކު ނިންމާލައިފިއެވެ. 

އީރާނުގެ ނިއުކްލިއާ ޕްރޮގްރާމާ ގުޅޭގޮތުން އެމެރިކާއިން ހުށަހެޅި ހުށަހެޅުމަކަށް އޮމާންގައި ކުރިއަށްގެންދިޔަ ފުރަތަމަ ބުރުގެ ވާހަކަތައް ނިންމާލާފައިވަނީ، އަންނަ ހަފްތާގައި ވާހަކަތަކުގެ ދެވަނަ ބުރެއް ބޭއްވުމަށް އެއްބަސްވެގެންނެވެ. އޮމާންގެ ވެރިރަށް މަސްކަޓްގައި އީރާނާ އެމެރިކާ އާ ދެމެދު މިވާހަކަތައް ކުރިއަށްގެންގޮސްފައިވަނީ، އޮމާން މެދުވެރިކޮށް ނުސީދާ ގޮތެއްގައެވެ.

އަލްޖަޒީރާއިން ބުނެފައިވަނީ ވާހަކަތައް ކުރިއަށްގެންގޮސްފައިވަނީ އީރާނާ އެމެރިކާގެ އޮފިޝަލުން ދެ ކޮޓަރިއެއްގައި ތިބެގެންނެވެ. މި ވާހަކަތަކާ ގުޅިގެން އީރާނުގެ ހާރިޖިއްޔާއިްނ ބުނެފައިވަނީ، ބައްދަލުވުންދިޔައީ ވަރަށް އަމާން މާހައުލެއްގައި ދެފަރާތަށްވެސް އިހްތިރާމް އަދާކުރާ ހާލަތުގައިކަމަށެވެ. އެގޮތުން މިއަދުގެ ބައްދަލުވުން ނިންމާލާފައިވަނީ އަންނަ ހަފްތާގައި މީގެ ދެވަނަ ބައްދަލުވުމެއް ބައްވާ ގޮތަށެވެ. 

Advertisement

މި ބައްދަލުވުމުގެ އިތުރު އެއްވެސް މައުލޫމާތެއް އަދި އެއްވެސް ފަރާތަކުން ހާމަކޮށްފައެއް ނުވެއެވެ. ބައްދަލުވުން ބާއްވާފައިމިވަނީ، އީރާނުން ނިއުކްލިއާ ބާރުވެރިކަން އުސޫލްތަކާ ހިލާފަށް ހޯދަމުންދާކަމަށް ތުހުމަތުކޮށް، އެމެރިކާއިން އީރާނަށް ހަމަލާދޭނެ ކަމަށް އިންޒާރުދީފައިވަނިކޮށެވެ.