ހުޅުމާލޭގައި ބިނާކުރެވޭ ބޮޑެތި އިމާރާތްތަކުގައި ނަމާދުކުރަން ހާއްސަ ތަނެއް ހުރުން ލާޒިމުވާނޭހެން ގަވާއިދު އިސްލާހު ކުރުމުގެ މަސައްކަތްތައް އެޗްޑީސީން ފަށައިފި އެވެ.
ހުޅުމާލޭގެ ބެލެނިވެރިކަން އޮތް އެޗްޑީސީން މިކަން ހާމަކޮށްފައި ވަނީ ހުޅުމާލެ ފޭސް ދޭއްގައި ބޮޑު މިސްކިތެއް އިމާރާތް ކުރުމުގެ އެއްބަސްވުން ގާއިމު ކުރުމަށް މިއަދު ބޭއްވި ބައްދަލްވުމަށް ފަހު އެވެ.
އެ ކުންފުނިން ބުނި ގޮތުގައި މިއީ އެޗްޑީސީގެ މެނޭޖިން ޑިރެކްޓަރު ޑރ. މައުރޫފް ޖަމީލްގެ އިރުޝާދަށް ގެންނަން ނިންމި ބަދަލެކެވެ. އެ މަސައްކަތް މިހާރު ކުރަމުންދާ ކަމަށް ވެސް ބުންޏެވެ.
އެކަން ފާހަގަ ކުރައްވާ އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވަނީ އެ ނިންމުމަށް މަރުހަބާ ވިދާޅުވެފަ އެވެ. މެލޭޝިޔާ އިން މިސާލު ނަންގަވާ މިނިސްޓަރު ވިދާޅުވީ އެ ގައުމުގައި ބޮޑެތި މޯލްތަކާއި ބިލްޑިންތަކުގައި ނަމާދު ކުރަން ތަންތަން ހަދާފައިވާ ކަމަށެވެ. އެ ނޫން އިސްލާމީ ބައެއް ގައުމުތަކުގައި ވެސް ނަމާދު ކުރަން ހާއްސަ ތަންތަން ހުންނަކަން ފާހަގަ ކުރެއްވި އެވެ.
އެހެން ކަމުން ރާއްޖެ ފަދަ އިސްލާމީ ގައުމެއްގައި އެފަދަ ތަންތަން ހުރުން ވަރަށް މުހިންމު ކަމުގައި ވިދާޅުވި އެވެ. ހާއްސަކޮށް ބޮޑެތި ބިލްޑިންތަކުގައި ނަމާދު ކުރާން ކޮންމެވެސް ތަންކޮޅެއް ހާއްސަ ކުރުމަކީ މުހިންމު ބޭނުންތެރި ކަމެއް ކަމުގައި ވިދާޅުވި އެވެ.
ހުޅުމާލެ އަކީ ރާއްޖޭގެ އެންމެ ތަހުޒީބު އަވަށެވެ. ރީތި އުސް ބިނާތަކުން ފުރިހަަމަ ވަމުންދާ ހުޅުމާލޭގައި އަދިވެސް ދަނީ ބޮޑެތި އިމާރާތްތައް ކުރަމުންނެވެ. ވަރަށް ބޮޑު އާބާދީއެއް ވެސް ވެރިރަށުގެ އަވަށެއް ގޮތުގައި އޮތް ހުޅުމާލޭގައި މިހާރު އެބަ އޮތެވެ.
Advertisement
This content is created and paid for by advertisers and does not involve Voice Journalists
