ކުއްލި ދަތުރުފުޅެއްގައި އީރާނުގެ ހާރިޖީ ވަޒީރު، އައްބާސް އަރްގްޗީ ރަޝިއާއަށް ވަޑައިގަންނަވާގޮތަށް ނިންމައިފިކަމަށް މެދުއިރުމަތީގެ ބައެއް މީޑިއާތަކުން ބުނެފިއެވެ.

އީރާނު ސަރުކާރަށް ވާގިވެރިވާ ބައެއް މީޑިއާތަކަށް ދީފައިވާ ބަސްދީގަތުމެއްގައި އީރާނުގެ ހާރިޖިއްޔާގެ ސްޕޯކްސްޕާސަން އިސްމާއީލް ބަގާއީ ވިދާޅުވެފައިވަނީ، އީރާނުގެ ނިއުކްލިއަރ ޕްރޮގްރާމުގެ މައްސަލާގައި އުފެދިފައިވާ ނުތަނަވަސްކަން ކުޑަކުރުމަށް އެމެރިކާ އާއެކު ފަށާފައިވާ ނުސީދާ ބައްދަލުވުންތަކާ ބެހޭ މައުލޫމާތު ހިއްސާކުރުމަށް އަރްގްޗީ ރަޝިއާއަށް ވަޑައިގަތުމަށް ނިންމާފައިވާކަމަށެވެ.

އަރްގްޗީގެ މި ދަތުރުފުޅުގައި ބައްދަލުކުރެއްވުމަށް އަދި ނިންމަވާފައިވަނީ، ރަޝިޔާގެ ޚަރިޖީ ވަޒީރު ސަރުގޭ ލަވަރޯވް އާކަމަށް އޭނާ ވިދާޅުވިއެވެ. އީރާނުގެ ހާރިޖީ ވަޒީރު ރަޝިއާއަށް ދަތުރުފުޅެއް ކުރެއްވުމަށް ހަމަޖެހިފައިވާކަން ރަޝިއާއިންވެސް ވަނީ މީޑިއާތަކަށް ޔަގީންކޮށްދީފައެވެ. ނަމަވެސް މި ދަތުރުގެ އިތުރު ތަފްސީލު ހާމަކޮށްފައެއް ނުވެއެވެ.

ކުއްލި ދަތުރުފުޅެއްގައި އީރާނުގެ ހާރިޖީ ވަޒީރު އަރްގްޗީ ރަޝިއާއަށް ވަދައިގަތުމަށް ނިންމިއިރު، އީރާނާ އެމެރިކާގެ ނުސީދާ ވާހަކަތަކުގެ ދެވަނަ ބުރު އަންނަ ހަފްތާގެ ތެރޭގައި ކުރިއަށްގެންދާނޭކަމަށް ދެ ޤައުމުންވެސް ވަނީ ބުނެފައެވެ.

އީރާނުގެ ނިއުކްލިއާ ޕްރޮގްރާމް މައްސަލާގައި އޮމާން މެދުވެރިއެއްގެ ބައި އަދާކުރާގޮތަށް އެމެރިއާ އާއި އީރާން ނުސީދާ ވާހަކަތަކުގެ ފުރަތަމަ ބުރު ނިމިފައިވަނީ ދެ ޤައުމުންވެސް ހިތްހަމަ ޖެހޭގޮތަށްކަމަށް ދެ ޤައުމުންވެސް ވަނީ ހާމަކޮށްފައެވެ. ނަމަވެސް ވާހަކަތަކުގެ ދެވަނަބުރު ފެށެން ކުޑަތަންވެފައިވަނިކޮށް، މިފަދަ ހައްސާސް ވަގުތެއްގައި މި ވާހަކަތަކުގައި އީރާނުގެ ފަރާތުން އެންމެ އިސް ފަރާތެއްގެ ގޮތުގައި ބައިވެރިވާ އަރްގާޗީ ރަޝިއާއަށް ވަޑައިގަތުމަކީ އެމެރިކާއަށް ތަހައްމަލު ނުކުރެވޭވަރުގެ ކަމަކަށް ވާނޭކަމަށް މަޝްރަހް ދިރާސާކުރާ ފަރާތްތަކުން ބުނެއެވެ. 

އީރާނުގެ ނިއުކްލިއާ މައްސަލާގައި އެމެރިކާއިން މިފަހުން އިންޒާރުދައްކައި ބިރުދެއްކި މައްސަލާގައި ރަޝިއާއިން ވަނީ، އެމެރިކާގެ އަމަލުތައް ވަރަށްބޮޑަށް ކުށްވެރިކޮށް އީރާނާއެކު އޮތްކަން ހާމަކޮށްފައެވެ.