ހުޅުމާލޭ ފޭސް 2 ގައި ބިނާ ކުރަމުންްދާ ދާއިމީ ބައެއް މިސްކިތްތައް މި އަހަރު ހުޅުވިގެންދާނެ ކަމަށް އިސްލާމީ ކަންތައްތަކާ ބެހޭ ވަޒީރު ޑރ. މުޙައްމަދު ޝަހީމް ޢަލީ ސަޢީދު ވިދާޅުވެއްޖެއެވެ. 

ޝަހީމް ރޭ އެކްސް ގައި ކުރެއްވި ޕޯސްޓެއްގައި ވިދާޅުވީ، ދާއިމީ 3 ބުރި މިސްކިތެއް ހިޔާ ޓަވަރުތައް ކައިރީގައި އަންނަ މަހު ފަހުކޮޅު ހުޅުވިގެންދާނެ ކަމަށެވެ. މި މިސްކިތަކީ އަމިއްލަ ފަރާތަކުން ބިނާކުރަމުން އަންނަ މިސްކިތެކެވެ. އަދި މިއީ 3000އެއްހާ މީހުންނަށް ނަމާދުކުރެވޭނެ ޖާގައިގެ މިސްކިތެކެވެ.

އަދި އަމާޒަކީ މިއަހަރުގެ ނިޔަލަށް ވަގުތީ ހުރިހައި މިސްކިތްތައް ނިމުމަކަށް ގެނައުން ކަމަށްވެސް ވިދާޅުވުއެވެ. 

Advertisement

ހުޅުމާލޭ ދެވަނަ ފިޔަވަހީގައި މިސްކިތް މަދު މައްސަލައަކީ އެ ސަރަހައްދު ދިރިއުޅޭ ގިނަ ބައެއްގެ ކަންބޮޑުވުމެއްކަން ފާހަގަކޮށްލަންޖެހެއެވެ.

އަމިއްލަ ފަރާތަކުން އެ ސަރަހައްދުގައި ބިނާ ކުރި މިސްކިތެއް މިދިޔަ މާރިޗު މަހުގައި ހުޅުވާފައިވާއިރު، އެ ވެގެން ދިޔައީ އެ ސަރަހައްދު ދިރިއުޅޭ މީހުންނަށް ލިބުނު ފަސޭހަ އަކަށެވެ.

މީގެ އިތުރުން ފޭސް 2 ގައި މިހާރުވެސް 2800 މީހުންގެ ޖާގައިގެ މިސްކިތަކާއި، 3000 މީހުންގެ ޖާގައިގެ މިސްކިތަކާއި، 1500 މީހުންގެ ޖާގައިގެ މިސްކިތެއްގެ އިތުރުން 1162 މީހުންގެ ޖާގައިގެ މިސްކިތެއްގެ ޢަމަލީ މަސައްކަތް އަންނަނީ ކުރަމުންނެވެ.