ބޭރުން އެތެރެކުރާ އޮޓޯމޮބައިލްތަކާއި އޮޓޯގެ އެކިއެކި ސާމާނުތަކަށް ކަނޑައަޅާފައިވާ 25 އިންސައްތައިގެ ޓެރިފް އަށް ބަދަލެއް ގެނައުމަށް ވިސްނަމުންދާ ކަން އެމެރިކާގެ ރައީސް ރައީސް ޑޮނަލްޑް ޓްރަމްޕް ބުނެފިއެވެ.

އޭނާ މިހެން ބުނެފައިވަނީ، ވައިޓް ހައުސްގައި އިއްޔެ އޮތް ނޫސްވެރިންގެ ބައްދަލުވުމުގައި ވާހަކަ ދައްކަމުންނެވެ.

"އަހަރެން ބަލަމުން މިދަނީ ބައެއް ކާރު ކުންފުނިތަކަށް މިކަމުގައި (ޓެރިފް މައްސަލާގައި) އެހީތެރިވެވޭނެ ގޮތެއް،" ރައީސް ޓްރަމްޕް ބުނެފައިވެއެވެ. އޮޓޯމޮބައިލް ސެކްޓަރަށް މިފަދަ ޓެރިފްތަކެއް ކަނޑައެޅުމުން ކާރުތަކުގެ އަގު ބޮޑުތަނުން އިތުރުވެދާނެކަމަށް ބެލެވޭ ކަމަށާއި، ކާރު ކުންފުނިތަކަށް "ކުޑަ ވަގުތުކޮޅެއް" ބޭނުންވާނެ ކަމަށް އޭނާ ބުންޏެވެ. އަދި މިއީ އެމެރިކާގައި ކާރު އުފެއްދުމަށް އެ ކުންފުނިތަކަށް ދޭ ފުރުސަތެއް ކަމަށްވެސް ބުނެފައިވެއެވެ.

Advertisement

އޮޓޯ މޮބައިލް ތަކާއި އޮޓޯގެ ޓެރިފްއާއި ގުޅިގެން ކުރިން ނިންމި ނިންމުން ބަދަލުކުރަން ޓްރަމްޕްގެ ވިސްނުން ހުރި އިރު، ސްމާޓްފޯނާއި ލެޕްޓޮޕް އަދި އެހެނިހެން ޓެކްނޮލޮޖީ ބާވަތްތަކުގެ ޓެރިފް އާއި ގުޅިގެން ނިންމުންވެސް މިހާރު ވަނީ ބަދަލު ކޮށްފައެވެ.

އެގޮތުން އެތަކެއްޗަށް، ޓްރަމްޕް އިދާރާއިން ކަނޑައަޅާފައިވާ "ރެސިޕްރޮކަލް ޓެރިފް" އިން އިސްތިސްނާ ކޮށްފައިވާ ކަމަށް އެމެރިކާގެ ކަސްޓަމްސް އެންޑް ބޯޑަރ ޕްރޮޓެކްޝަން (ސީބީޕީ) އިން މިހާރު ވަނީ ހާމަކޮށްފައެވެ. 

މީގެ ތެރޭގައި ޗައިނާއިން އިމްޕޯޓް ކުރާ ތަކެއްޗަށް ކަނޑައަޅާފައިވާ 125 އިންސައްތައިގެ ބޮޑު ޑިއުޓީވެސް ހިމެނެއެވެ.